परासी : पश्चिम नवलपरासीको प्रतापपुर गाउँपालिकाले बिरामीको घरमै पुगेर परीक्षण र उपचार सेवा सुरु गरेको छ । संक्रमण फैलिएको समयमा लक्षण देखिएपनि घरमै बस्ने गरेको पाइएकाले स्वास्थ्यकर्मी खटाएर गाउँपालिकावासीको परीक्षण र अन्य उपचार सेवा सुरु गरिएको कार्यबहाक अध्यक्ष अञ्जु कुमारी चौधरीले बताइन् । परीक्षणपछि बिरामीलाई आवश्यक रहेका औषधि समेत वितरण गर्ने गरेको उनले जानकारी दिइन् ।
उपचार सेवाका क्रममा संक्रमणका लक्षण देखिएकाको निःशुल्क पीसीआर परीक्षण गर्ने गरिएको छ । लक्षण देखिएकाहरुले परीक्षण नगरी मेडिकलहरुबाट कडा औषधि सेवन गर्ने र संक्रमितपछि त्यसले गम्भीर असर पार्ने भएकाले पनि घरमै पुगेर परीक्षण र उपचार सेवा सुरु गरिएको चौधरीको भनाइ छ ।
लक्षण देखिएका बाहेकका बिरामीलाई स्वास्थ्य संस्थामा पुर्याउन गाउँपालिकाले आफ्नै गाडी प्रयोगमा ल्याएको छ । त्यसैगरी संक्रमित भएकालाई आइसोलेसन र अस्पताल पुर्याउन एम्बुलेन्सको व्यवस्था गरिएको छ ।
संक्रमितहरुका लागि १५ बेडको अक्सिजनसहितको आइसोलेसन बनाइएको छ । बिरामीहरुको उपचारका लागि आइसोलेसनमा २ जना चिकित्सकसहितको टोली रहेको गाउँपालिकाले जनाएको छ ।
प्रतिक्रिया दिनुहोस !
