भक्तपुर : भक्तपुरको कूल जनसंख्याको २५ प्रतिशतले कोरोना भाइरसविरुद्धको खोप पाएका छन् । स्वास्थ्य कार्यालय भक्तपुरले भक्तपुरको कूल जनसंख्या ३ लाख ७४ हजार २१५ मध्ये २५ प्रतिशत अर्थात ९५ हजार ३३४ जनाले कोरोना भाइरसविरुद्धको खोप पाएका हुन् ।
कार्यालयका प्रमुख कृष्ण मिजारले कोरोना भाइरसविरुद्धको खोप पाएकामध्ये ७३ प्रतिशतले पूर्ण र २७ प्रतिशतले पहिलो मात्रा पाएको जानकारी दिए ।उनले १८ वर्षमाथिका जनसंख्यालाई मात्रै आधार मान्ने हो भने भक्तपुरमा करिब ३८ प्रतिशतले कोरोनाको खोप पाएको उनले स्पष्ट पारे । भक्तपुरमा कोरोना संक्रमण भने कूल जनसंख्याको ६ प्रतिशतलाई मात्रै भएको छ ।
विश्व स्वास्थ्य संगठनले अहिलेसम्म १८ वर्षमुनिका बालबालिकाको लागि कोरोनाको खोप लगाउन भनेको छैन । त्यसैले १८ वर्षमाथि जनसंख्यालाई आधार मान्ने भए भक्तपुरमै राष्ट्रिय तथ्यांकभन्दा बढी जनसंख्याले कोरोनाको खोप पाएको उनको भनाइ छ ।
भक्तपुरमा १८ वर्षमाथिका जनसंख्या २ लाख ५१ हजार ७७२ जना रहेका छन् । भक्तपुरमा कोरोना खोप लगाउने लक्षित जनसंख्या नै यही भएको प्रमुख मिजार बताउँछन् ।
उनका अनुसार भक्तपुरका ६७ हजार ३७५ जनाले पूर्ण खोप पाएका छन् । जसमध्ये ६१ हजार ८०० ले चिनियाँ कम्पनीको भेरोसेल खोप लगाएका छन् । ५ हजार ५७५ जनाले मात्रै भारतीय कम्पनीको कोभिशिल्ड खोप लगाए ।
‘२५ हजार ५८३ जनाले पहिलो मात्रा लगाएका छन्’, प्रमुख मिजारले भने, ‘यसमध्ये १९ हजार ७५६ जनाले भेरोसेल र ५ हजार ८२७ ले कोभिशिल्ड लगाएका छन् ।’
भेरोसेल खोप लगाएकाहरुलाई एक महिनापछि दोस्रो मात्रा दिइँदै छ तर कोभिशिल्डको पहिलो मात्रा लगाएका ज्येष्ठ नागरिकहरुले कहिले दोस्रो मात्रा पाउँछन् अहिलेसम्म ठेगान छैन ।
कार्यालयका अनुसार यो संख्या असार मसान्तसम्मको हो । भक्तपुरमा मंगलबार र बुधबार संयुक्त राज्य अमेरिकाले सहयोगस्वरुप दिएको जोन्सन खोप लगाइँदै छ । दुई दिनभित्र भक्तपुरका थप करिब २० हजार जनालाई उक्त खोप दिने लक्ष्य राखिएको छ । यो खोप एक डोजमात्रै लगाए पुग्छ । जबकि भेरोसेल र कोभिशल्डि दुईदुई डोज लगाउनुपर्छ ।
भक्तपुरका ४ नपामध्ये सबैभन्दा भक्तपुर नपाका करिब ३३ प्रतिशतले कोरोना खोप लगाएका छन् । एक लाख २ हजार ५३२ जनसंख्या रहेको भक्तपुर नपाका ३३ हजार ५०९ जनाले कोरोना खोप लिएका छन् ।
‘१८ वर्षमाथिको जनसंख्याको हिसाबले भक्तपुर नपाका करिब ४९ प्रतिशतले कोरोना खोप पाएका छन्’, प्रमुख मिजारले भने, ‘यहाँका ३१ हजार ७२ ले भेरोसेल खोप लगाउँदा २ हजार ४३७ जनाले कोभिशिल्ड लगाएका छन् ।’
भक्तपुरपछि सूर्यविनायक नपाका ३१ प्रतिशत जनसंख्याले कोरोना खोप पाएका छन् । १८ वर्षमाथिका जनसंख्याको भने ४६ प्रतिशतले खोप लगाएका छन् ।
९६ हजार ९१६ जनसंख्या रहेको सूर्यविनायकमा १८ वर्षमाथिका मात्रै ६५ हजार २०५ जना रहेका छन् । जसमध्ये २९ हजार ७२२ जनाले कोरोना खोप पाएको स्वास्थ्य कार्यालयले जनाएको छ । यहाँका २४ हजार १०४ जनाले भेरोसेल खोप पाउँदा ५ हजार ६१८ जनाले कोभिशिल्ड खोप लिएको कार्यालय प्रमुख मिजार बताउँछन् ।
त्यस्तै चाँगुनारायण नपाका २५ प्रतिशत अर्थात १७ हजार ८५२ जनाले कोरोना खोप पाएका छन् । जुन १८ वर्षमाथिका जनसंख्याको ३७ प्रतिशत हो । यहाँ ७१ हजार ६३९ जनसंख्या रहेका छन् । जसमध्ये १८ वर्षमाथिका ४८ हजार १९९ रहेका छन् । चाँगुनारायण नपाका १५ हजार २०४ जनाले भेरोसेल र २ हजार ६४८ जनाले कोभिशिल्ड लगाएका छन् ।
भक्तपुरका ४ नपामध्ये मध्यपुर थिमि नपाका करिब २१ प्रतिशत जनसंख्याले खोप पाएका छन् । जुन सबैभन्दा कम हो । तर जनसंख्यामा मध्यपुर थिमि सबैभन्दा ठूलो नगरपालिका हो । एक लाख ३ हजार १२८ जनसंख्या रहेको मध्यपुर थिमि नपाका २१ हजार २२१ जनाले मात्रै खोप पाएका स्वास्थ्य कार्यालयले जनाएको छ । जुन १८ वर्षभन्दा माथिका जनसंख्याको करिब ३१ प्रतिशत हो । यहाँ १८ वर्षमाथिको जनसंख्या ६५ हजार ३८५ जना रहेको छ ।
कार्यालयका अनुसार मध्यपुर थिमि नपाका १८ हजार १४६ जनाले भेरोसेल लगाउँदा ३ हजार ७५ जनाले कोभिशिल्ड लगाएका छन् ।भक्तपुरका ४ नपामध्ये सबैभन्दा बढी मध्यपुर थिमि नपामा कोरोना भाइरस संक्रमण भएको छ । यहाँ जिल्लाका ३४ प्रतिशत संक्रमित रहेका छन् ।
असार मसान्तसम्म भक्तपुरमा २२ हजार ७४३ जनामा संक्रमण पुष्टि हुँदा मध्यपुर थिमिका मात्रै ७ हजार ६९३ जना रहेका छन् । जसमध्ये ७ हजार ४४५ जना डिस्चार्ज हुँदा ६६ जना पुरुष र ३० जना महिला गरी ९६ जनाको मृत्यु भएको छ । मध्यपुर थिमिमा कोरोनाको मृत्युदर पनि बढी रहेको स्वास्थ्य कार्यालयको तथ्यांकले देखाउँछ ।
सूर्यविनायक नपाका ७ हजार १७४ जनालाई संक्रमण हुँदा ६ हजार ८९२ जना डिस्चार्ज भएका छन् । यहाँका ५२ पुरुष र ३९ महिला गरी ८२ जना संक्रमितको मृत्यु भएको छ ।
त्यस्तै भक्तपुर नपाका ४ हजार १२७ जनामा संक्रमण पुष्टि भएको छ । यहाँका ३ हजार ९५५ जना डिस्चार्ज हुँदा ४८ पुरुष र ३१ महिला गरी ७९ जना संक्रमितको मृत्यु भएको छ । चाँगुनारायण नपाका २ हजार ६४३ जनालाई कोरोना संक्रमण पुष्टि हुँदा २ हजार ४६८ जना डिस्चार्ज भए । यहाँका २९ पुरुष र १५ महिला गरी ४४ जना संक्रमितले ज्यान गुमाएका छन् ।
प्रतिक्रिया दिनुहोस !
