चीन भन्छ: १ अर्ब भन्दा धेरै खोप प्रयोग गरियो
बेइजिङ: चीनले कोभिड १९ को खोप १ अर्ब डोज भन्दा धेरै प्रयोग गरिसकेको स्वास्थ्यकर्मीहरुले बताएका छन् । जुन संख्या विश्वभर वितरण भएको एकतिहाइ भन्दा पनि धेरै हो ।
चीनका राष्ट्रिय स्वास्थ्य आयोगका अधिकारीहरुले आइतबार यस्तो बताएका हुन् । जवकि हालसम्म विश्वभर साढे २ अर्ब खोप वितरण भएको छ ।
तर हालसम्म कति नागरिकले खोप लगाइसके वा कति बाँकी छन् भन्ने यकिन गरेको छैन । सरकारले भने यस महिनाको अन्त्यसम्म देशको ४० प्रतिशत जनसंख्यालाई पूर्ण रुपमा खोप लगाइसक्ने लक्ष्य लिएको छ ।
केही प्रान्तले भने जनतालाई खोप प्रति उत्साही गराउन निशुल्क खोप वितरण गर्दैछन् । चीनमा पछिल्लो आइतबार एकै दिन जम्मा २३ जनालाई कोरोना संक्रमण पुष्टि भएको छ ।
चीनमा हालसम्म चार प्रकारका कोभिड खोपले स्वीकृति पाएका छन् । चिनियाँ मिडियाका अनुसार यस वर्ष चीनले ३ अर्ब भन्दा धेरै खोप उत्पादन गर्ने लक्ष्य लिएको छ । तर चीनले कहिलेसम्म आम रुपमा प्रतिरोधी क्षमता 'हर्ड एम्युनिटी' को लक्ष्य हासिल गर्छ वा विदेशमा खोप विक्री गर्छ भन्नेबारे स्वास्थ्य अधिकारीहरुले बताएका छैनन् ।