दैलेखः लोपोन्मुख राउटे समुदायलाई राहत वितरण गरिएको छ । हाल कर्णालीको कालिमाटी गाउँपालिका–५ सल्यानमा बसोबास गरिहेका उनीहरुलाई कर्णाली प्रदेश सरकार, सामाजिक विकास मन्त्रालय, गुराँस गाउँपालिका, सोसेक नेपाल र राकेश इन्टरप्राइजेज काठमाडौंको सहयोग र समन्वयमा राहत सामग्री उपलब्ध गराइएको हो ।
उनीहरु बसोबास गरिरहेको बस्तीमै पुगेर शनिबार खाद्यान्न र पाल सहयोग गरिएको हो । कर्णाली प्रदेशसभाका उप–सभामुख पुष्पा घर्ती (बिष्ट), आन्तरिक मामिला तथा कानून मन्त्री सीता कुमारी नेपाली, सोसेक नेपालका संस्थापक अध्यक्ष हीरासिंह थापा, पूर्वअध्यक्ष सीता राना सहितको टोलीले राउटे बस्तीमै पुगेर खाद्यान्न र पाल सहयोग गरेको हो ।
राकेश इन्टरप्राइजेज काठमाडौंको सहयोग र सोसेक नेपालको समन्वयमा १ लाख २ हजार बराबरको खाद्यान्नहरु चामल, नुन, दाल, खुर्सानी तथा तरकारीमा मुला उनीहरुलाई वितरण गरिएको थियो । ४४ घरपरिवार रहेको राउटे बस्तीमा प्रतिपरिवार एक बोरो चामल दिइएको थियो । जंगलमा फिरन्ते जीवन बिताउँदै आएका राउटे नागरिकलाई खाद्यान्न सहयोग गरेको राकेश इन्टरप्राइजेज काठमाडौंका राकेश जैनले बताए ।
‘सोसेक नेपालको पहलमा जंगलहरुमा कठिनाइपूर्ण जीवन बिताउँदै आएको राउटेलाई खाद्यान्न उपलब्ध गराएका हौँ,’ जैनले भने ‘लोपोन्मुख नागरिकलाई सहयोग गर्न पाउँदा खुसी लागेको छ ।
यसैबीच कर्णाली प्रदेश सरकार, सामाजिक विकास मन्त्रालयले पाल सहयोग गरेको छ । राउटे समुदायका ४४ घरपरिवारलाई प्रतिपरिवार एक वटा पाल सहयोग गरिएको हो । राउटे समुदायले आफ्नो परम्परा अनुसार बनाउने घरमा प्रयोग हुने कपडाको पाल प्रदान गरिएको हो ।
सोही अवसरमा कर्णाली प्रदेश सरकारकार आन्तरिक मामिला तथा कानून मन्त्री सीता कुमारी नेपालीले कर्णाली प्रदेशभित्र फिरन्ते जीवनयापन गर्दै आएको राउटे समुदायको संरक्षण सम्बर्द्धनमा प्रदेश सरकार लागि परेको बताइन् । उनले राउटे समुदायको संरक्षण र सुरक्षाका लागि नीति निर्माणको क्रममा रहेको मन्त्री नेपालीको भनाइ छ । ‘मदिरा सेवनले राउटेको स्वास्थ्यमा गम्भीर असर गरिरहेको बताउँदै मन्त्री नेपालीले भनिन् ‘राउटे समुदायमा अत्याधिक मदिरा सेवनलाई नरोक्ने हो भने राउटे समुदाय नै लोप हुने खतरा छ ।’
राउटे समुदायमा सोसेक नेपालले अहेव र जोडी शिक्षक परिचालन गरिरहेको छ । राउटे परियोजना अन्तर्गत राउटे नागरिकहरुको उपचारका लागि अहेव र राउटे नागरिकहरुको स्वास्थ्य तथा सरसफाई, बालबालिकाको शिक्षामा जोड दिन जोडी शिक्षकलाई बस्तीमै परिचालन गरेको संस्थापक अध्यक्ष हीरासिंह थापाले बताए । कर्णाली प्रदेशका विभिन्न जिल्लामा घुमन्ते जीवनयापन गरिरहेका राउटे नागरिक गुराँस गाउँपालिकाको स्थायी बासिन्दा हुन् । समुदायको ४४ परिवारमा १ सय ४२ जनसंख्या छ ।
राउटे समुदायका नागरिकहरुलाई खाद्यान्न सहयोग गरिँदै ।
प्रतिक्रिया दिनुहोस !
