भारतमा चट्याङ लागेर ११ जनाको मृत्यु
भारतको जयपुर सहरमा चट्याङका कारण कम्तीमा ११ जनाको मृत्यु भएको छ। आइतवारको घटनामा धेरै जना घाइते भएका छन्। पीडितहरूले १२औँ शताब्दीमा बनाइएको प्रख्यात पर्यटकीय स्थल आमेर किल्लामा सेल्फी खिचिरहेका बेला घटना भएको बताइएको छ। त्यस बेला किल्ला र आसपासका स्थानमा २७ जना रहेको र तीमध्ये केहीले भुइँमा हाम फालेको बताइएको छ ।
सन् २००४ यता भारतमा चट्याङका कारण दुई हजार भन्दा बढीको मृत्यु भएको छ। एक जना वरिष्ठ प्रहरी अधिकारीले बताए अनुसार किल्ला पर्यटकहरू माझ चर्चित छ। उनका अनुसार मृत्यु हुनेमा अधिकांश युवाहरू छन्।
राजस्थानका विभिन्न स्थानमा आइतवार नै चट्याङका कारण थप नौ जनाको मृत्यु भएको स्थानीय सञ्चार माध्यमहरूले जनाएका छन्। राजस्थानका मुख्यमन्त्री अशोक गहलौतले मृत्यु हुनेहरूका परिवारलाई क्षतिपूर्ति बापत पाँच लाख रूपैयाँ दिने घोषणा गरेका छन्।
भारतको उत्तर प्रदेश राज्यमा पनि चट्याङ लागेर २८ जनाको मृत्यु भएको बीबीसी हिन्दीले जनाएको छ। तीमध्ये १३ जनाको मृत्यु प्रयागराज भनिने स्थानमा भएको बताइएको छ।
तीव्र वर्षा हुने भारतको मनसुन सामान्यता जून महिनादेखि सेप्टेम्बर महिनासम्म कायम रहन्छ।
भारतको मौसम सम्बन्धी विषय हेर्ने निकाय इन्डिएन मेटेरोलोजिकल डिपार्टमेन्टले जलवायु सङ्कट लगायतका विषयका कारण सन् १९६० यता भारतमा चट्याङका कारण ज्यान गुमाउनेहरूको सङ्ख्या दोबर भएको जनाएको छ ।