लमजुङमा भूकम्प, दर्जनौं घर भत्किए, केही स्थानीय घाइते (फोटोफिचर)

बेसीसहर : लमजुङमा बुधबार बिहान २ पटकसम्म गएको भूकम्पमा दर्जनौं घरकटेराहरु भत्किनुका साथै केही स्थानीय घाइते भएका छन् । मस्र्याङ्दी गाउँपालिकाको भुलभुले केन्द्रविन्दु बनाएर बिहान ५ बजेर ४२ मिनेटमा ५ दशमलव ८ र ८ बजेर २६ मिनेटमा ५ दशमलव ३ रेक्टरस्केलको भूकम्प गएको हो । 

भूकम्पको केन्द्रविन्दु मस्र्याङ्दी गाउँपालिकाका घरहरूमा बढीजसो क्षति पुगेको छ । गाउँपालिका अध्यक्ष अर्जुन गुरुङका अनुसार सवै वडामा भूकम्पले क्षति पुर्‍याएको । दर्जनौं घरहरु भत्किएको गुरुङले बताए । 

प्रमुख जिल्ला अधिकारी होमप्रसाद लुइँटेलका अनुसार घर भत्किँदा बेंसीसहर नगरपालिका–६ चनौटेकी ३६ वर्षीया उमा गुरुङ र बेंसीसहर–११ रामचोकबेंसीकी ८७ वर्षीया खोपकुमारी पाण्डे घाइते भएका छन् । दुवैजनाको जिल्ला अस्पताल लमजुङमा उपचार भइरहेको उनले छ ।

भूकम्पले घर भत्किदा मस्र्याङ्दी गाउँपालिका–६ ठूलीबेंसीमा २२ वर्षीय गोविन्द अधिकारी घाइते भएका छन् । उनलाई थप उपचारका लागि जिल्ला अस्पताल बेंसीसहर लगिएको छ ।डीएसपी गंगाबहादुर थापाले केही घर भत्किएको र केही घाइते भएको जानकारी आएपनि सबै विवरण आइनसकेको बताए । भूकम्पपछि भाग्दा रेडियो मस्र्याङ्दीकी पत्रकार खुसी गुरुङ घाइते भएकी छन् । प्रहरीका अनुसार दोस्रोपटकको भुकम्पका कारण दोर्दीमा १ जना, बेसीसहरमा १ महिला घाइते भएकी छन् ।

भूकम्पले मस्र्याङ्दी–३ खुदी तरापुका बासुदेव खत्री, मस्र्याङ्दी–९ को राधा अधिकारीको पूर्णरुपले क्षति भएको छ । मस्र्याङ्दी कार्यपालिका सदस्य कृष्णकुमारी गुरुङका अनुसार वडा नं। ८ रिङट्याङमा २६ घरमा क्षति पुगेको छ । २ घर पूर्णरुपमा क्षति भएको उनले बताइन् । मस्र्याङ्दीका पूराना घर र कटेरामा क्षति भएको छ । भूकम्पको पराकम्प आइरहेकाले स्थानीय घरभित्र बस्न सकेका छैनन् ।