भारतमा कोरोनाबाट ४ लाखको मृत्यु: तर तथ्यांक भन्दा धेरै भएको दावी

नयाँदिल्ली: भारतमा कोरोना भाइरसका कारण मृत्यु हुनेको संख्या ४ लाख नाघिसकेको छ ।

तीमध्ये २ लाखको दोस्रो लहरको क्रममा केही महिनाअघि मात्रै मृत्यु भएको हो । हालसम्म भारतमा ३ करोड भन्दा धेरै कोरोनाबाट संक्रमित भइसकेका छन् ।

भारतमा कोरोना महामारी यसै वर्षको सुरुदेखि तिब्र रुपमा फैलिएको थियो । यससँगै भारत कोरोनाबाट अमेरिकापछि दोस्रो धेरै प्रभावित हुने देशको सूचीमा परेको छ । अमेरिकामा भने संक्रमितको संख्या ३ करोड ३० लाख पुगेको छ । साथै मृत्यु हुनेको संख्या ६ लाख ४ हजार पुगेको छ ।

यस्तै ब्राजिलमा भने कोरोनाबाट ५ लाख १८ हजारको मृत्यु भएको छ । यस क्रममा भारत दोस्रो ठूलो प्रभावित देश बनेको छ । जहाँ हाल प्रत्येक २४ घण्टामा ८५३ जनाको मृत्यु भएको छ । यसरी पछिल्लो ३९ दिनमा १ लाखको मृत्यु भयो ।

'तथ्यांक भन्दा मृतकको संख्या बढी छ'

तर स्वास्थ्य विज्ञहरुले भने भारतमा कोरोनाबाट मृत्यु हुनेको संख्या पूरा नआएको हुनसक्ने बताइरहेका छन् । सरकारले दिएको तथ्यांकमा पूरा मृतकको संख्या नसमेटिएको उनीहरुको भनाइ छ ।

गत मे महिनामा उत्तर भारतको विशाल नदी गंगा किनारमा मात्रै कोरोनाबाट मृत्यु भएका सयौँ शव एकै पटक सेलाइँदै थियो । मानिसहरु हरेक दिन मृत्यु र दाहसंस्कारको सामना गरिरहेका थिए ।

यतिसम्म कि देशभर त्यस्ता कैयौँ मृत्युको रेकर्ड नै नराखिएको विज्ञहरुको भनाइ छ । यसैले पनि कतिजनाको मृत्यु भयो भन्ने यकिन आइनसकेको उनीहरु बताउँछन् ।

पश्चिमी सहर कोचीस्थित राजागिरी कलेज अफ सोसल साइन्सका प्राध्यापक रीजो एम जोनका अनुसार उत्तर भारतमा यस्ता थुप्रै मृत्युको रेकर्ड राख्न सकिएको थिएन ।

भारतको गरिब राज्यमध्येको एक बिहारमा गत महिना कोभिडका कारण मृत्यु हुनेको गलत तथ्यांक दिइएकोमा मुद्दा परेकोमा स्थानीय अदालतको फैसलासँगै ५,४२४ मृतक संख्याबाट संशोधन गरी ९,४२९ बनाइएको थियो ।

भारत सरकारको तथ्यांक अनुसार अप्रिलको अन्त्यसम्म २ लाख को मृत्यु भएको बताइएको थियो । तर ३ लाख मृतक संख्या पुग्नका लागि जम्मा २८ दिन लाग्यो ।

दोस्रो लहरको क्रममा भारतीय सहरका कतिपय अस्पतालमा अक्सिजन र बेडको अभावमा बिरामीहरुको अस्पताल बाहिर समेत मृत्यु भएको अन्तर्राष्ट्रिय मिडियाले जनाएका छन् । यद्यपि पार्क र अन्य सार्वजनिक स्थलमा समेत संक्रमितहरुको मृत्यु भएको बताइएको थियो ।