गाजा क्षेत्रमा युद्धविरामपछि हमासको दावी: इजरायलमाथि विजय हासिल गर्‍यौँ

जेरुसेलम: गाजा क्षेत्रमा इजरायल र हमास विद्रोहीको युद्धविरामसँगै हमासका एक वरिष्ठ नेताले आफूहरुले इजरायलमाथि जित हासिल गरेको दावी गरेका छन् ।

गाजामा आफ्ना समर्थकहरुसहित हजारौँ मानिसलाई सम्बोधन गर्दै हमासका वरिष्ठ नेता खलील अल हायाले शुक्रबार यस्तो बताएका हुन् ।

उनले आमसभालाई देखाउँदै भाषणको क्रममा यसलाई विजयको उल्लास भएको प्रतिक्रिया दिए । खलील गाजा क्षेत्रस्थित इस्लामिस्ट मुभमेन्टको राजनीतिक ब्यूरोका दोस्रो बरियताका नेता हुन् । उनले इजरायलको हवाइ आक्रमणबाट ध्वस्त पारिएका गाजाका भवनहरुको पूनर्निर्माण समेत गरिने प्रतिवद्धता व्यक्त गरे ।

इजरायलले मे १० देखि गाजा क्षेत्रमा निरन्तर हवाइ आक्रमण गर्दा कम्तिमा २३२ प्यालेस्टाइनी मारिएका छन् । जसमध्ये ६५ जना बालबालिका थिए । यस्तै इजरायली आक्रमणमा १९०० जना घाइते भएका छन् ।

यस क्रममा गाजा क्षेत्रबाट १ लाख २० हजार भन्दा धेरै मानिस सुरक्षित स्थानतर्फ भागेका छन् । हमास र इस्लामिस्टका अन्य कार्यकर्ताले भने इजरायलतर्फ ४ हजार भन्दा धेरै रकेट प्रहार गरेको बताइएको छ । रकेट हमलामा इजरायली पक्षमा भने १२ जना इजरायली मारिएको बताइएको छ ।