मनिला: फिलिपिन्समा आइतबार सैनिक विमान दुर्घटना हुँदा मृत्यु हुनेको संख्या ४५ पुगेको छ । देशको दक्षिणी क्षेत्र सुलु प्रान्तको जोलो टापुस्थित विमान दुर्घटना भएको हो ।
दुर्घटनामा केही दर्जन यात्रु घाइते छन् । हालै तालिम प्राप्त सैनिक फौजसहित झण्डै १०० जना यात्रु बोकेको सी-१३० हर्कुलस ट्रान्सपोर्ट विमान विमानस्थलमा अवतरण गर्ने क्रममा दुर्घटनामा परेको हो । दुर्घटनामा मृत्यु हुने अधिकांश नयाँ तालिम प्राप्त सिपाही छन् ।
मेजर जनरल विलियम गोन्जालेजका अनुसार यात्रुमध्ये केही सिपाहीहरु विमान दुर्घटना हुँदै गर्दा पड्किनुअघि जमिनमा हामफाल्दै गरेका देखिएका थिए । यस घटनालाई देशकै सबैभन्दा घातक सैन्य उड्डयनमध्ये एक ठानिएको छ ।
दुर्घटनामा १७ जना यात्रु अझै वेपत्ता भएकाले उनीहरुको खोजी कार्य भइरहेको बताइएको छ । दुर्घटनाग्रस्त विमानका केही भाग रुखहरुबीच जलिरहेको अवस्थामा देखिन्छ ।
विमान दुर्घटना भएपछि त्यहाँबाट धुवाँको मुस्लो उडिरहेको दृश्य स्थानीय मिडियाले सार्वजनिक गरेका छन् । चार इन्जिन भएको उक्त विमान पातलो मानव बस्ती भएको क्षेत्र नजिकै खसेको थियो ।
फिलिपिन्सको वायु सेनाका प्रवक्ता लेफ्टिनेन्ट कर्नेल म्यानर्ड मारिआनोले विमान दुर्घटनाको कारणबारे अनुसन्धान गरिने बताएका छन् । जवकि सशस्त्र बलका प्रवक्ता मेजर जनरल एडगार्ड एरेभालोले भने यो एक आक्रमण नभएर दुर्घटना नै भएको प्रतिक्रिया दिएका छन् । अधिकांश यात्रुहरु भर्खरै तालिम सम्पन्न गरेका सैनिक थिए । र उनीहरु मुस्लिम वाहुल्य क्षेत्रमा आतंकवादीविरुद्ध दस्ताको रुपमा खटाइएका थिए ।
प्रतिक्रिया दिनुहोस !
