बेइजिङ: चीनमा भएको एक दौड प्रतियोगितामा मृत्यु हुने धावकको संख्या २१ पुगेको छ । एक सय किलोमिटरको क्रस कन्ट्री माउन्टेन रेसमा प्रतिष्पर्धारत खेलाडीहरुको खराब मौसमका कारण मृत्यु भएको बताइएको छ ।
उच्च पहाडी क्षेत्रमा उनीहरुको दौडको क्रममा अचानक मौसम खराब भइ वर्षा, असिना, हावाहुरी आउँदा उनीहरुको मृत्यु भएको थियो । अनुसन्धानको प्रारम्भिक चरणमा २० जनाको मृत्यु भएको र अर्का एक जना वेपत्ता थिए । चिनियाँ सरकारी मिडियाका अनुसार वेपत्ता धावकको शव आइतबार बिहान भेटिएको हो ।
उत्तर पश्चिम गान्सु प्रान्तको बैइन सहर नजिकै जंगलमा शनिबार यस्तो घटना भएको बताइएको छ । बैइन सहरका मेयर झाङ छुचेनका अनुसार दौडको २० देखि ३१ किलोमिटरको बीच भागमा यस्तो घटना भएको थियो ।
दौड चलिरहँदा त्यस क्षेत्रमा छोटो अवधिमै हिउँसहितको भारी वर्षा र तेज हुरी वतास चल्दा तापक्रम घटेको थियो । म्याराथन आयोजक टोलीले घटना भएलगत्तै उद्वार टोली खटाएको थियो । दौडमा सहभागी १७२ प्रतिष्पर्धीमध्ये घटनास्थलबाट १८ जनाको उद्वार भएको थियो ।
शनिबार रातभर उद्वार गरिए पनि कठिन भएको बताइएको छ । मंगोलियासँग सीमा जोडिएको गान्सु प्रान्त चीनको विपन्न प्रान्त हो । जहाँ हरेक वर्ष वर्षा, बाढी तथा खराब मौसमका कारण जनधनको क्षति हुने गरेको छ । यस क्षेत्रलाई भूकम्पीय दृष्टिले पनि जोखिममा रहेको मानिन्छ । २०१० मा यस क्षेत्रमा बाढी पहिरोका कारण १००० जनाको मृत्यु भएको थियो ।
प्रतिक्रिया दिनुहोस !
