१९ वर्षमा बलात्कृत र गर्भवती भएको अमेरिकी गायिका लेडी गागाको खुलासा

वासिङटन: अमेरिकी गायिका लेडी गागाले आफू १९ वर्षको उमेर छँदा म्युजिक प्रोड्यूसरबाट बलात्कृत भएको र गर्भवती भएको खुलासा गरेकी छन् ।

जुन घटनाले आफूलाई मनोवैज्ञानिक रुपमा धक्का लागेको उनको भनाइ छ । उनले यसअघि पनि आफू व्यवसाय सुरु गर्ने बेला संगीत उद्योगका मालिकबाट बलात्कृत भएको बताएकी थिइन् ।

उनले हालै एक डकुमेन्ट्रीमा बलात्कार र गर्भवती भएको कुरा बताएकी हुन् । जसले गर्दा लेडीले आफू दर्दनाक तनाबको सामना गर्नुपरेको बताइन् । तर हाल यस्तो अवस्था नियन्त्रित बनेको पनि उनले बताइन् ।

"म १९ वर्षकी थिएँ । र म व्यवसाय गर्न थालेको थिएँ । एक प्रोड्यूसरले मलाई भने कि: तिम्रो कपडा खोल" उनले भनिन् । एपल टिभी प्लसका लागि ओप्राह विन्फ्रे र प्रिन्स ह्यारीले तयार गरेको "द मी यू कान्ट सी" नामको डकुमेन्ट्रीका लागि लेडी गागाले यस्तो खुलासा गरेकी हुन् ।

उनले अगाडि भनेकी छन् "मैले भनेँ, हुँदैन । र मैले छोडेँ । र उनीहरुले मेरा सबै म्यूजिक जलाइदिने भने । र उनीहरुले मलाई सोधिरहन छाडेनन् । त्यसपछि म स्थिर भएँ र त्यसपछि मलाई पनि सम्झना छैन..." लेडी गागाले आँशु खसाल्दै सुनाइन्।

३५ वर्षीया गायिकाले आफ्ना 'बलात्कारी'को पहिचान पहिलो पटक यसरी गरेकी हुन् । साथै उनले ती 'बलात्कारी'को नाम सार्वजनिक नगर्ने बताएकी छन् । किनकि अब फेरि ती व्यक्तिको सामना गर्न नचाहेको लेडीको भनाइ छ ।

गागाका अनुसार ती प्रोड्यूसरले उनलाई आफ्नै बाबु आमाको घरको कुनामा गर्भवती बनाएर छाडिदिएका थिए । त्यस घटनाको केही वर्षपछि मात्रै उनी मानसिक समस्याले गर्दा अस्पताल नै भर्ना हुनु परेको थियो ।

केही वर्षसम्म आफू मानसिक रुपमा विचलित बनिरहेको उनको भनाइ छ। यसबाट मुक्त हुन उनले २ वर्ष भन्दा धेरै थेरापी समेत गरेकी थिइन् ।