मुम्बई : बलिउड अभिनेत्री इशा देओल वेव सिरिज ‘रुद्र’ मा काम गर्ने भएकी छन्। पछिल्लो समय चलचित्र क्षेत्रमा गुमनामजस्तै बनेकी इशा रुद्रमार्फत अभिनयमा कमब्याक गर्न लागेकी हुन्। भरत तख्तानीसँग सन् २०१२ मा वैवाहिक बन्धनमा बाँधिएपछि अभिनेत्री इशा बलिउडबाट टाढिएकी थिइन्।
लामो वर्षको अन्तरालपछि उनी ‘रुद्र’मार्फत अभिनयमा फर्किन लागेकी हुन्। इशा उक्त सिरिजमा अभिनेता अजय देवगणको जोडीका रुपमा प्रस्तुत हुने छिन्। इशाले आफू अभिनयमा फर्किन लागेको सामाजिक सञ्जालबाट आफ्ना प्रशंसकलाई जानकारी दिएकी छन्। ‘रुद्र मेरो डेब्यु वेव सिरिज हो। यो सिरिजमा कलाकार अजय देवगणसँग म काम गर्दैछु। अजय र मैले केही चलचित्रमा एकसाथ काम गरेका छौं’, उनले ट्विटरमा लेखेकी छन्। अजय र इशाले विभिन्न हिन्दी चलचित्रमा सँगै काम गरेका छन्। उनीहरूले युवा, एलओसी : कारगिल, क्यासलगायतका चलचित्रमा काम गरेका छन्।
चर्चित अभिनेता धमेन्द्र र अभिनेत्री हेमा मालिनीकी छोरी इशाले बलिउडमा रहँदा राम्रो छवि बनाउन सकेकी थिइनन्। यसकारण पनि उनलाई पछिल्लो समय दर्शकले भुलिसकेको भारतीय सञ्चारमाध्यमले जनाएका छन्। यस सिरिजमा अजय र इशासँगै अन्य विभिन्न चर्चित कलाकारको पनि अभिनय रहने निर्माण पक्षले जनाइएको छ।
प्रतिक्रिया दिनुहोस !
