भक्तपुर : भक्तपुरका ६१ हजार ८०० जनाले कोरोना भाइरसविरुद्धको खोपको पूर्ण मात्रा लिएका छन् । भक्तपुरमा दुई चरणमा सम्पन्न खोप कार्यक्रममा भक्तपुरका उक्त संख्याले चीन सरकारले सहयोग गरेको भेरोसेल खोपको दोस्रो मात्रा लगाएका हुन् ।
स्वास्थ्य कार्यालय भक्तपुरका दोस्रो मात्रा खोप लिने ६० देखि ६४ वर्ष उमेर समूहका १३ हजार ७७८ जना थपिएसँगै यहाँ भेरोसेल खोपको दोस्रो मात्रा लिने संख्या ६१ हजार ८०० पुगेको हो । यसअघि १८ वर्षमाथिका ४८ हजार २२ जनाले भेरोसेल खोपको पूरा मात्रा लिएका थिए ।
भक्तपुरमा ६० देखि ६४ वर्ष उमेर समूहको खोप कार्यक्रमअन्तर्गत असार २२ गते ७ हजार ५९९ जना र २३ गते ६ हजार १७९ जनाले खोप लगाएका छन् ।
उनका अनुसार भक्तपुरमा ७ हजार १४० जना महिला र ६ हजार ६३८ जना पुरुषले भेरोसेल खोपको दोस्रो मात्रा लगाएका छन् । यहाँका ४ नपामध्ये सबैभन्दा बढी सूर्यविनायक नपामा ५ हजार ५५ जनाले दोस्रो मात्रा लगाए । यहाँ २ हजार ७३० जना महिला र २ हजार ३२५ जना पुरुषले दोस्रो मात्रा लगाएको प्रमुख मिजारले बताए ।
मध्यपुर थिमि नपामा २ हजार ९४ जना महिला र २ हजार ४४ जना पुरुष गरी ४ हजार १३८ जनाले खोप लगाउँदा भक्तपुर नपाका एकहजार २१७ महिला र एकहजार १०९ जना पुरुष गरी २ हजार ३२६ तथा चाँगुनारायण नपाका एकहजार १६० जना पुरुष र एकहजार ९९ जना महिला गरी २ हजार २५९ जनाले खोप लगाएका छन् ।
स्वास्थ्य कार्यालयका अनुसार पहिलो मात्रा लिनेभन्दा भक्तपुरमा ३ हजार ७३५ बढीले दोस्रो मात्रा लिएका छन् । गएको जेठ २५ र २६ गते गरी दुईदिन सञ्चालन भएको खोप कार्यक्रममा भक्तपुरमा १० हजार ४३ जनाले मात्रै पहिलो मात्रा लिएका थिए । तर त्यसको एकमहिनापछि भएको दोस्रो चरणको खोप कार्यक्रममा ३ हजार ७३५ जना बढीले दोस्रो मात्रा लिएको कार्यालय प्रमुख मिजार बताउँछन् ।
उनले पहिलो मात्रा भक्तपुर बाहिर लिएका उक्त संख्याले दोस्रो मात्रा भने भक्तपुरमा लिएकाले संख्या बढेको सुनाए । सरकारले खोपको पहिलो मात्रा जहाँसुकै लिएको भए पनि दोस्रो मात्रा आफूलाई पायक पर्ने ठाउँबाट लिनसक्ने व्यवस्था गरेकाले भक्तपुरमा दोस्रो मात्रा लिनेको संखया बढेको स्वास्थ्य कार्यालय प्रमुख मिजारको स्पष्टोक्ति थियो ।
भक्तपुरका ४ नपाले ३८ वटा वडामा खोप केन्द्र निर्धारण गरेर दुईदिन खोप दिएका थिए । जसमध्ये भक्तपुर र सूर्यविनायकले १०–१० र मध्यपुर तथा चाँगुनारायण नपाले ९–९ वटा वडामार्फत खोप दिएका थिए ।
भक्तपुरबाट कोभिड १९ विरुद्ध अग्रपंक्तिमा रहेर काम गर्ने चिकित्सक तथा स्वास्थ्यकर्मी, सुरक्षाकर्मी, सञ्चारकर्मी, सरकारी कर्मचारी, बैंक तथा वित्तीय संस्था र नेपाल विद्युत प्राधिकरण तथा नेपाल टेलिकमका कर्मचारी गरी ५ हजार ५७५ जनाले कोभिशिल्ड खोपको पूरा मात्रा लगाइसकेका छन् ।
तर कोभिशिल्ड खोपकै पहिलो मात्रा लिएका ७४ वर्ष माथिका ५ हजार ८२७ भक्तपुरवासीले दोस्रो मात्रा लगाउन पाएका छैनन् ।भक्तपुरमा हालसम्म २२ हजार २५५ जनामा कोरोना भाइरस संक्रमण पुष्टि भइसकेको छ । जसमा २१ हजार ४८६ जना डिस्चार्ज हुँदा १९४ पुरुष र १०५ महिला गरी २९९ जना संक्रमितको मृत्यु भइसकेको छ । भक्तपुरमा अझै ४७० जना सक्रिय संक्रमित छन् ।
प्रतिक्रिया दिनुहोस !
