जापानमा जन्मदर घट्दै
टोकियो: तिब्र रुपमा आर्थिक विकास गरिरहेको जापानमा जन्मदर भने घट्दो रुपमा रहेको सरकारी तथ्यांकले देखाएको छ ।
कोरोनाभाइरस महामारीका कारण गत वर्ष २०२० मा जापानमा अघिल्लो वर्षको भन्दा कम बालबालिकाको जन्म भयो । पछिल्ला वर्षहरुमा जापानमा जन्मदर घट्दै गरेको सरकारी आंकडा छ ।
जसले गर्दा देशको जनसाङ्खीक संरचनामा समेत असर पर्ने भन्दै चिन्ता व्यक्त हुन थालेको छ । साथै जापानमा भविष्यमा सक्रिय जनशक्तिको अभाव हुनसक्ने बताइन्छ ।
स्वास्थ्य मन्त्रालयका अनुसार स्वदेशी जनसङ्ख्या घटेपछि जापानमा सक्रिय जनशक्तिको समेत अभाव हुन थालेको छ । सरकारी आंकडा अनुसार २०२० मा ८ लाख ४० हजार ८३२ बालबालिकाको जन्म भएको छ । जुन अघिल्लो वर्षको भन्दा २.८ प्रतिशतले कम हो ।
यस्तै गत वर्षको जन्मदर भने जन्मदर्ता सुरु गरिएको वर्ष १८९९ देखिकै सबैभन्दा कम हो । अधिकारीहरुका अनुसार गत वर्ष यहाँ विवाह दरमा पनि कमी आयो । अघिल्लो वर्षको तुलनामा २०२० मा १२.३ प्रतिशत कम विवाह दर्ता भएका थिए ।
२०२० मा ५ लाख २५ हजार ४९० विवाद दर्ता भएको अधिकारीहरुले बताए । विश्वभर नै थोरै विवाह र जन्मदर भएका देशमध्ये जापान पनि एक हो । २०१८ को जनगणना अनुसार जापानको कुल जनसङ्ख्या १२ करोड ४० लाख छ ।
तिब्र आर्थिक विकाससँगै जापानका शहरी क्षेत्रको व्यस्त जीवनशैलीले गर्दा पछिल्लो समय यहाँ सम्बन्ध विच्छेदका घटना बढ्नुका साथै परिवारको संरचनामा पनि परिवर्तन आउन थालेको बताइन्छ ।