परासी : समयअघि नै धान रोपेर सकेका पश्चिम नवलपरासीका अधिकांश किसान यतिबेला फुर्सदिला बनेका छन् । विगतका वर्षमा असारको अन्तिम सातासम्म धान रोप्न नपाएका किसान यतिबेला समयमै रोपाइँ सकेपछि फुर्सदिला बनेका हुन् ।
यहाँका अधिकांश किसानहरुलाई आकाशे पानीको भरमा रोपाई गर्नुपर्ने बाध्यता छ । तर यो वर्ष भने समयमा पानी परेको र सहजै मलखाद पाइएकाले किसानले जेठको अन्तिम साताबाटै रोपाइँ गर्न थालेका थिए ।
फुर्सदिला बनेका किसान खेतमा जमेको पानी व्यवस्थापन गर्न र अन्य तरकारी खेतीमा लागेका छन् । ‘यसवर्ष समयमा पानी पर्यो । मलखाद पनि समयमा पाइएकाले जेठको अन्तिममा रोपाइँ सकेर बसेका छौं, ’ रामग्राम नगरपालिकाका किसान अमिरुल्लाह अन्सारीले भने।
किसाहरुले समयमा धान रोप्न पाएकाले यसवर्ष जिल्लाको उत्पादनमा १५ प्रतिशतले वृद्धि हुने अपेक्षा लिइएको कृषि ज्ञान केन्द्रले जनाएको छ । अहिलेसम्म करिब ९० प्रतिशत रोपाइँ सकिएको कृषि ज्ञान केन्द्रका प्रमुख देबेश मिश्रले बताए ।
१० प्रतिशत किसानले ढिलो गरी बिउ राखेका कारण अहिले पनि रोपाई गर्दै आएका छन् । अबको एक साताभित्र बाँकी रोपाई पनि सकिने मिश्रको भनाइ छ । समयमा रोपाइ सकेका किसानलाई अबको १२/१४ दिनमा गोड्मेल (झारपात फाल्ने) पर्ने चटारो हुन्छ ।
त्यस समयमा मल नपाइने होकी भन्ने चिन्ता किसालाई छ । धान रोपेको २२ देखि २४ दिनभित्र गोडमेल गर्ने गरिन्छ । ‘विगतका वर्षमा धान रोप्ने र रोपिसकेपछि आवश्यक पर्ने मलखाद नपाउँदा समस्या भयो । यसवर्ष पनि समस्या आउने होकी भन्ने चिन्ता छ । त्यसका लागि सरकारले बेलैमा व्यवस्था गरिदिन पर्यो । ’
प्रतापपुर गाउँपालिकाका किसान नारायण कुर्मीले भने । जिल्लाको धान उत्पादनमा कृषि ज्ञान केन्द्रले विभिन्न कार्यक्रमहरु सञ्चालन गरेको छ । स्मार्ट कृषि गाउँ कार्यक्रमदेखि कृषि यन्त्र वितरण र अन्य कार्यक्रम सञ्चालन गरेकालेपनि किसानहरु थप उत्साहित भएको ज्ञान केन्द्रका प्रमुख मिश्रले बताए । वर्षेधान मात्र हुँदै आएको जिल्लामा नमूनाका रुपमा चैते धान लगाउन प्रयास गरिएको ज्ञान केन्द्रले जनाएको छ । जिल्लाको २९ हजार ९ सय ७५ हेक्टर क्षेत्रफलमा धान खेति हुँदै आएको छ ।
प्रतिक्रिया दिनुहोस !
