अमेरिकी सांसद मार्जोरी टेलरले कोभिडबारे गलत सूचना फैलाएपछि ट्वीटरबाट प्रतिबन्ध

वासिङटन: अमेरिकामा रिपब्लिकन सांसद मार्जोरी टेलर ग्रीनलाई ट्वीटरले अस्थायी रुपमा प्रतिबन्ध लगाएको जनाएको छ ।

ग्रीनको ट्वीटर एकाउन्टले सामाजिक सञ्जालमा कोभिड १९ बारे गलत सूचना फैलाएको भन्दै ट्वीटरले उनको एकाउन्ट बन्द गरिदिएको हो । ग्रीनको ट्वीटर एकाउन्टले सामाजिक सञ्जालको सूचना नीति उल्लंघन गरेको पनि बताइएको छ ।

ग्रीनले हालै ६५ वर्षमुनिका दुब्ला मानिसहरु कोभिड १९ बाट खतरामा नरहेको भन्दै विना प्रमाण ट्वीटरमा सूचना प्रवाह गरेकी थिइन् । उनको यस्तो तर्कको स्वास्थ्यविदहरुबाट कुनै आधार समेत पेश भएको छैन ।

साथै मास्क लगाउन बाध्यकारी गर्न नहुने पनि उनको राय थियो । तर ग्रीनको यस्तो ट्वीटलाई 'भ्रामक' भन्दै ट्वीटरले वर्गिकृत गरेको छ ।

अमेरिकी सरकारले फाइजर, मोडेर्ना र जोन्सनका खोप वितरण गर्दैआएको छ । यीमध्ये कुनै पनि खोप पूर्ण रुपमा अनुमोदित छैनन् । तर विभिन्न अध्ययनले यीनको प्रभावकारिता प्रमाणित गरिसकेका छन् । अमेरिकी राष्ट्रपति जो बाइडेनले भने खोपबारे गलत सूचना प्रवाह गर्नेहरुविरुद्ध कारवाही गर्न सामाजिक सञ्जाल कम्पनीहरुलाई आग्रह गरेका छन् ।

"ट्वीटरको नियम उल्लंघन गरेको, विशेषगरी कोभिड १९ को गलत सूचना प्रवाह नीति उल्लंघन गरेकोमा हामीले ग्रीनको एकाउन्टमाथि कारवाही गरेका छौँ," ट्वीटरका प्रवक्ताले इमेल मार्फत मिडियाहरुलाई विज्ञप्ति जारी गरेका छन् । ट्वीटरको उक्त विज्ञप्ति अनुसार ग्रीनको एकाउन्ट १२ घण्टासम्म बन्द नै गरिनेछ ।

रिपब्लिकन सांसद ग्रीनले पनि फेसबुक लाइभ मार्फत उनको ट्वीटर अस्थायी रुपमा प्रतिबन्धमा परेको जानकारी दिएकी थिइन् । साथै बाइडेन प्रशासनलाई वाक स्वतन्त्रमा नियन्त्रण गरेको आरोप समेत उनले लगाएकी छन् । गत जनवरीमा पनि ग्रीनले चुनावमा धाँधली गरेको आरोप लगाउँदै अफवाह पैलाएपछि ट्वीटरले उनको एकाउन्टमा प्रतिबन्ध लगाएको थियो ।