मर्स्याङदी ‘ए’ बाट विद्युत उत्पादन बन्द, दैनिक एक करोड घाटा

बेसीसहर : लमजुङमा सञ्चालित ५० मेगावाटको माथिल्लो मर्स्याङदी-ए जलविद्युत अयोजनाबाट दुई महिनादेखि विद्युत उत्पादन बन्द भएको छ । गत असार १ गते मर्स्याङदी नदीमा आएको बाढीले संरचनामा क्षति पुगेपछि उत्पादन बन्द भएको हो । 

बर्षा नरोकिएको र मर्स्याङदी नदीमा बाढी आइरहेका कारण मर्मत संभारमा समेत कठिनाई भएको आयोजनाले जनाएको छ । आयोजनाको बाँधस्थलदेखि विद्युतगृहसम्म जाने सडक क्षतविक्षत छ । सो सडक मर्मत हुन सकेको छैन। 

५० मेगावाट विद्युत उत्पादन गर्ने सो आयोजना हाल बन्द हुँदा दैनिक एक करोड रुपैयाँ नोक्सानी बेहोरेको आयोजनाका जनसम्पर्क अधिकृत कर्ण अधिकारीले जानकारी दिए । दुई महिनामै ६० करोडभन्दा बढी नोक्सानी भएको उनले बताए । 

 
अधिकारीका अनुसार आयोजना मर्मत हुन अझै दुई महिना समय लाग्नेछ । आयोजनाका दुई वटै टर्वाइनहरु बिग्रीएका छन् । बाढीले पावरहाउसमा रहेको टेलबेसमा बालुवा थुपारेको छ । नयाँ टर्वाइन चीनबाट झिकाएर जडान गर्ने तयारीमा आयोजना रहेको छ । टर्वाइनबाहेक बाँधस्थल र पावरहाउसका अन्य संरचनामा पनि क्षति पुगेको आयोजनाका दोभाषे दयाराम दाहालले जानकारी दिए । 

विद्युत उत्पादन नहुँदा दैनिक करोड रुपैयाँ नोक्सानी बेहोरेको आयोजनाले मर्मतसंभार र नयाँ सामग्री खरिद, सडक सञ्जाल निर्माण आदिमा थप करोडौँ लगानी गर्नुपर्ने भएको छ । 

आयोजनाको अन्य संरचनामा अहिले पनि मर्मत कार्य जारी रहेको छ । बाँधदेखि पावरहाउस सम्मको ११ केभीए विद्युत प्रशारण लाईन र सडक संरचनामा पनि ठूलो क्षती पुगेको छ । विद्युत प्रशारण लाईन मर्मत गरिएपनि सडक संरचना भने मर्मत हुन सकेको छैन । बाढीले आयोजनाको केहि उपकरण र स्टोर गरी राखिएका लाखौ मुल्य बराबरका सामाग्री पनि बगाएको थियो । 

माथिल्लो मस्र्याङ्दी ‘ए’ जलविद्युत आयोजना सिनोहाइड्रो-सगरमाथा पावर कम्पनीले निर्माण गरेको हो। आयोजनामा चिनियाँ बहुराष्ट्रिय कम्पनीको सिनो होइड्रोको ९० र नेपालको सगरमाथा हाइड्रोपावर कम्पनीको १० प्रतिशत लगानी रहेको छ । आयोजनाले ०७३ असोजबाट विद्युत उत्पादन सुरु गरेको थियो ।