राष्ट्रियसभा उपनिर्वाचन : यसरी हुँदैछ हेटौडामा मतदान (फोटोफिचर)

हेटौडा : बागमती प्रदेशमा रिक्त रहेको राष्ट्रियसभा सदस्य पदको निर्वाचनको मतदान हेटौंडामा भइरहेको छ । हेटौंडा–४ मा रहेको भुटनदेवी माध्यामिक विद्यालयमा रहेको मतदानस्थलमा बिहान ९ बजेबाट मतदान सुरु भएको हो ।

दिउँसो ३ बजेसम्म मतदान सकिने प्रमुख निर्वाचन अधिकृत डिल्लीरत्न श्रेष्ठले जानकारी दिए । राष्ट्रियसभा सदस्य रामबहादुर थापाले दल परिवर्तन गरेपछि रिक्त पदमा थापा आफैं, बिपक्षि दलहरुको समर्थनमा स्वतन्त्र उम्मेदवार डाक्टर खिमलाल देवकोटा र नेमकिपाका कृष्णबहादुर तामाङ चुनावी मैदानमा छन् । मतदानका लागि ३ वटा मतदान केन्द्रको व्यवस्था गरिएको छ । जनस्वास्थ्य कार्यालय मकवानपुरको प्राविधिक सहयोगमा एन्टिजेन विधिबाट मतदान स्थलमै कोरोना परीक्षणको व्यवस्था गरिएको छ ।

एउटा मतदान केन्द्रबाट कोरोना पोजेटिभ मतदाता र बाँकी दुईवटा मतदान केन्द्र मध्ये एउटाबाट स्थानीय तहका जनप्रतिनिधि र अर्कोबाट प्रदेशसभा सदस्यहरुले मतदान गर्ने ब्यवस्था मिलाइएको छ । निर्वाचनमा बागमती प्रदेशका १ सय ९ सांसद  र १ सय १९ स्थानीय तहका प्रमुख र उपप्रमुख मतदाता रहेका छन् । 

दिउँसो १२ बजेसम्म क मदतान केन्द्रमा ६६ जना प्रदेशसभा सदस्य,ख मतदान केन्द्रमा १ सय १३ अध्यक्ष उपाध्यक्ष र ग मतदान केन्द्रमा २० जना कोरोना संक्रमित प्रदेशसभा सदस्य तथा स्थानीय तहका अध्यक्ष उपाध्यक्षले मतदान गरेको प्रमुख निर्वाचन अधिकृत श्रेष्ठले बताए । आजै साँझसम्म मत परिणाम सार्वजनिक गर्ने उनले जानकारी दिए