नयाँदिल्ली: भारतको हिमाञ्चल प्रदेशस्थित किन्नौर जिल्लामा गएको पहिरोमा परी ११ मानिसको मृत्यु भएको छ । करिब ३० जना बेपत्ता भएका छन् ।
किन्नौरस्थित रेकोङ पियो–सिम्ला राजमार्गमा अचानक पहिरो खसेको थियो । स्थानीय प्रसासनअनुसार बुधबार दिउँसो करिब १२: ३० बजेतिर पहिरो गएको थियो । पहिरोले बस, ट्रक र कारलगायत कैयौँ सवारी साधन पुरिएका छन् ।
पहिरोका कारण सिम्लातर्फ गइरहेको बसभित्रै करिब ४० यात्रु फसेको अधिकारीहरुले जनाएका छन् । करिब २५ देखि ३० यात्रु पहिरोले पुरेको हुनसक्ने अनुमान गरिएको छ । अधिकारीहरुकाअनुसार हालसम्म १० व्यक्तिको उद्धार गरिएको छ भने उद्धार गरिएका मानिसलाई अस्पताल पुर्याइएको छ ।
रेकोङ पियो–सिम्ला राजमार्ग खसेको भिमकाय पहिरोको भिडियो सार्वजनिक भएको छ । राजमार्गमा कुदिरहेका गाडीहरुमाथि पहाडबाट ठूल्ठूला ढुंगाहरु खसेको उक्त भिडियोमा देखिन्छ ।
उद्धारको लागि करिब २ सयको संख्यामा इन्डो टिवेटियन बोर्डर प्रहरी खटाइएको छ । उद्धार कार्य रातभर जारी राख्ने जनाइएको छ । ‘पहिरो गएको क्षेत्र निकै जोखिमपूर्ण छ । तैपनि हामीले रातभर उद्धार कार्यलाई निरन्तरता दिने अपेक्षा राखेका छौँ’इन्डो तिब्बती सीमा प्रवक्ता विवेक पाण्डेले भनेका छन् ।
हिमाञ्चल प्रदेशका मुख्यमन्त्री जयराम ठाकुरले घटनाबारे जानकारी दिँदै पहिरोका कारण फसेका व्यक्तिलाई जतिसक्दो चाँडो सुरक्षित तरिकाले उद्धार गर्न र पीडित व्यक्तिलाई राहत उपलब्ध गराउन राष्ट्रिय विपद् जोखिम न्युनिकरणलाई आग्रह गरेका छन् ।
भारतका प्रधानमन्त्री नरेन्द्र मोदी र गृहमन्त्री अमित शाहले घटनाको जानकारी लिँदै आफूहरुले सक्दो सहयोग गर्ने बताएका छन् । हिमाञ्चल प्रदेशका विभिन्न स्थानमा गत सातादेखि नै निरन्तर परिरहेको भारी वर्षाका कारण विभिन्न स्थानमा पहिरो गइरहेको छ । गत महिना किन्नौरको अर्को स्थानमा भीरबाट ठूल्ठूलो ढुंगाहरु सडकमा कुदिरहेको कारमाथि खस्दा ९ पर्यटकको मृत्यु भएको थियो ।
प्रतिक्रिया दिनुहोस !
