लण्डन: बेलायतमा कोरोना विरुद्धको दोस्रो खोप लगाएका नागरिकहरुलाई तेस्रो डोज खोप उपलब्ध गराइने भएको छ ।
बेलायत सरकारले जाडो मौसम सुरु हुनुअघि नै सेप्टेम्बरदेखि जोखिममा रहेका दशौँ लाख नागरिकलाई खोप उपलब्ध गराउने तयारी गरेको छ ।
राष्ट्रिय स्वास्थ्य सेवा (एनएचएस) लाई नयाँ खोप विस्तार कार्यक्रम अघि बढाउन सरकारले अनुमति दिएको बताइएको बेलायती मिडियाले जनाएका छन् । स्वास्थ्य तथा सामाजिक हेरचाह सेक्रेटरी साजिद जाभिदका अनुसार सेप्टेम्बरदेखि खोप दिने तयारी स्वरुप मन्त्रीहरुले एनएचएससँग मिलेर तिब्र गतिमा काम गरिरहेका छन् ।
"हाम्रो पहिलो कोभिड खोप कार्यक्रमले यस देशमा स्वतन्त्रता स्थापना गरिरहेको छ । र हाम्रो खोप विस्तार कार्यक्रमले स्वतन्त्रता रक्षा गर्नेछ," जाभिदले भनेका छन् ।
बेलायती अधिकारीहरुका अनुसार ८५ प्रतिशत वयस्कहरुले पहिलो खोप र ६२ प्रतिशत वयस्कले देस्रो खोप प्राप्त गरिसकेका छन् । र उनीहरुले खोप कार्यक्रमले सफलता पाएको बताएका छन् ।
अब जाडो मौसममा नयाँ भेरिएन्ट फैलन सक्ने भन्दै खोपलाई तिब्र रुपमा विस्तार गर्ने कार्यक्रम सरकारले अघि सारेको हो । खोप विज्ञहरुले भने ३ करोड अति जोखिममा रहेका नागरिकहरुलाई खोपको तेस्रो डोज आवश्यक परेको सुझाव दिएका छन् ।
बेलायतमा बुधबार २६ हजार ६८ जना कोरोना संक्रमित थपिएका छन् । जुन जनवरी २९ यता दैनिक संक्रमितको संख्यामा सबैभन्दा उच्च हो । हालसम्म बेलायतमा कोरोना संक्रमितको संख्या ४८ लाख ९ सय ७ छ । साथै १ लाख २८ हजार १ सय ४० संक्रमितको मृत्यु भइसकेको छ ।
प्रतिक्रिया दिनुहोस !
