चिनियाँ राष्ट्रपतिको दावी: कम्युनिस्ट पार्टी विना नयाँ चीन सम्भव छैन !

बेइजिङ: चिनियाँ राष्ट्रपति सी जिनपिङले चीनको उदय ऐतिहासिक अपरिहार्यता भएको भन्दै अब चीन विदेशीबाट दमन, उत्पीडन र दबाबमा नपर्ने चेतावनी दिएका छन् ।

बिहीबार चिनियाँ सत्तारुढ कम्युनिस्ट पार्टीको १००औं स्थापना दिवसको अवसरमा सम्बोधन गर्दै राष्ट्रपति सी ले यस्तो बताएका हुन् ।

सत वार्षिकी कार्यक्रमलाई सम्बोधन गर्दै राष्ट्रपति सिले १०० वर्षको अवधिमा चिनियाँ कम्युनिस्ट पार्टीले सबै चिनियाँहरुलाई एकताबद्ध गर्दै चीनको महान पुनर्जागरणको नेतृत्व गरेको बताए ।

यसबीचमा चिनियाँ कम्युनिस्ट पार्टीले जनगणतान्त्रिक क्रान्ति सम्पन्न, स्वाधीनतासहित समाजवादी क्रान्ति एवं निर्माण, सुधारसहित समाजवादी आधुनिकीकरण र चिनियाँ विशेषताको समाजवाद निर्माण गरी चार महान उपलब्धि हासिल गरेको पनि उनले बताए ।

कम्युनिस्ट पार्टीको महासचिव समेत रहेका राष्ट्रपति सीले चिनियाँ कम्युनिस्ट पार्टीले मार्क्सवादलाई चिनियाँ परिवेश अनुसार लागू गर्ने बताए । यस्तै विश्व शान्तिको रक्षा, विश्वव्यापी विकासप्रति योगदान र अन्तर्राष्ट्रिय प्रणाली प्रवर्द्धनका लागि चीन सधैँ क्रियाशील रहेको उनको प्रतिवद्धता छ।

सत वार्षिकी समारोहमा तियानमेन स्क्वायरमा बिहीबार नेता सी ले कडा रुपमा राष्ट्रवादी भाषण गरेका थिए । यस क्रममा उनले चिनियाँ कम्युनिस्ट पार्टीले मात्रै स्थायित्व कायम गर्नसक्ने र कुनै पनि विभाजनका विदेशी प्रयासलाई यस पार्टीले सहजै विफल पार्नसक्ने दावी गरेका थिए ।

"कम्युनिस्ट पार्टी विना नयाँ चीन सम्भव छैन," नेता सी ले भने । सत वार्षिकी समारोहमा राजधानी बेइजिङमा भव्य रुपमा देशभक्तिपूर्ण गीत संगीत बजाउनुका साथै विभिन्न सरकारी अधिकारीहरुले राष्ट्रवादी भाषण गरेका थिए ।

चिनियाँ कम्युनिस्ट पार्टी १९२१ को जुलाइमा सांघाइस्थित एउटा सानो इटाको फ्रेन्च सुविधा घरमा एक दर्जन जति प्रतिनिधिहरुले गोप्य रुपमा स्थापना गरेका थिए । लामो गृहयुद्धपछि कम्युनिस्ट पार्टी ७२ वर्षअघि सत्तामा पुगेको थियो। त्यसबेला देशमा व्यापक परिवर्तन भए ।

यद्यपि कम्युनिस्ट पार्टीको संस्थापक तथा पूर्व अध्यक्ष माओ त्सेतुङको शासनकालमा चीन ठूलो भोकमरी, गरिबी र राजनीतिक संकटको सामना गरिरहेको थियो । यस क्रममा लाखौँ मान्छे मारिएका थिए । जुन घटनालाई लिएर चीनको आलोचना हुने गरेको छ ।

वर्तमान विश्व समुदायमा चीन दोस्रो ठूलो अर्थतन्त्र भएको देशको रुपमा स्थापित भएको छ । र यसको तिब्र आर्थिक विकासले गर्दा ठूलो अर्थतन्त्र भएको अमेरिकालाई पनि निकट भविष्यमा उछिन्ने विश्लेषण हुने गर्छ ।

पछिल्ला वर्षमा चीनमा कैयौँ ठूलो स्तरका कार्यक्रमहरू हुँदै आएका छन् र हालैका साताहरूमा पार्टीले स्वीकारेको चीनको इतिहासबारे सञ्चारमाध्यममा कार्यक्रमहरूलाई प्राथमिकतासाथ स्थान दिइएको छ।