हाइटीका राष्ट्रपतिको हत्या
असार २४, २०७८ बिहीबार ११:५६:०
मेक्सिको सिटी : अपरिचित बन्दुकधारीले गोली हानी हाइटीका राष्ट्रपति जोभेनेल मोइजको हत्या गरेको छ । राजधानी पोर्ट–ओ–प्रिन्सस्थित निजी निवासमा भएको घटनामा मोइजकी श्रीमती घाइते भएको जनाइएको छ ।
अन्तरिम प्रधानमन्त्री क्लाउड जोसेफले बुधबार विज्ञप्तिमार्फत राष्ट्रपति मोइजको हत्या भएको पुष्टि गरेका छन् । मोइजले सन् २०१८ मा हुने व्यवस्थापिका निर्वाचन ढिलाइ भएपछि राष्ट्रपतिको विशेषाधिकार प्रयोग गर्दै विभिन्न निर्देशनमार्फत सबैभन्दा गरिब अफ्रिकी मुलुक हाइटीमा शासन गर्दै आएका थिए ।
उनको कार्यकाल सकिनै लाग्दा विवादहरू चुलिँदै गएका थिए । यसमा उनलाई पनि दोषी मानिँदै आएको थियो ।
अप्रिलमा हुनुपर्ने गरी तोकिएको हाइटीको संवैधानिक जनमत संग्रह कोभिड–१९ महामारीका कारण स्थगित छ । राष्ट्रिय निर्वाचन आयोगले जनमत संग्रहलाई सेप्टेम्बर २६ मा गर्ने घोषणा यसै वर्षको जुन २६ मा गरेको थियो ।
- सिन्ह्वा/बीबीसी