काबुल: अफगानिस्तानका राष्ट्रपति अशरफ घानीले अफगानिस्तान अहिले गम्भीर खतरामा रहेको बताएका छन् ।
तालिबानले राष्ट्रव्यापी सैन्य अभियान सञ्चालन गरेपछि पहिलो पटक राष्ट्रपति घानीले सम्बोधन गरेका हुन्। तालिबान लडाकूहरु राजधानी काबुल नजिकै आइपुगेको बताइएको छ ।
कतिपय मिडियाले तालिबान काबुलको ढोका नजिकै आएको टिप्पणी गरिरहँदा राष्ट्रपति घानीबाट यस्तो प्रतिक्रिया आएको हो । अन्तर्राष्ट्रिय मिडियाका अनुसार तालिबानले अफगानिस्तानमा ३४ प्रान्तमध्ये आधा प्रान्त कब्जामा लिइसकेको छ ।
तीमध्ये दोस्रो र तेस्रो ठूलो सहर समेत तालिबानको कब्जामा परेको बताइएको छ । पछिल्लो समय अफगानिस्तान संकटमा फसिरहँदा अमेरिकाले आफुना नागरिक फिर्ता लैजाने प्रक्रिया सुरु गरिसकेको छ ।
बेलायत, नर्वे लगायत अन्य देशले पनि आफ्ना नागरिक फिर्ता लैजान प्रक्रिया सुरु गरेका छन् । क्यानडाले भने महिला नेत्रीहरुसहित २० हजार भन्दा धेरै मानिसलाई आश्रय दिने घोषणा गरेको छ । तीमध्ये अधिकांश यसअघि क्यानडाका लागि काम गरेकाहरु छन् ।
शान्ति स्थापनाका लागि २० वर्षसम्म अमेरिकी सेना अफगानिस्तानमा बसेर फर्किन थालेपछि तालिबान लडाकूले विभिन्न इलाकालाई आफ्नो कब्जामा लिन थालेका हुन् । यद्यपि भारत, जर्मनी सहित दर्जन बढी देशहरुले अफगानिस्तानमा सैन्य बलबाट स्थापित हुने सरकारलाई आफूहरुले मान्यता नदिने चेतावनी दिएका छन् ।
प्रतिक्रिया दिनुहोस !
