भारतमा कोरोना भाइरसबाट नयाँ ३८ हजार ७९२ जना संक्रमित भएका छन् । संघीय स्वास्थ्य तथा परिवार कल्याण मन्त्रालयले बुधबार दिएको जानकारी अनुसार अघिल्लो दिनभन्दा दैनिक संक्रमितको संख्या फेरि बढेको हो । अघिल्लो दिन ३१ हजार ४४३ जना नयाँ संक्रमित थपिएका थिए ।
भारतमा अहिलेसम्म भाइरसबाट मृत्यु भएकाहरुको कुल संख्या चार लाख ११ हजार ४०८ पुगेको मन्त्रालयले जनाएको छ । त्यसैगरी कोरोना भाइरसबाट संक्रमित भएर पनि अहिले थप ४१ हजार जना संक्रमणमुक्त भएका छन् । नयाँ संक्रमितभन्दा संक्रमणमुक्त भएकाहरुको संख्या धेरै रहेकाले संक्रमित अवस्थामै रहेकाहरुको कुल संख्यापनि कम भएको छ ।
भारतमा अहिले पनि कोरोना भाइरसबाट संक्रमित अवस्थामै रहेकाहरुको संख्या चार लाख २९ हजार ९४६ रहेको अधिकारीहरुले जनाएका छन् । पछिल्लो एक दिनमा कोरोना भाइरसका कारण थप ६२४ जनाको मृत्यु भएको पनि मन्त्रालयले बुधबार जानकारी दिएको छ ।
भारतमा अहिलेसम्म कुल संक्रमितहरुको संख्या तीन करोड नौ लाख ४६ हजार ७४ पुगेको छ भने ती मध्ये तीन करोड एक लाख चार हजार ७२० जना संक्रमणमुक्त भएका छन् । कोरोना भारतको चिकित्सा अनुसन्धान परिषद्ले अहिलेसम्म कुल ४३ करोड ५९ लाख ७३ हजार ६३९ जनाको स्वाब परीक्षण गरिएको छ । ती मध्ये १९ लाख १५ हजार ५०१ जनाको स्वाब परीक्षण जुलाई १३ का दिन भएको छ ।
भारतमा अहिलेसम्म ३८ करोड ७६ लाख ९७ हजार ९३५ ओटा कोरोना भाइरसविरुद्धको खोप प्रयोग भएको छ । ती मध्ये ३७ लाख १४ हजार ४४१ जनालाई पछिल्लो २४ घण्टामा खोप लगाइएको छ ।
प्रतिक्रिया दिनुहोस !
