चौधरी उद्योगको बियर गोदाममा लागेको आगो ७ घण्टापछि नियन्त्रणमा
जेठ १९, २०७८ बुधबार १६:४९:०
नवलपुर : चौधरी ग्रामको बियर गोदाममा लागेको आगो ७ घण्टापछि नियन्त्रणमा आएको छ । पूर्वी नवलपरासीको देवचुली नगरपालिका–२ दुम्कौलीस्थित चौधरी ग्राम परिसरमा रहेको बियर गोदामको भवनमा बुधबार बिहान ९ बजे आगलागी भएको थियो ।
आगो निभाउन चितवन, पूर्वी नवलपरासी, पश्चिम नवलपरासी र नेपाली सेनाको गरी ८ वटा दमकल प्रयोग गरिएको छ । अहिले दिउँसो ४ बजेदेखि आगो नियन्त्रणमा आएको जिल्ला प्रहरी कार्यालयका उपरीक्षक प्रकाश मल्लले बताए ।
‘गोदामको भवनमा लागेको आगो नियन्त्रणमा आएको छ । आगो अन्यन्त्र सल्केर फैलन सक्ने अवस्थामा छैन । भित्र केही ठाउँमा सामान्य बल्दै गरेको आगोलाई अहिले पनि दमकलले निभाई रहेको छ । ’ प्रहरी उपरीक्षक मल्ले भने ,' आगो निभाउन नेपाली सेना, शसस्त्र र नेपाल प्रहरीका सुरक्षाकर्मीसहित मजदुरहरु समेत खटिएका थिए ।
उक्त उद्योग ग्राम उद्योगपति बिनोद चौधरीको हो । गोदाम भवनमा बियर प्लान्ट समेत छ । आगो प्लाण्टसम्म पुग्न नपाएको बताइएको छ । उद्योगले नेपाल आइस, मुस्ताङ र रियल गोल्ड बियर उत्पादन गर्दै आएको छ । आगो बियरको खाली कार्टुन र बजारमा लैजानका लागि भरेर राखेका कार्टुन रहेको गोदाममा लागेको हो । तीनै वटै बियर सोही गोदाममा थिए ।
बियर प्रयोगका आवश्यक पर्ने स्प्रिट, खाद्यन्न वस्तु र कागजका कार्टुनहरु रहेका कारण आगो एक्कासी फैलिँदा नियन्त्रण गर्न समस्या भएको थियो । आगो नियन्त्रणमा लिन नसकेपछि डोजर प्रयोग गरेर भवनको भित्ताहरु भत्काइएको थियो । विद्युत सर्ट भएर आगलागी भएको अनुमान छ ।
‘सामान्य हेर्दा विद्युत सर्ट भएर आगो लागेको हुनसक्ने अनुमान छ । तर अहिले नै कसरी आगो लाग्यो भन्ने बारे बताउन सकिने अवस्था छैन । अनसन्धानपछि थाहा हुन्छ,' उद्योगका प्रशासन प्रमुख दामोदर पौडेलले भने ।
विवरण तयारपछि मात्र आगलागीबाट भएको क्षतिका बारेमा बताउन सकिने प्रशासन प्रमुख पौडेलले बताए ।
प्रतिक्रिया दिनुहोस !
