विश्‍वभर आज: समुद्रमा सुरुङ बनाउँदै जापान, पाकिस्तान तालिबानको 'दोस्रो घर'

युएईका वरिष्ठ अधिकारी र कतारका राजकुमारविच दुर्लभ भेट

दोहा: संयुक्त अरब इमिरेट्सका वरिष्ठ अधिकारी र कतारका राजकुमारबीच बिहीबार दोहामा भेटवार्ता भएको छ। युएईका राष्ट्रिय सुरक्षा सल्लाहकार शेइख ताहनौन वीन जायद अल नाहयान र कतारका राजकुमार अमिर शेइख तामिम वीन हमाद अल थानीबीच अमिरको कार्यालयमा भेटवार्ता भएको बताइएको छ ।

करिब चार वर्षपछि गरिएको उनीहरुको भेटवार्तालाई स्थानीय मिडियाहरुले दुर्लभ भेटको संज्ञा दिएका छन् । कतारसँग भएको विवाद समाप्त गर्न सन् २०१७ मा साउदी अरेविया, युएई, बहराइन र इजिप्टले संयुक्त रुपमा हस्ताक्षर गरेका थिए  ।

000

भारतमा सांसदमाथि बलात्कार आरोप लगाउने युवतीले गरिन् आत्मदाह

नयाँदिल्ली: भारतमा एक सांसदमाथि बलात्कारको आरोप लगाउने २४ वर्षीय युवतीले आत्मदाह गरेकी छन् ।
उपचारको उपचारका क्रममा मृत्यु भएको हो।

उत्तर प्रदेशका सांसद अतुल रायले आफूमाथि बलात्कार गरेको भन्दै अगष्ट १६ मा पीडित युवती र उनका साथी सत्यम प्रकाश रायले भारतको सर्वोच्च अदालतबाहिर आफ्नै शरीरमा आगो लगाएर आत्मदाह प्रयास गरेका थिए ।

यस्तो प्रयासपछि गम्भीर घाइते बनेका सत्यम प्रकाशको तीन दिनअघि र पीडित युवतीको उपचारका क्रममा मंगलबार राति मृत्यु भएको थियो ।

पीडित युवतीले बहुदल समाज दल लोकसभाका सांसद अतुल रायले वणारसीस्थित आफ्नै निवासमा बलात्कार गरेको भन्दै सन् २०१९ मा प्रहरीसमक्ष जाहेरी दिएकी थिइन् ।

अदालतसम्म पुगेको उक्त मुद्दाले २०२१ अगष्ट २ मा गैरजमानत वारेन्ट जारी गरेको थियो । महिलाको आरोप गलत भनिए पनि अदालतले आरोपित व्यक्ति यतिबेला हिरासतमा रहेको बताइएको छ ।

यद्यपि आरोपितले पीडितमाथि हिरासतबाटै धम्की दिने र अन्य व्यक्तिमार्फत थप मानसिक यातना दिने गरेको बताइएको छ । उनको पीडा सहन नसकी पीडित र उनका साथीले आत्मदाह गर्न बाध्य भएको बताएका थिए । भारतमा हरेक वर्ष बलात्कारपछि पीडितले न्याय नपाउने र पीडितहरुमाथि नै धम्की आउने गरेका घटना दोहोरिने गर्छन्।
000

भेनेजुयलामा बाढीका कारण २० को मृत्यु

काराकास: दक्षिण अमेरिकी मुलुक भेनेजुयलाको मेरिडामा राज्यमा पहिरोसहित आएको बाढीका कारण कम्तीमा पनि २० मानिसको मृत्यु भएको बताइएको छ ।

मेरिदा नदीमा बुधबार राति आएको बाढीका कारण १७ मानिस हराइरहेको र १२ सयभन्दा बढी घरहरुमा क्षति पुगेको स्थानीय मिडियाले जनाएका छन् ।

बाढीका कारण बाढी तथा पहिरो प्रभावित क्षेत्रमा सडक र टेलिफोन विच्छेद भएकाले मृत्यु हुनेको संख्या अझै बढ्न सक्ने भेनेजुयलाको समाजवादी पार्टी कार्यालयले स्थानीय सञ्चारमाध्यममार्फत जानकारी दिएको छ ।

स्टेट गभर्नर रामोन गुयभाराका अनुसार यस वर्ष भेनेजुयलामा बाढी र पहिरोका कारण ५४ हजार ५४३ मानिस र ८७ नगरपालिका पूर्ण रुपमा प्रभावित भएका छन् । कैयौँ स्थानका सडक र पुलमा पूर्ण रुपमा क्षति पुगेको छ ।
000

अरब लीगले अल्जेरिया र मोरोक्कोलाई वार्तामा बोलायो

दोहा: दी अर्गनाइजेसन अफ इस्लामिक कोपरेसन (ओआइसी) र साउदी अरबियाले अल्जेरिया र मोरोक्कोलाई वार्तामा बोलाएका छन् ।

अल्जेरियाले मोरोक्कोसँग कुटनैतिक सम्बन्ध तोडेपछि अरब लीगले दुबै मुलुकलाई वार्तामा बोलाएको हो । मोरोक्कोले आफूमाथि शत्रुतापूर्ण व्यवहार र अन्याय गरेको भन्दै अल्जेरियाले मंगलबार मोरोक्कोसँगको कुटनैतिक सम्बन्ध तोडेको घोषणा गरेको थियो ।

दुई देशबीचको कुटनैतिक समस्या समाधान गर्न भन्दै अरब लीगले दुबै देशलाई वार्तामा बोलाएको हो । साउदी अरेबियाले दुई देशबीचको समस्या हल गर्न, सुरक्षा र स्थायीत्व कायम राख्न संवादलाई प्राथमिकतामा राखेको बताएको छ ।

अरब लीगका महासचिव अहमद अबुल गेइतले बुधबार विज्ञप्ती जारी गर्दै दुबै देशलाई संयमता अपनाउन र थप तनावबाट बच्न आग्रह गरेका छन् । अरब लीगले दुई देशको वार्ताका लागि आगामी सेप्टेम्बर ७ देखि ९ सम्मको मिति तोकेको छ । वार्ता इजिप्टको कायरोमा हुने बताइएको छ ।

000

पाकिस्तान तालिबानको दोस्रो घरः तालिबान

काबुल: तालिबानका प्रवक्ता जबीबुल्लाह मुजाहिदले पाकिस्तान तालिबानको दोस्रो घर भएको बताएका छन् । पाकिस्तानी न्युज वेबसाइट एआरवाई न्युज टिभीका अनुसार मजाहिदले बुधबार राति पाकिस्तान आफ्नो दोस्रो घर भएको र आफ्नो घरको विरुद्ध संकट आउन नदिने बताएका छन् ।

एआरवाई न्युजको एक विशेष अन्तर्वार्तामा मुजाहिदले अफगानिस्तानमा चरमपन्थी सगठनको उपस्थिति, भारतमा कश्मीर र इस्लामिक स्टेट र भारत पाकिस्तान सम्बन्धबारे आफ्नो भनाइ राखेका छन् ।

अफगानिस्तानमा स्लामिक स्टेट र पाकिस्तानको मुद्दामाथि उनले भनेका छन्, ‘हामीले अरुको निम्ति आफनो जमिन गुमाउने छैनौँ, न त कसैलाई आफ्नो जमिन प्रयोग गर्न दिनेछौँ । यसबारे हाम्रो स्पष्ट नीति बनिसकेको छ । पाकिस्तान हाम्रो दोस्रो घर भएकोले अब हामी एकसाथ अघि बढ्नेछौँ ।’
000

पानीमुनि सुरुङ निर्माण गर्दै जापान

टोक्यो: जापानले पानीमुनि (अन्डर सी) सुरुङ निर्माण गर्ने भएको छ । न्युक्लियर (दुषित) पानीलाई शुद्धिकरण गरी समुद्रमा मिसाउने उद्देश्यले जापानस्थित फुकोसिमाका अपरेटरहरुले पानीमुनि सुरुङ निर्माण गर्ने भएका हुन् ।

फुकुसिमास्थित न्युक्लियर वाटर प्लान्ट निर्माण गरिएको छ । उक्त न्युक्लियर वाटर प्लान्टमार्फत सन् रेडियोएक्टिभ तत्व र दुषित पानीलाई शुद्धिकरण गरिएको पानी टनेलमार्फत समुद्रमा निस्कासन गरिने बताइएको छ ।

फुकुसिमा न्युक्लियर प्लान्टद्धारा उद्घाटित योजनाले करिब एक मिलियन टनभन्दा बढी शुद्धिकरण गरिएको पानीलाई साइटमार्फत सीधा समुद्रमा निस्कासन गर्ने उद्देश्य राखेको छ ।

गत अप्रिल महिनामा दुई वर्षभित्र सञ्चालनमा ल्याउने उद्देश्यले निर्माण गरिएको १ किलोमिटर टनेलको योजना अघि बढिसकेको जापान सरकारले बुधबार घोषणा गरेको छ ।

न्युक्लियर प्लान्ट विस्फोट हुँदा निस्किएका रेडियोएक्टिभ तत्वहरुलाई शुद्धिकरण गरिएको पानी पानीमुनिको सुरुङमार्फत सुरक्षित तरिकाले समुद्रमा पुग्ने जापानका मन्त्रीहरुले बताएका छन् ।

टोक्यो इलेक्ट्रिक पावर कर्पोरेसन (टेप्को)ले पानीमुनि टनेल परियोजना २०२२ मार्चदेखि निर्माण थालिने बताएको छ । उक्त टनेल २.५ मिटर डायमिटरको हुनेछ भने शुद्धिकरण गरिएको १.२७ मिलियन टन पानी टनेलमार्फत समुद्रमा निष्कासन गरिने बताइएको छ ।
000

कतारले पायो अमेरिकाद्धारा निर्मित पहिलो ब्याच विमान 

दोहा: कतारले अमेरिकाद्धारा निर्मित न्यु जेनेरेसन एफ–१५ कम्व्याट विमान प्राप्त गरेको छ । खाडी मुलुकसँगको साझेदारीको उपलक्ष्यमा संयुक्त राज्य अमेरिका र बोइङ कम्पनीद्धारा निर्मित सो विमान कतारले पाएको हो।

अमेरिकाको मिसौरी राज्यस्थित बोइङ कम्पनीको मुख्यालयमा कतारलाई सो विमान हस्तान्तरण गरिएको थियो । कतारको रक्षा मामिला तथा राज्यमन्त्री खालिद बिन मोहम्मद अल अत्तियाहको उपस्थितिमा कम्पनीले सो विमान हस्तान्तरण गरेको थियो ।

कतारका राज्यमन्त्री खालिदले अमेरिकाले बनाएको सो विमान कतारको सैन्य सुरक्षामा निकै उपयोगी हुने बताएका छन् । कतारले आफ्ना छिमेकीहरुसँग राजनैतिक सम्बन्ध बिगारेसँगै सन् २०१७ मा अमेरिका र केही युरोपेली मुलुकहरुबाट युद्धपोत किन्नेबारेको सम्झौता पत्रमा हस्ताक्षर गरेको थियो । हालसम्म बोइङ कम्पनीले कतारको लागि करिब ३० विमान बनाइरहेको बताइएको छ ।
000

काबुलतर्फ हिँडेका १४० हिन्दू र शिखलाई तालिबानको रोक

काबुल: अफगानिस्तानका विभिन्न स्थानबाट घर फर्कन भन्दै काबुल विमानस्थलतर्फ हिँडेका करिब १४० हिन्दू, अफगान शिख र अन्य मानिसलाई तालिबानले रोक लगाएको बताइएको छ ।

अफगानिस्तान छोड्न काबुल विमानस्थलतर्फ हिँडेका हिन्दू, शिख र अन्य मानिसलाई तालिबानले बीच बाटोमै रोकेको इन्डियन वर्ल्ड फोरमका अध्यक्ष पुनित सिंहले जानकारी दिएका छन् ।

इन्डियन एयर फोर्स (आइएएफ) विमानमार्फत काबुल छोड्ने भनिएका ती मानिसलाई तालिबानले रोकेको र काबुल विमानस्थलमा आइएएफ विमान यात्रुलाई कुरिरहेको उनले बताएका छन् । करिब २ सय हिन्दू र अफगान शिखहरु बिहीबार बिहानसम्म हिन्डोन हवाइ मार्ग हुँदै भारत पुग्ने बताइएको थियो ।

संयोजन: अस्मिता खड्का