रोम: इटालीमा केबल कार खस्दा एक बालक सहित १४ जना यात्रुको मृत्यु भएको छ ।
दुर्घटनामा एक बालक गम्भीर रुपमा घाइते भएका छन् । उत्तरी क्षेत्रस्थित म्यागिओर लेक नजिकैको पहाडमा आइतबार केबल कार खसेको हो ।
रिसोर्ट टाउनबाट यात्रुहरुलाई बोकेर पिएदमन्ट क्षेत्रस्थित मोट्टारोन पहाड जाँदै गर्दा केबल कार खसेको हो । काठहरु भएको जमिनमा खसेको केबल कारको तस्बिर सामाजिक सञ्जालमा समेत भाइरल बनेको छ ।
घटनामा मृत्यु हुनेहरुमध्ये केही विदेशी नागरिक समेत रहेको बताइएको छ । स्ट्रेसा सहरका मेयर मार्सेला सेभेरिनोले यस घटनाबाट आफूलाई दुखी तुल्याएको प्रतिक्रिया दिएका छन् ।
दुर्घटनापछि ५ वर्ष र ९ वर्षका बालकहरुलाई उपचारका लागि नजिकको अस्पताल लगिएको थियो । तर ९ वर्षीय बालकको उपचारको क्रममा मृत्यु भएको हो ।
स्थानीय समय अनुसार आइतबार १२:३० बजे केबल कार दुर्घटना भएको अन्तर्राष्ट्रिय मिडियाले जनाएका छन् । दुर्घटनाको कारणबारे अझै यकिन भइसकेको छैन । यसबारे छानविन गरिने स्थानीय प्रशासनले जनाएको छ ।
इटालीका प्रधानमन्त्री मारियो ड्राघीले घटनाबारे आफूले स्थानीय सरकारबाट जानकारी लिइरहेको भन्दै घटनामा मृत्यु भएकाहरुको परिवारप्रति समवेदना प्रकट गरेका छन् ।
प्रतिक्रिया दिनुहोस !
