विश्‍वभर आज: चीनले सैन्य गतिविधि बढाउँदा अर्बौँको लडाकू विमान किन्दै ताइवान, काबुल हमलाको बदला लिने अमेरिकी चेतावनी

चिनियाँ सैन्य गतिविधि बढ्दा लडाकु विमानमा १.४ विलियन डलर अर्थात् १ अर्ब ४० करोड (नेपाली रकम) खर्च गर्ने ताइवानको घोषणा

ताइपेईः ताइवानले नयाँ लडाकु विमानका लागि १.४ विलियन डलर खर्च गर्ने घोषणा गरेको छ । चीनको दबाब र सैन्य गतिविधि बढ्दै जाँदा तयारी स्वरुप लडाकु विमानको लागि उक्त रकम खर्च गर्ने योजना बनाएको ताइवानले जनाएको छ ।

चीनले भने ताइवान नजिकैको एक टापुमा आफ्नो सैन्य अभ्यास गर्दैआएको छ । साथै चीनले आवश्यक परेमा ताइवानको भूभाग पनि आफ्नै नियन्त्रणमा लिनसक्ने ताइवानका कुटनीतिज्ञहरुले आशंका गरेका छन् ।

ताइवानका राष्ट्रपति साई इङ वेनको क्याविनेटद्धारा जारी विज्ञप्ति अनुसार पछिल्लो समय चीनले आफ्नो सैन्य गतिविधि बढाइरहेको छ । आफ्नो सुरक्षाका लागि ताइवान सरकारले आगामी जनवरीदेखि लागु हुने गरी वर्षेनी १६.९ विलियन डलर सैन्य गतिविधमा खर्च गर्ने योजना बनाएको छ ।

ताइवानले सुरक्षा बजेटअन्तर्गत नयाँ लडाकु विमानको लागि १.४ विलियन डलर खर्च गर्ने योजना अघि सारिएको पनि उक्त विज्ञप्तिमा उल्लेख छ । सन् २०१९ मा संयुक्त अमेरिकाले ताइवानलाई ८ विलियन डलरको एफ–१६ लडाकु विमान बिक्री गर्ने सम्झौता गरेको थियो ।
०००

अमेरिकी पूर्वराष्ट्रपति ट्रम्पमाथि मुद्दा दायर

वासिंटन: अमेरिकाका पूर्वराष्ट्रपति डोनाल्ड ट्रम्प र उनका सदस्यहरुमाथि मुद्दा दर्ता भएको छ । गत जनवरी ६ मा क्यापिटल प्रहरीमाथि आक्रमण गरिएको अभियोगमा पूर्वराष्ट्रपति ट्रम्प र उनका समर्थकहरु, रिपब्लिकन पार्टीका पूर्व अध्यक्ष रोजर स्टोन र पार्टीका सदस्यहरुविरुद्ध मुद्दा दर्ता भएको हो ।

२०२० नोभेम्बरमा भएको अमेरिकी राष्ट्रपतीय चुनाव भएको थियो । चुनावमा राष्ट्रपति जो बाइडेनको जित निश्चित भएपछि गत जनवरी ६ मा ट्रम्पको निर्देशनमा उनका समर्थकहरुले ह्वाइट हाउसनजिकै र्‍याली निकालेका थिए । राष्ट्रपति बाइडेनले चुनाव जित्ने भएपछि ट्रम्पले आयोजना गरेको र्‍याली भड्किएको थियो । भड्किएको र्‍यालीले हिंसात्मक रुप लिएको थियो ।

जसमा क्यापिटल प्रहरीमाथि आक्रमण भएको थियो । जनवरी ६ मा भएको हिंसामा पूर्वराष्ट्रपति ट्रम्प, ट्रम्पका समर्थकहरु, रोजर स्टोन र रिपब्लिकन पार्टीका सदस्यहरुको हात रहेको भन्दै उनीहरुविरुद्ध क्यापिटल प्रहरी अधिकारीहरुले बिहीबार वासिङटन डिसीस्थित फेडरल कोर्टमा मुद्दा दर्ता गराएका हुन् ।

सात प्रहरी अधिकारीहरुले दर्ता गराएको उक्त मुद्दा सिभिल राइट्स अन्तर्गत दर्ता भएको छ । ‘ट्रम्प र उनका सहयात्रीहरुले चुनावी दौडमा गरेको गैरकानुनी गतिविधिले धेरैलाई हानी पुर्‍याएको छ । यी अभियुक्तहरुले गैरकानुनी गतिविधि, हिंसात्मक कार्य, जथाभावी अश्रु ग्यास प्रहार, जातीय अपमान, घरेलु हिंसा निम्त्याउन खोजेको र नागरिकहरुलाई त्रसित पार्ने काम गरेकोले क्यापिटल आक्रमणमा संलग्नहरु विरुद्ध मुद्दा दर्ता गराइएको छ’अभियोग पत्रमा भनिएको छ ।
०००

भ्रष्टाचार आरोपमा मालीका पूर्वप्रधानमन्त्री पक्राउ

माली: अफ्रिकी मुलुक मालीका पूर्वप्रधानमन्त्री बौबेय माइगा भ्रष्टाचार गरेको आरोपमा पक्राउ परेका छन् । पदच्युत राष्ट्रपति इब्राहिम बोबाकार केइटाको शासनकालमा मालीको जेट विमान खरिद प्रकरणमा उनको संलग्नता भएको भन्दै उनलाई बुधबार पक्राउ गरिएको बताइएको छ ।

‘सन् २०१४ मा मालिको जेट विमान खरिद प्रकरणमा मुछिएको आरोपमा पूर्वप्रधानमन्त्रीलाई पक्राउ गरिए पनि उनी पक्राउ पर्नुको खास कारण भने स्पष्ट छैन । हामीलाई अहिलेसम्म मुद्दाको फायल पनि देख्न पाएका छैनौँ । त्यसैले यसबारे केही भन्न सकिने अवस्था छैन’पूर्वप्रधानमन्त्री माइगाका वकिल कासोउम टापोले भनेका छन् ।

पूर्वप्रधानमन्त्री माइगाले मालीको जेट विमान खरिदको समयमा ४० मिलियन अमेरिकी डलर हिनामिना गरेको आरोप छ । केइटा प्रशासनले जेट विमानको वास्तविक मुल्य भन्दा बढीमा खरिद गरेको बिल पेश गरेकोले पूर्वप्रधानमन्त्री माइगाले भ्रष्टाचार गरेको आलोचकहरुको दाबी छ । माइगाले सन् २०१७ देखि २०१९ सम्म मालीमा प्रधानमन्त्रीको पद सम्हालेका थिए ।
०००
टर्की र तालिबानबीच पहिलोपटक वार्ता

काबुल: टर्की र तालिबानबीच शुक्रबार पहिलो पटक वार्ता भएको टर्कीका राष्ट्रपति रजेप तैयप एर्दोगानले जानकारी दिएका छन् । वार्तामा काबुल विमानस्थल सञ्चालन गर्न प्राविधिक सहयोगका लागि टर्कीले आफ्नो सैन्य दस्ता सहयोग गर्ने उनले बताएका छन् ।

काबुलको प्राविधिक सहयोगका लागि दुई दिनअघि तालिबानले टर्कीसँग सहयोग मागेको थियो । शुक्रबार दिउँसो टर्कीका नेता र तालिबानबीच काबुलस्थित टर्कीको दूतावासमा वार्ता भएको थियो ।

टर्कीका नेता र तालिबानको भेटवार्तापछि काबुल विमानस्थल सञ्चालनमा टर्कीले प्राविधिक सहयोग गर्ने भएको छ । यसअघि टर्कीस्थित राष्ट्रपतिका प्रवक्ता इब्राहिम खानले एक सञ्चारमाध्यमसँग विमानस्थल सञ्चालनमा टर्कीले प्राविधिक सहयोग गर्ने बताएका थिए ।
०००

काबुल विष्फोटमा मृत्यु हुनेको संख्या ११० पुग्यो, दोषीसँग बदला लिने बाइडेनको चेतावनी

काबुल: काबुल विमानस्थलबाहिर बिहीबार साँझ र शुक्रबार बिहान भएको विष्फोटमा परी मृत्यु हुनेको संख्या ११० पुगेको छ । १३ अमेरिकी सैनिक र २० तालिबानीसहित मृत्यु हुनेको संख्या ११० पुगेको हो । विष्फोटमा परी १२० घाइते भएका छन् भने उनीहरुको काबुल अस्पतालमा उपचार भइरहेको छ ।

आक्रमणपछि पनि अफगानिस्तान छोड्न चाहने व्यक्तिहरुको उद्धार कार्य जारी राखिएको छ भने तालिबानले अगष्ट ३१ को समयसीमा नथपिने बताएको छ ।

अमेरिकी राष्ट्रपति जो बाइडेनले भने दर्जनौँको ज्यान जाने गरी भएको काबुल विस्फोटमा संलग्न दोषीसँग बदला लिने चेतावनी दिएका छन् । ह्वाइट हाउसस्थित सञ्चारमाध्यमसँग उनले भनेका छन्, ‘मेरो शासनकालमा हाम्रो हित र रक्षाको लागि अब कडा कदम उठाइनेछ । काबुल विष्फोटको नतिजा अब नराम्रो हुनेछ । काबुल विष्फोट गराउनेलाई कहिल्यै माफी दिइने छैन । अमेरिकाले यसको बदला लिएरै छोड्छ ।’
०००

काबुल विष्फोटमाथि चीनको निन्दा

बेइजिङ: काबुल विमानस्थल बाहिर भएको विष्फोटको चीनले निन्दा गरेको छ । बिहीबार राति र शुक्रबार बिहान भएको विष्फोटमा परी दर्जनौँले ज्यान गुमाउनु परेको भन्दै चीनले उक्त घटनाबारे चिन्ता व्यक्त गरेको चिनियाँ विदेश मन्त्रालयका प्रवक्ता जाहो लिजियानले शुक्रबार पत्रकार सम्मेलनमार्फत बताएका छन् ।

उक्त विष्फोटले अफगानिस्तानको सुरक्षा अवस्था अझै गम्भीर रहेको भन्दै सम्बन्धित समूहहरुले जिम्मेवारीपूर्ण भूमिका निभाउनु पर्ने र प्रभावकारी कदम अघि बढाउनुपर्ने बताएका छन् ।

अफगानिस्तानस्थित चिनियाँ दूतावासले सूचना जारी गर्दै चिनियाँ नागरिक, हङकङ नागरिक, मकाओ र ताइवानका नागरिकहरुलाई सुरक्षित स्थानमा बस्न आग्रह गरेको छ ।
०००

अफ्रिकामा खोपपछि कोभिड १९ को तेस्रो लहर नियन्त्रणमाः डब्ल्युएचओ

जेनेभा: अफ्रिकी मुलुकहरुमा खोप लगाउनेको संख्या बढ्दै जाँदा कोभिड १९ तेस्रो लहरका बिरामी घट्दो दरमा रहेको विश्व स्वास्थ्य संगठन (डब्ल्युएचओ) ले जनाएको छ ।

अफ्रिकाका तीन गुणाभन्दा बढी मानिसलाई कोभिड खोप लगाएपछि संक्रमितको संख्या ह्वात्तै घटेको डब्ल्युएचओका क्षेत्रिय निर्देशक मासिचो मोयतीले बताएका छन् ।

उनका अनुसार अफ्रिकाको कुल जनसंख्या १ अर्ब ३० करोडमध्ये १ करोड ३० लाखले कोभिड खोप लगाइसकेका छन् । खोपपछि संक्रमणको दर ३० प्रतिशतले घटेको छ ।

अफ्रिकामा गत मे महिनादेखि कोभिड १९ तेस्रो लहर फैलिएको थियो । डब्ल्युएचओले विकासोन्मुख मुलुकहरुमा कोभिड भ्याक्सिन वितरण गरिरहेको छ । हालसम्म २० प्रतिशत मानिसले खोप लगाइसकेको र आगामी सेप्टेम्बरसम्म थप १० प्रतिशतलाई खोप उपलब्ध गराउने डब्ल्युएचओले जनाएको छ ।
०००

भारतका दुई राज्यमा कर्फ्यू लगाउन आदेश

नयाँ दिल्लीः भारतको केरला र महाराष्ट्र प्रदेशमा रात्रीकालिन कर्फ्यू लगाउन शुक्रबार भारत सरकारले आदेश दिएको छ ।

कोभिड १९ डेल्टा भेरियन्ट संक्रमण दर बढ्दैगएको भन्दै ती प्रदेशहरुमा रात्रीकालीन कर्फ्यू लगाउन भनिएको हो । केरला र महाराष्ट्रसँगै कोरोना संक्रमण उच्च जोखिम भएका क्षेत्रहरुमा पनि रात्रीकालीन कर्फ्यू लगाउन निर्देशन दिइएको छ । पछिल्लो २४ घण्टामा भारतमा ४० हजार नयाँ संक्रमण भेटिएका छन् ।
०००

नाइजेरियामा बन्दुकधारीद्वारा ३६ स्थानीयको हत्या

नाइजर: नाइजेरियाको प्लेटो स्टेटको एक गाउँमा बन्दुकधारीले अन्दाधुन्द गोली चलाउँदा ३६ स्थानीय मारिएका छन् । 

बुधबार राति भएको यस घटनासँगै बन्दुकधारीहरुले घटनास्थल पुग्ने पुल र स्थानीयहरुका घर पनि भत्काएको नाइजेरियन सेनाले जनाएको छ । घटनास्थल पुग्ने पुल भत्किएकोले सहजै घटनास्थल पुग्न समस्या भएको समेत सेनाले बताएको छ । 

उक्त घटनामा संलग्न १० शंकास्पद व्यक्तिलाई नियन्त्रणमा लिएको बताइएको छ । नाइजेरियामा जारी जातीय द्धन्द्धका कारण उक्त घटना भएको हुनसक्ने आशंका अधिकारीहरुले गरेका छन् । उत्तर नाइजेरियाको मिडल बेल्ट भनिने क्षेत्रमा हौसा–फुलानी जातीय समूहबीच द्धन्द्ध जारी छ ।

प्लेटो स्टेटका गर्भनर सिमोन लालोङले उक्त घटनालाई ‘क्रुर हिंसा’को संज्ञा दिएका छन् । थप घटना घट्न नदिन उक्त क्षेत्रमा २४ घण्टाको लागि कर्फ्यू आदेश जारी गरिएको समेत उनले जानकारी दिए ।

घटनामा संलग्न बन्दुकधारीहरु फुलानी समुदायका मानिसहरु रहेको स्थानीयहरुले बताएका छन् । यद्यपि यसको प्रमाण भने फेला नपरेको सिएनएन न्युजले जनाएको छ । यसअघि अगष्ट १४ मा जातीय द्धन्द्धकै कारण उक्त क्षेत्रमा २२ स्थानीय मारिएका थिए ।

संयोजन: अस्मिता खड्का