कांग्रेस नेता सिंहको गुनासो: नेता र जनप्रतिनिधिलाई गालीमात्रै गरियो

भक्तपुर: नेपाली कांग्रेसका केन्द्रीय सदस्य प्रकाशमान सिंहले जनताले नेता तथा जनप्रतिनिधिहरुलाई गालीमात्रै गर्ने गरेको भन्दै असन्तुष्टि व्यक्त गरेका छन् ।

भक्तपुरको मध्यपुर थिमि नगरपालिका ३ नम्बर वडाको नवनिर्मित भवन बुधबार उद्घाटन गर्दै उनले जनताको पनि दायित्व र जिम्मेवारी हुने औंल्याए । ‘हामीकहाँ जनताले नेता र जनप्रतिनिधिलाई गालीमात्रै गर्ने परम्परा विकास भयो’, पूर्वउपप्रधानमन्त्रीसमेत रहेका नेता सिंहले भने, ‘त्यसो भए जनताको चै आफ्नो कुनै दायित्व र जिम्मेवारी हुँदैन ?’

उनले सरकार र स्थानीय तहमा रहको जनप्रतिनिधिहरुको प्रमुख दायित्व र जिम्मेवारी जनताको सेवा गर्ने भएकोतर्फ भने ध्यानाकर्षण गरे । काम गर्दागर्दै कतै कमजोरी भए जनताले औंल्याउनुपर्ने बताउँदै नेता सिंहले गालीमात्रै नगरी सरकार र जनप्रतिनिधिलाई काम गराउने जिम्मेवारी जनताको भएको औंल्याए ।

विश्वव्यापी कोरोना भाइरस संक्रमणबीच जनप्रतिनिधिहरुले दिनरात नभनी जनताको सेवा गर्दै आएको उनले बताए । जनतामा राजनीतिप्रति नै वितृष्णा बढेकाले जनप्रतिनिधिहरुले पनि परिवर्तन अनुभूति हुने गरी काम गर्ने बेला भएको उनको भनाइ थियो ।

‘जमाना फेरिएको छ । जनप्रतिनिधिहरु व्यक्तिगत र दलगत स्वार्थभन्दा माथि हुने जनताको सेवालाई केन्द्रविन्दुमा राखेर पारदर्शीपूर्ण काम गर्नुपर्छ’, नेता सिंहले भने, ‘जनप्रतिनिधिहरुले प्रभावकारी काम गरे जनतामा सकारात्मक प्रभाव पर्छ ।’

उनले विधि र पद्धतिलाई आत्मसात गरी काम गर्नसमेत सुझाव दिए । विधि र पद्धतिभन्दा माथि आफूलाई सम्झेर काम गर्ने एमालेका अध्यक्ष एवं पूर्वप्रधानमन्त्री केपी शर्मा ओलीको हविगत हुने उनको भनाइ थियो ।

‘मै सत्ता हु र सबै थोक मै हुँ भन्ने दम्भले गर्दा केपी शर्मा ओली बालुवाटारबाट बालकोटको बार्दली पुग्नुपर्‍यो’, प्रतिनिधिसभा सदस्यसमेत रहेका नेता सिंहले भने, ‘विधि र पद्धति नमान्ने, जनताको कुरा नसुन्दा केपी ओलीको हविगत हुन्छ । केपी शर्मा ओलीलाई जनताले दुईतिहाइ नजिक मत दिएका थिए तर खोई त काम गरेको ?’

कार्यक्रममा मध्यपुर थिमि नपाका मेयर मदनसुन्दर श्रेष्ठले नगरभित्र भएका विकास निर्माणको फेहरिस्त प्रस्तुत गरे । तर विवाद र प्राविधिक समस्याले नपाका केही वडाहरुको भवन निर्माण रोकिएको उनले सुनाए ।

त्यस्तै उपमेयर अञ्जनादेवी मधिकर्मीले नपाले सम्पदा संरक्षणसँगै जनताको मागअनुसार विकास निर्माणका कार्य गर्दै आएको बताइन् । मध्यपुर थिमि नपा वडा नं. ३ का अध्यक्ष प्रेमबहादुर कुटुले २ करोड ४४ लाख ९७ हजार ६७९ रुपैयाँको लगत इस्टिमेटको उक्त भवन ठेकेदारले एक करोड ६९ लाख ९६ हजार ४२२ रुपैयाँमा सम्पन्न गरेको जानकारी दिए ।

उनका अनुसार २०७६ सालको माघ १६ गते उक्त भवनको जग शिलान्यास भएको थियो । भक्तपुर काठमाडौं ६ लेन सडकको उत्तरतर्फ कौशलटारमा रहेको उक्त भवनमा सभाकक्ष, जनप्रतिनिधिहरुको बैठक कक्षसहित १२ वटा कोठा रहेका छन् । यसअघि भाडामा बसेको वडा कार्यालय नवनिर्मित भवनमा सरेसँग कार्यालयको सेवा छिटो छरितो हुने वडा अध्यक्ष कुटुले विश्वास व्यक्त गरे ।