कायरो: पुल सार्न प्रयोग गरिने विधि र उपकरणमार्फत संसारकै पुरानो जहाजलाई नयाँ स्थानमा सारिएको छ । इजिप्टको राजधानी कायरोस्थित ४ हजार ५ सय वर्ष पुरानो जहाजलाई नयाँ स्थानमा सारिएको हो ।
इजिप्सियन मिनिस्ट्री अफ एन्टिक्विटीज र बेक्सिस ओरास्कम कन्स्ट्रक्सनको संयुक्त पहलमा इजिप्टका इन्जिनियरहरु र पुरातत्वविद्हरुले संसारकै पुरानो जहाजलाई स्थान्तारण गरेका हुन् । उक्त जहाजलाई साविकको स्थानबाट ८ किलोमिटर टाढा सारिएको छ ।
इजिप्टका प्राचीन राजा खुफुजको पालामा उक्त जहाज बनेको बताइन्छ । उक्त जहाज संसारको सबैभन्दा पुरानो र प्राचीन समयको सबैभन्दा ठूलो जहाज भएको विश्वास गरिन्छ । ‘किङ खुपु सोलार बोट’ नामक उक्त जहाजलाई हाल पुरातात्विक क्षेत्रबाट नयाँ संग्राहलय ‘ग्रान्ड इजिप्सियन म्युजियम’मा सारिएको छ ।
उक्त जहाज सार्ने काम अगस्ट ५ देखि ७ सम्म थियो । करिब ४५ टनको उक्त जहाजलाई ८.५ किलोमिटर टाढा सारिएको थियो । उक्त जहाजको लम्बाई ४३.६ मिटर र चौडाई ५.९ मिटर छ ।
प्रतिघण्टा एक घण्टाको गतिमा रिमोट कन्ट्रोल्ड व्रिज मुभरमार्फत इन्जिनियरहरु सो जहाज सार्न सफल भएका छन् । संसारकै पुरानो सो जहाजलाई २५०० बिसीदेखि गिजाको ग्रेट पिरामिडमा राखिएको बताइन्छ । सन् १९५४ मा इजिप्टोलिस्ट कमल एल मालेखले पहिलो पटक उक्त जहाज पत्ता लगाएका थिए । सन् १९८५ मा गिजा सोलार बोट म्युजियममार्फत सो जहाज सार्वजनिक गरिएको थियो ।
प्रतिक्रिया दिनुहोस !
