लुम्बिनी विश्वविद्यालयको छात्रावास डुबानमा: १० घण्टादेखि शिक्षक-विद्यार्थीसहित ३० जना थुनिए
भदौ ११, २०७८ शुक्रबार १७:२:०
बुटवल: लुम्बिनी बौद्ध विश्वविद्यालयको छात्रावास र शिक्षक आवास क्षेत्र डुबानमा पर्दा शिक्षक र विद्यार्थीसहित ३० जना फसेका छन् ।
निरन्तर परेको पानीले रुपन्देहीको खडैयामा रहेको आवास र छात्रावास क्षेत्र डुबेको हो । दानव नदीमा उच्च बाढी आएपछि आवास क्षेत्रसहित खडैया गाउँ नै डुबानमा परेको छ ।
बौद्ध विश्वविद्यालयका निमित्त परीक्षा नियन्त्रक इन्द्र काफ्लेले बिहान ७ बजेपछि दानव नदीमा बाढी आउँदा गाउँ नै डुबानमा परेको बताए । ‘अहिले खोला र बस्तीको पानी सम्मै छ, कोही पनि बाहिर निस्किन सक्ने अवस्था छैन,' उनले भने ।
विश्वविद्यालयको छात्रावासमा विद्यार्थी बस्दैआएका छन् । पूर्वाधार निर्माण गरिरहेका मजदुरहरु पनि सोही भवनमा आश्रय लिएका छन् । उनीहरुको अस्थायी क्याम्प नै डुबेको हो ।
विश्वविद्यालयका रजिष्ट्रार डा. तिलकराम आचार्यले पानीको सतह नघटे उद्धारको प्रयास गर्नुपर्ने बताए । ‘नदीको पानी नै पसेका कारण पानीको सतह घटिरहेको छैन, पानी नघटे उद्धार नै गर्नुपर्ने हुन्छ, बाहिर निस्किनका लागि अरु कुनै विकल्प छैन,' उनले भने । शिक्षकहरु थुनिएपछि विश्वविद्यालयको पठनपाठन समेत अवरुद्ध भएको उनले बताए ।
रुपन्देहीमा बिहीबार बिहानदेखि नै निरन्तर पानी परिरहेको छ । निरन्तरको बर्खापछि ससाना खोलाहरुमा पानीको सतह बढेको छ । लुम्बिनी क्षेत्रका अधिकांश क्षेत्र जलमग्न भएका छन् ।
बाढीले लुम्बिनी प्रदेशका तराई क्षेत्रमा बढी क्षति गरेको छ । पश्चिम नवलपरासी सदमुकाम पनि डुबानमा छ । रुपन्देहीको देवदहमा पुल भासिँदा पूर्व पश्चिम राजमार्ग अवरुद्ध भएको छ । कपिलवस्तुका दक्षिणी क्षेत्रको अधिकांश खेती र ससाना घरहरु डुबानमा परेका छन् ।
प्रतिक्रिया दिनुहोस !
