विश्‍वभर आजः अफगानिस्तानबाट सेना फिर्ता नगर्न अमेरिकालाई दबाब, तालिबानसँग सिआइएको गोप्य वार्ता

मिसाइल आपूर्तिका लागि टर्कीसँग नयाँ सम्झौता गर्दै रुस

मस्को: मिसाइल आपूर्तिका लागि रुसले टर्कीसँग चाँडै नयाँ सम्झौता गर्ने जनाएको छ । एस–४०० सैन्य सुरक्षा मिसाइल प्रणाली आयातको लागि रुसले टर्कीसँग चाँडै नयाँ सम्झौता गर्ने रुसी सरकारी सैन्य हतियार निर्यातकर्ता रोसोबोरोनेस्पर्टले जनाएको छ ।

‘बढी भन्दा बढी एस–४०० सैन्य सुरक्षा मिसाइल प्रणाली आयातका लागि रुस र टर्कीबीच छलफल जारी छ । मिसाइल आपूर्तिको विषय अन्तिम चरणमा पुगिसकेकोले टर्कीसँगको नयाँ सम्झौता चाँडै हुनेमा म विश्वस्त छु’ इन्टरनेसनल टेक्निकल फोरम ‘आर्मी–२०२१’ फोरममा सोमबार रोसोबोरोनेस्पर्टका कार्यकारी निर्देशक एलेक्जेन्डर मिखिभले भनेका छन् ।

सन् २०२१ मा रुसले सैन्य हतियार आयातमा करिब ८.६ विलियन अमेरिकी डलरको खर्च गरेको पनि मिखिभले जानकारी दिएका छन् । रुस  र टर्कीबीच एस–४०० मिसाइल प्रणाली आपूर्तिबारे सन् २०१७ मा पहिलो पटक सम्झौता भएको थियो । सन् २०१९ जुलाईमा टर्कीले पहिलो पटक ढुवानी गरेको थियो ।

टर्की एस–४०० मिसाइल प्रणाली खरिद गर्ने नर्थ एटलान्टिक ट्रिटी अर्गनाइजेसन (नाटो) को पहिलो सदस्य मुलुक हो । एस–४०० मिसाइल प्रणाली रुसको अल्माज एन्टी आर्मस् म्यानुफ्याक्चरले उत्पादन र डिजाइन गरेको शक्तिशाली हतियार हो । जसले ४ सय किलोमिटरको दूरी र ३० किलोमिटर उचाइसम्म क्षति पुर्‍याउन सक्छ ।
०००

सेना फिर्तीको समयसीमा लम्ब्याउन अमेरिकामाथि दबाब

काबुल: अफगानिस्तानबाट अमेरिकी सेना फिर्तीको समयसीमा लम्ब्याउन अमेरिकामाथि दबाब परेको छ । अमेरिककाका अधिकारीहरुले ३१ अगष्टपछि पनि अफगानिस्तानमा सेनाको उपस्थिति कायम राख्ने या नराख्ने भन्ने विषयमा तत्काल निर्णय लिन राष्ट्रपति जो बाइडेनलाई दबाब दिएका छन् ।

काबुलबाट थप मानिस उद्धार गर्नुपर्ने भएकोले अफगानिस्तानबाट तत्काल सेना फिर्ता नगर्न अमेरिकाका साझेदारी मुलुकहरुले राष्ट्रपति बाइडेनलाई दबाब दिइरहेका छन् । मंगलबारका लागि तय गरिएको भर्चुअल जी ७ को शीर्ष बैठक ३१ अगष्टको समय सीमामा केन्द्रित हुनेछ । बेलायतले अफगानिस्तानबाट सेना फिर्ता नगर्न अमेरिकालाई पटकपटक दबाब दिइरहेको छ ।

यता तालिबानी नेताहरुले ३१ अगष्टभन्दा एक दिन बढी अफगानिस्तानमा सेना खटाए त्यसको परिणाम नराम्रो हुने चेतावनी दिइसकेका छन् ।

काबुल एयरपोर्टमार्फत पछिल्लो २४ घण्टामा करिब १६ हजार मानिसको उद्धार गरिएको छ । यसअघि अमेरिकाले तोकिएकै समयमा आफ्ना सेना फिर्ता गर्ने र त्यहाँ भएका सबै मानिसको उद्धार गरिसक्ने बताएको थियो । १४ अगष्टपछि अमेरिकाले अफगानिस्तानबाट  करिब ४८ हजार मानिसको उद्धार गरिसकेको छ ।

हाल ५ हजार ८ सय अमेरिकी सेना अफगानिस्तानमा खटिएका छन् । राष्ट्रपति बाइडेनले ३१ अगष्टपछि पनि सेना फिर्ता गर्ने या नगर्ने भन्नेबारे २४ घण्टाभित्रमा निर्णय लिनेछन् ।
०००
काबुलबाट विमान अपहरणमा परेको युक्रेनका विदेशमन्त्रीको दाबी

युक्रेन: युक्रेनका विदेशमन्त्रीले अफगानिस्तानमा फसेका आफ्ना नागरिकको उद्धारका लागि काबुल पुगेको युक्रेनको विमान अपहरणमा परेको दाबी गरेका छन् ।

मंगलबार युक्रेनका विदेशमन्त्री येवगेनी यनिनले अज्ञात व्यक्तिद्धारा काबुलबाट आफ्नो विमान अपहरणमा परेको दाबी गरेका हुन् ।

‘हाम्रो विमान अपहरणमा परेको छ । आइतबार काबुल पुगेको विमान मंगलबार मात्र इरान पुगेको छ’ उनले भनेका छन्, ‘हतियारधारीले अपहरण गरी उद्धारका लागि पठाइएको विमान इरान पुर्‍याएका हुन् । युक्रेनको विमानमा युक्रेनका नागरिक नभई अज्ञात यात्रु सवार छन् । अफगानिस्तानमा फसेका आफ्ना  नागरिक बचाउन युक्रेन सरकारले गरेको तेस्रो प्रयास पनि असफल भएको छ ।’

साथै अफगानिस्तानको विभिन्न स्थानमा रहेका आफ्ना नागरिकलाई काबुल विमानस्थलसम्म आउन नदिइएको दाबी समेत विदेशमन्त्री येनिनले गरेका छन् ।

यद्यपि, युक्रेन सरकारले भने विदेश मन्त्री येनिनको दाबी अस्वीकार गरेको छ । तेहरान टाइम्सका अनुसार युक्रेनका नागरिक उद्धारको लागि काबुल पुगेको विमान अपहरणमा परेको मन्त्रीको दाबीको युक्रेन सरकारले बेवास्ता गरेको छ । 
०००

अफगानिस्तान मुद्दामा मोदी र पुटिनबीच वार्ता

नयाँदिल्ली: भारतीय प्रधानमन्त्री नरेन्द्र मोदी र रुसका राष्ट्रपति भ्लादिमिर पुटिनबीच अफगानिस्तानबारे मंगलबार वार्ता भएको छ ।

मोदी र पुटिनबीच करिब ४५ मिनेट लामो वार्ता भएको भारतीय सञ्चारमाध्यमहरुले जनाएका छन् । उनीहरुले अफगानिस्तानको वर्तमान अवस्थाबारे लामो छलफल गरेको बताइएको छ ।

दुई देशका प्रमुखबीचको वार्ताले महत्वपूर्ण भूमिका खेल्ने भारतीय सञ्चारमाध्यमहरुको दावी छ । रुसले तालिबानको समर्थन गरिसकेको भारतीय सञ्चारमाध्यमहरुको दावी छ ।

तालिबानको विषयमा यसअघि भारतले अमेरिका र बेलायतसँग पनि छलफल गरिसकेको छ । सोही विषयमाथि छलफल गर्न मोदीले दुईपटक मन्त्रिपरिषदको बैठक पनि राखेका छन् ।
०००

श्रीलंकामा डेल्टा लहर बढ्यो, दाहसंस्कारको लागि कार्डबोर्ड

कोलम्बो: श्रीलंकाको देहिवाला माउन्ट शहरमा कोभिड १९ को डेल्टा भेरियन्ट तिब्र रुपमा फैलिएको छ । डेल्टा भेरियन्टको कारण मृत्यु हुनेहरुको दाहसंस्कारको लागि काठको सट्टा कार्डबोर्ड कफिन प्रयोग गरिएको बताइएको छ । 

हालसम्म करिब ५ सय कार्डबोर्ड निर्माण गरिएको बताइएको छ । प्रत्येक कार्डबोर्डको मुल्य ४ हजार ५ सय (श्रीलंकन मुल्य) रहेको बताइएको छ ।

डेल्टा भेरियन्टको कारण मृत्यु हुनेहरुको शव व्यवस्थापनको लागि धमाधम कार्डबोर्ड कफिन निर्माण थालिएको बताइएको छ । कार्डबोर्ड कफिन काठको तुलनामा सस्तो मानिन्छ ।

डेल्टा भेरियन्टको कारण श्रीलंकामा दैनिक करिब १८० मानिसको मृत्यु हुने गरेको छ भने हालसम्म देशभर ७ हजार ५ सय ६० को मृत्यु भइसकेको छ । कोलम्बो जिल्ला देहिवाला माउन्ट लेभिनीका प्रमुख शाहबन्दुका अनुसार कोभिडसहित अन्य रोगको कारण श्रीलंकामा दैनिक करिब ४ सय मानिसको मृत्यु हुने गरेको छ ।
०००

इजरायली सेनाद्धारा प्यालेस्टेनी किशोरको हत्या

जेरुसेलम: इजरायली सैन्य हमलामा परी प्यालेस्टानी किशोरको मृत्यु भएको छ । वेस्ट बैंकस्थित नाब्लुज शरणार्थी शिविर नजिकै बलाटा शरणार्थी शिविरमा भएको हमलामा परी मंगलबार १५ वर्षीय प्यालेस्टानी किशोरको मृत्यु भएको हो ।

प्यालेस्टाइनको स्वास्थ्य मन्त्रालयकाअनुसार इजरायली सेनाको बन्दुक हमलामा परी १५ वर्षीय इमाद खलिद सालेहको मृत्यु भएको हो ।

सेनाले चलाएको गोली सालेहको टाउकोमा लागेको थियो । घटनापछि अस्पताल पुर्‍याइएको उनको उपचारका क्रममा मृत्यु भएको हो । इजरायली सेनाले सोमबार अचानक प्यालेस्टाइनी शरणार्थी बसेको बलाटा शरणार्थी शिविर घेरा हालेको थियो ।
०००

अमेरिकी गुप्तचरको तालिबानसँग गोप्य भेट

काबुल: अमेरिकी गुप्तरचर एजेन्सी सिआइएले तालिबानसँग गोप्य भेट गरेको छ । सिआइएका निर्देशक विलियम जे वन्र्सले तालिबानी नेता अब्दुल घानी बरादरसँग सोमबार काबुलमा गोप्य भेट गरेको बताइएको छ ।

वासिङटन पोष्टमा मंगलबार प्रकाशित समाचारअनुसार तालिबान समूहद्धारा काबुल कब्जा भएपछि सिआइए प्रमुख र तालिबानबीच प्रत्यक्ष भएको यो उच्चस्तरीय भेट हो । भेटबारे सिआइएले आधिकारिक सूचना जारी नगरे पनि तालिबानी नेता अब्दुल र सिआइए निर्देशकबीच ३१ अगष्टको समयसीमाबारे छलफल भएको र दुई शीर्ष व्यक्तिबीचको भेटको ठूलो कारण हुनसक्ने वासिङ्टन पोष्टले जनाएको छ । 
०००
श्रीलंकाका पूर्व विदेशमन्त्रीको कोरोनाबाट मृत्यु

कोलम्बो: श्रीलंकाका पूर्व विदेशमन्त्री मंगला समभिराको कोरोनाका कारण मृत्यु भएको छ । ६५ वर्षीय मंगलाको मंगलबार मृत्यु भएको हो । उनलाई गत अगष्ट महिनाको सुरुवातमा कोरोना संक्रमण देखा परेको थियो । संक्रमणपछि उनको अस्पतालमा उपचार भइरहेको थियो । दुई पटक विदेशमन्त्रीको पद सम्हालेका मंगलाले गत वर्ष राजनीतिबाट संन्नयास लिएका थिए ।
०००

कोभिडका कारण एसियाको विकासमा खतराः एडिबी

कोरोना महामारीका कारण एसिया क्षेत्रको विकासमा खतरा बढेको एसियाली विकास बैंक (एडिबी) ले जनाएको छ । एडिबीले मंगलबार एक रिपोर्ट सार्वजनिक गर्दै सन् २०३० सम्ममा एसियाको समग्रम विकासमा खतरा रहेको बताएको छ ।

एसियाली क्षेत्रमा गरिबी र भोकमरी घटाउन तय गरिएको लक्ष्य सन् २०३० सम्ममा पुरा हुन नसक्ने जनाउँदै एडिबीले सो जानकारी दिएको हो । एडिबीको रिपोर्टअनुसार कोभिड महामारीका कारण स्वास्थ्य, शिक्ष र अन्य क्षेत्रमा खतरा झनै बढ्ने छ ।

संयोजन: अस्मिता खड्का