बागलुङ: बागलुङको तमानखोलामा लुकाइराखेको अवस्थामा प्रहरीले २२ नाल भरुवा बन्दुक फेला पारेको छ ।
आइतबार दिउँसो प्रहरी चौकी बुङ्गादोभानबाट खटिएको प्रहरीको गस्ती टोलीले २२ नाल भरुवा बन्दुक ओढारमा लुकाइराखेको अवस्थामा फेला पारेको हो ।
तमानखोला गाउँपालिका–४ लामेलास्थित घट्टेखोला नजिकै रहेको ओढारमा १ नाले भरुवा बन्दुक १२ नाल र तमानखोला–३ मार्के खोलाको ओढारमा १ नाले १० नाल बन्दुक फेला परेको जिल्ला प्रहरी कार्यालय बागलुङका सूचना अधिकारी तथा प्रहरी नायव उपरीक्षक इकवाल हवारीले जानकारी दिए ।
ओढारबाट बरामद गरिएको बन्दुक इलाका प्रहरी कार्यालय बुंगादोभान ल्याएर राखिएको छ । प्रहरीले अवैध भरुवा बन्दुक सहित पक्राउ र कारवाही गर्ने क्रम तिब्र बनाउन थालेपछि स्थानीयले डराएर ओढारमा लुकाएर राखेको हुनसक्ने हवारीले बताए । बन्दुकको कसले राखेको भन्ने खुलेको छैन । यसका बारेमा थप अनुसन्धान भइरहेको हवारीको भनाइ छ ।
प्रतिक्रिया दिनुहोस !
