दैलेखः खोलाले बगाउँदा दैलेखमा एक जना बेपत्ता भएका छन् । जिल्लाको भैरबी गाउँपालिका–२ रावतकोट देउलाका ५० वर्षीया केशरबहादुर थापा बेपत्ता भएका हुन् ।
उनी बिहीबार दिउँसोबाट बेपत्ता रहेको जिल्ला प्रहरी कार्यालय दैलेखले जनाएको छ । बुधबार उनी घरदेखि चार किमी टाढा रहेको खेतमा धानको बीउ राख्न गएका थिए ।
धानको बीउ राखेर घर फर्कने क्रममा उनलाई स्थानीय परिगार्ड खोलाले बगाएका हो । परिगार्ड खोलामा तटबन्ध तथा सिञ्चाई कुलो योजना निर्माण कार्य भइरहेको थियो ।
उक्त योजनाको लागि जाली भर्ने काम भएको र निरन्तर वर्षाको कारण खोला बढेर जाली बगाउन खोज्दा उक्त जाली तान्ने क्रममा जालीसहित थापालाई खोलाले बगाएको प्रहरी नायब उपरीक्षक (डिएसपी) अनुपम श्रेष्ठले बताए ।
खोलाले बगाएका थापाको खोजी कार्य भइरहेको डिएसपी श्रेष्ठले जानकारी दिए । उनका अनुसार स्थानीयबासी र प्रहरी चौकी भैरबीबाट खटिएको प्रहरी टोलीले बेपत्ता थापाको खोजी कार्य भइरहेको छ ।
प्रतिक्रिया दिनुहोस !
