गुराँस गाउँपालिकाको योजना: यौनिक तथा लैंगिक अल्पसंख्यकलाई मासिक भत्ता

दैलेखः यौनिक तथा लैङ्गिक अल्पसंख्यक समुदायको पहिचानलाई दैलेखको गुराँस गाउँपालिकाले मासिक भत्ता दिने नीति अघि सारेको छ ।

आर्थिक, सामाजिक र शैक्षिक क्षेत्रमा पछाडि पारिएका यौनिक तथा लैङ्गिक अल्पसंख्यकहरुलाई मासिक भत्ता उपलब्ध गराउने गाउँपालिकाका अध्यक्ष खेमराज ओलीले बताए । अघिल्लो साता गाउँपालिकाले सार्वजनिक गरेको आर्थिक वर्ष २०७८/०७९ को नीति तथा कार्यक्रम र बजेटमा लैङ्गिक समानता तथा सामाजिक समावेशीकरणलाई जोड दिँदै यस्तो नीति ल्याएको जनाएको छ ।

‘गाउँपालिकाले गाउँपालिकाभित्र खुल्नुभएका यौनिक तथा लैङ्गिक अल्पसंख्यकहरुको संरक्षण र सामाजिक सुरक्षाका लागि मासिक भत्ता उपलब्ध गराउनेछ,’अध्यक्ष ओलीले भने ।

गाउँपालिकाले जोखिममा परेका सामाजिक र पारिवारीक वहिष्करणमा परेका हिंसा पीडित महिला र बालबालिकालाई पुर्नस्थापना संरक्षण र शसक्तिकरण गर्ने नीति अघि सारेको छ । त्यसका लागि जीवन सुरक्षा कोष, जोखिम बालबालिका संरक्षण, महिला र बालबालिका जोखिम कोष, महिलासँग उपाध्यक्ष, गरिबसँग विश्वेश्वर अध्यक्ष रोजगकार कार्यक्रमलाई निरन्तरता दिइएको छ ।

दलित, महिला, जेष्ठ नागरिक, अपाङ्गता भएका व्यक्ति, आदीवासी जनजाती, लोपोन्मुख राउटे, जोखिममा परेका बालबालिका, एकल महिलाको शसक्तिकरण र आयआर्जनका लागि सीपमुलक तालिम लगायत विशेष कार्यक्रमहरु सञ्चालन गरिने गाउँपालिकाले जनाएको छ ।

लैङ्गिक समानता हासिल गर्ने, सबै किशोरीहरु र बालबालिकालाई सशक्त बनाउन ठोस कार्यक्रमहरु सञ्चालन गरिने नीति तथा कार्यक्रममा उल्लेख छ । यस्तै बाल विवाह, कम उमेरमा गरिने विवाह, जवर्जस्ती विवाह, यौन हिंसा तथा दुर्व्यवहारलाई निरुत्साहित गरिने गाउँपालिकाको लक्ष्य छ ।

गाउँपालिकाले छोरा र छोरीबिचको विभेद निरुत्साहित गर्न ‘मेरो छोरी जीवन भरी’ भन्ने नारा सहित एक वा दुई छोरीमा परिवार नियोजन गर्ने दम्पतीलाई सम्मान गर्ने भएको छ । साथै बृद्ध आमाबुबा प्रतिको छोरा बुहारीको दायित्वलाई आत्मसाथ गर्दै सासू ससूरालाई राम्रो हेरचाह र पालन पोषण गर्ने बुहारीहरुलाई सम्मान गर्न ‘सासू ससूरा स्याहार बुहारी सम्मान कार्यक्रम’ सञ्चालन गरिने बताइएको छ ।

सबै प्रकारका सामाजिक सुरक्षा कार्यक्रमलाई बैंकिङ्ग प्रणालीमा आवद्ध गरिने गाउँपालिकाले जनाएको छ । गाउँपालिकाले दाइजोप्रथा, छाउपडी प्रथा, बाल विवाह, जातीय छुवाछुत जस्ता कुरितिको रुपमा रहेको प्रर्थाको अन्त्यका लागि सामाजिक सांस्कृतिक रुपान्तरणका कार्यक्रमहरु सञ्चालन गर्नेछ ।

गाउँपालिकाले आर्थिक विकासका लागि कृषि, सिंचाई तथा पशुपालन, उद्योग तथा वाणिज्य, पर्यटन,  सहकारी सम्बन्धी नीतिहरु ल्याएको छ । सामाजिक विकासका लागि शिक्षामा विद्यार्थीसँग अध्यक्ष कार्यक्रम ल्याएको छ । गाउँपालिकाले गरिब, जेहेन्दार, आदीवासी जनजाति, द्धन्द्धपीडित र अपाङ्ग विद्यार्थीहरुलाई विद्यालय शिक्षा र उच्च शिक्षा तथा प्राविधिक शिक्षाका लागि छात्रवृत्ती उपलब्ध गराउने नीति ल्याएको छ ।

गाउँपालिकामा प्राज्ञिक क्षेत्रको विकासका लागि विद्यावारिधी, ईन्जिनियर, पाइलट, एमफिल अध्ययन गर्ने विद्यार्थीलाई रु एक लाख छात्रवृत्ती उपलब्धत्र गराउने भएको छ । यस्तै मेडिकल साइन्समा एमविविएस अध्ययन गर्ने विद्यार्थीलाई सम्बन्धित विश्वविद्यालयको भर्ना गरिएको अभिलेखका आधारमा १० लाख रुपैयाँ छात्रवृत्ती उपलब्ध गराउने गाउँपालिकाले जनाएको छ ।

स्वास्थ्य क्षेत्रमा कोरोना रोकथाम, १५ शैय्याको अस्पताल निर्माण, मुटु, दम, क्यान्सर, मृगौला, प्रेसर लगायत दिर्घ रोगीको लगत संकलन र आर्थिक सहायता, गर्भवती आमासँग उपाध्यक्ष कार्यक्रम लगायत कार्यक्रम अघि सारेको छ । विभिन्न खानेपानी आयोजनाहरु सम्पन्न गरी गाउँपालिकाका सबै नागरिकलाई स्वच्छ खानेपानीको सुविधा पुर्‍याउने र सरसफाईमा पहुँच पुर्‍याइने नीति तथा कार्यक्रममा उल्लेख छ ।

संस्कृति प्रवर्द्धनतर्फ लोपोन्मुख राउटे जाती र गुरुङ जातीको भाषा, लिपी, सभ्यतालाई संरक्षण र सम्वर्द्धन, थामेलेकमा स्थापना गर्न लागिएको राउटे संग्रहालय निर्माणको कार्य अगाडि बढाउने लगायत कार्यक्रमहरु अघि सारिएको गाउँपालिकाले जनाएको छ । गाउँपालिकाले आगामी आर्थिक वर्ष २०७८/०७९ का लागि ५५ करोड १७ लाख ५४ हजार रुपैयाँको बजेट सार्वजनिक गरेको थियो ।