विश्‍वभर आज: चिनियाँहरुलाई अब ३ सन्तान पाउन छुट, अफगानिस्तानमा मनाइयो स्वतन्त्रता दिवस

महाराष्ट्रमा सरिया बोकेको ट्रक पल्टिँदा १३ मजदुरको मृत्यु

नयाँदिल्ली: भारतको महाराष्ट्र प्रदेशस्थित बुलढाणामा सरिया बोकेको मालवाहक ट्रक पल्टिँदा १३ मजदुरको मृत्यु भएको छ ।

शुक्रबार दिउँसो २ बजे हिन्दू हृदय सम्राट बालासाहेक हाइवेमा सो दुर्घटना भएको थियो । दुर्घटनामा परी १३ मजदुरको घटनास्थलमै मृत्यु भएको छ भने तीन जना गम्भीर घाइते भएका छन् ।

मृतक १३ मजदुरहरु महाराष्ट्र प्रदेश खरगोन गाउँका बासिन्दा रहेको प्रहरीले जनाएको छ । प्रहरीको प्रारम्भिक अनुसन्धानका अनुसार हाईवेमा निर्माणाधीन पुलमा कार्यरत सबै मजदुर सरिया बोकेको ट्रकमाथि सवार थिए । ट्रकले सोही निर्माणधीन पुलको लागि सरिया बोकेको थियो ।

०००

चीनमा अब दम्पतीले तीन सन्तान पाउन सक्ने

बेइजिङ: चीन सरकारले अन्तत तीन सन्तान पाउने नीति (थ्री चाइल्ड पोलिसी) आधिकारिक रुपमा स्वीकृत भएको छ । शुक्रबार बसेको चीनका शीर्ष नीति निर्माताहरु र चीनको राष्ट्रिय विधायक (नेसनल पिपुल्स कंग्रेस–एनपीसी) को बैठकले सो नीति स्वीकृत गर्ने निर्णय गरेको हो ।

अब चिनियाँ दम्पतीहरुले तीन सन्तान पाउन सक्नेछन् । संसारको सबैभन्दा बढि आवादी भएको मुलुक चीनमा उच्च जन्मदर घटाउने उदेश्यले नीतिगत रुपमा परिवर्तन गरिएको बताइएको छ । सत्तारुढ कम्प्युनिस्ट पार्टीले गरेको सो निर्णयको चीनले औपचारिक रुपमा समर्थन पाएको छ ।

चीनको दशकौँ पुरानो ‘एक सन्तान नीति’लाई सन् २०१६ मा परिमार्जन गर्ने गरी हेरफेर गरिएको थियो । एक सन्तानको नीतिले चीनको जन्मदर घटेको भन्दै त्यसताका चीनले दुई सन्तानको नीतिलाई विकल्पको रुपमा अघि सारेको थियो ।

घट्दो जन्मदरका कारण वर्तमान समयमा चीनमा काम गर्ने व्यक्तिको संख्यामा कमी आएको बताइन्छ । सिन्ह्वा न्युजका अनुसार तीन सन्तान पाउने दम्पतीलाई चीन सरकारले आकर्षण सेवा सुविधा उपलब्ध गराउने छ ।

०००

ग्रीनल्याण्डमा इतिहासमै पहिलो पटक वर्षा

वासिंटन: वर्षभर हिमपात हुने बरफैबरफले ढाकेको ग्रीनल्याण्डको हिम क्षेत्रमा इतिहासमै पहिलो पटक पानी परेको बताइएको छ । समुद्री सतहदेखि २ माइल उचाईमा रहेको ग्रीनल्याण्डमा शनिबार पहिलो पटक पानी परेको हो ।

नेसनल स्नो एण्ड आइस डाटा सेन्टरकाअनुसार ग्रीनल्याण्डको हिम शिखर क्षेत्रमा सन् १९५० यता रेकर्ड तोड्ने गरी शनिबार पहिलो पटक भारी वर्षा भएको हो ।

तापक्रम बृद्धिका कारण ध्रुवीय क्षेत्रमा बरफ पग्लिँदै गएको छ भने हिउँ पर्नुको सट्टा पानी परिरहेको छ । ग्रीनल्याण्डको हिमपात हुने क्षेत्रमा भारी वर्षा हुँदा आइतबार औसतभन्दा सात गुणा बढी बरफ पग्लिएका छन् । तातो हावाको कारण बरफ पग्लिएिर तीन दिनको अन्तरालमा सात अर्ब टन पानी निस्कासन भएको छ ।

नेसनल स्नो एण्ड आइस डाटा सेन्टरका वरिष्ठ वैज्ञानिक टेड स्क्याम्वोजले हिउँ पर्ने क्षेत्रमा पानी पर्नु र तिब्र रुपमा बरफ पग्लिनुले ग्रीनल्याण्ड तिब्र रुपमा तातिरहेको प्रमाण देखाएको बताएका छन् ।

०००

अफगानिस्तानले मनायो स्वतन्त्रता दिवस

काबुल: अफगानिस्तानले आफ्नो स्वतन्त्रता दिवस मनाएको छ । अमेरिकाले अफगान युद्ध हारेको घोषणा गर्दै अफगानिस्तानले स्वतन्त्रता दिवस मनाएको हो ।

देशको नयाँ सरकार चलाउने र अन्य व्यवस्थापन जस्ता कैयौँ चुनौती बाँकी नै भए पनि अफगानिस्तानले बिहीबार स्वतन्त्रता दिवस मनाएको बताइएको छ ।

अफगानिस्तानमा ब्रिटिस शासन अन्त्य गर्ने १९१९ को सन्धि स्मरण गर्न हरेक वर्ष स्वतन्त्रता दिवस मनाइन्छ । यस वर्षको स्वतन्त्रता दिवसको अवसरमा तालिबानले ब्रिटिसबाट स्वतन्त्र भएकोमा आफुहरु निकै सौभाग्यशाली रहेको बताएको छ । स्वतन्त्रता दिवसको अवसरमा अफगानिस्तानले आफ्नो राष्ट्रिय झण्डा फहराएको थियो ।

तालिबानले अफगानिस्तान युद्धमा अमेरिका असफल रहेको भन्दै अफगानिस्तानबाट बाहिरिनु परेको बताएको छ ।

०००

हैटीमा भूकम्पको राहत बाँड्न गएका दुई डाक्टरको सामूहिक अपहरण

हैटीमा भूकम्पबाट पीडितका लागि राहत बाँड्न पुगेका दुई डाक्टर सामूहिक अपहरणमा परेका छन् । बिहीबार राहत वितरणको क्रममा दक्षिणपश्चिम हैटी पुगेका दुई डाक्टर सामूहिक अपहरणमा परेको बताइएको छ ।

अपहरणकारीले हैटीको राजधानी पोर्ट ओ प्रिन्स अस्पतालमा कार्यरत अर्थोपेडिक डाक्टरहरुको अपहरण गरेको बताइएको छ । दुईमध्ये एक हैटी र एक अमेरिकाबाट आएका डाक्टर रहेको बताइएको छ । डाक्टरहरु अपरहणमा परेपछि उनीहरु कार्यरत अस्पताल दुई दिनका लागि बन्द गरिएको छ ।

यसअघि भूकम्पपछि आएको तुफान र भारी वर्षाले हैटीका भूकम्प पीडितको उद्धार र राहत वितरणमा कठिनाइ भएको थियो । राहत वितरणमा खटिएका डाक्टर नै अपहरणमा पर्न थालेपछि झनै कठिनाइ भएको  बताइएको छ ।

अमेरिकी सरकार र विभिन्न निजी क्षेत्रले हैटीका भूकम्प पीडितको लागि राहत वितरण गरिरहेको छ । हैटीमा गएको ७.२ म्याग्निच्युडको भूकम्पका कारण ज्यान गुमाएउनेहरुको संख्या २१ सय पुगेको छ भने १२ हजारभन्दा बढी घाइते भएका छन् । करिब १ लाख भन्दा बढी घरहरु पूर्ण रुपमा क्षति भएका छन् । हैटी भूकम्प मात्र नभई युद्ध र गरिबीको चपेटामा परेको मुलुक हो ।

००००

रुसमा बढे कोरोनाका नयाँ संक्रमित

मस्कोः रुसमा कोरोनाका नयाँ संक्रमित बढ्दै गएको बताइएको छ । रुसभर पछिल्लो २४ घण्टामा रुसमा २० हजार ९ सय ९२ कोरोनाका नयाँ संक्रमित फेला परेको बताइएको छ ।

डेल्टा भेरियन्टको संक्रमण फैलिरहेको बेला रुसमा दैनिक २० हजार नयाँ संक्रमित फेला पर्ने गरेको र दैनिक ७८५ को मृत्यु हुने गरेको अधिकारीहरुले जनाएका छन् । मस्कोमा सबैभन्दा बढी संक्रमण फैलिएको बताइएको छ । रुसमा हालसम्म कोरोनाबाट मृत्यु हुनेहरुको सख्या १ लाख ७४ हजार ४८५ पुगेको छ ।

०००

जिहादी आक्रमणमा ज्यान गुमाउनेहरुको लागि ३ दिन राष्ट्रिय शोक

पश्चिम अफ्रिकी मुलुक बुर्किना फासोमा जिहादी आक्रमणमा परी मृत्यु हुनेहरुको संख्या ८० पुगेको छ । देशको उत्तरी क्षेत्रमा जिहादीहरुले आक्रमण गर्दा ६ सैनिक र ५९ सर्बसाधारणसहित ८० जनाले ज्यान गुमाएका छन् । 

गत बुधबार भएको जिहादी आक्रमणमा कैयौँ प्रहरी र सर्वसाधारण मारिएका थिए । बुर्किना फासोका राष्ट्रपति रोच मार्क क्रिष्चियन काबोरेले जिहादी आक्रमणमा परी ज्यान गुमाउनेहरुको लागि तीन दिन राष्ट्रिय शोकको घोषणा गरेका छन् । इस्लामिक द्धन्द्धले निम्त्याएको सो आक्रमणलाई पछिल्लो समयको सबैभन्दा ठूलो रक्तपात मानिएको छ ।

०००

चर्चित जापानी अभिनेता चिवाको ८२ वर्षको उमेरमा निधन

टोक्यो: जापानका चर्चित मार्सल आर्टस् स्टार एवम् किल बिल फिल्मका अभिनेता सोनी चिवाको ८२ वर्षको उमेरमा निधन भएको छ ।

चिवाको कोरोनाको कारण शनिबार मृत्यु भएको हो । करिब ५ दशक फिल्म उद्योगमा विताएका अभिनेता सोनी हलिउड फिल्मका दर्शकहरुले रुचाएका सबैभन्दा चर्चित अभिनेता मध्ये एक हुन् ।

अभिनेता चिवा क्वेन्टिन तारान्तिनोको किलबिलको भूमिकाले बढी चिनिन्छन् । उनले थुप्रै हलिउड फिल्ममा अभिनय गरेका छन् । अभिनेता चिवालाई जापानी मार्सल आर्ट्स र करातेका हिरोको रुपमा चिनिन्छ।