विश्वभर आज: अमेरिकी सेना फर्किएपछि तालिबानको खुसियाली, श्रीलंकामा खाद्य संकट
श्रीलंकामा आपतकालीन खाद्य संकट घोषणा
कोलम्बो: श्रीलंकाले आपतकालीन खाद्य संकट घोषणा गरेको छ । निजी बैंकहरुमा विदेशी मुद्रा आयातमा संकट सिर्जना भएसँगै श्रीलंका सरकारले आपतकालीन खाद्य संकट घोषणा गरेको हो ।
मंगलबार खाद्य संकट भएको घोषणा गर्दै श्रीलंकाका राष्ट्रपति गोतावे राजापाक्षले भनेका छन्, ‘मुलुक यतिबेला चरम आर्थिक संकटबाट गुज्रिरहेको छ । बितरक कम्पनीहरुले चीनी, चामल र अन्य अत्यावश्यक खाद्य सामग्रीको भण्डारण नरोक्न आपतकालीन नियमहरु लागु गरिएको छ ।’
अनावश्यक रुपमा खाद्य भण्डारण गर्ने र मुल्य बृद्धि गर्ने वितरक कम्पनी र पसलेहरुबाट खाद्य सामग्री जफत गर्न र पक्राउ गर्नसमेत राष्टपति राजापाक्षेले श्रीलंकन सेनालाई निर्देशन दिएका छन् ।
राजापाक्षेले चामल, दाल, चीनी र अन्य अत्यावश्यक खाद्य सामग्री निरन्तर बितरण गर्न कमिस्नर जनरल अफ इसेन्सियल सर्भिसका सेना प्रमुखलाई निर्देशन दिएका छन् ।
श्रीलंकामा कोभिड १९ को तेस्रो लहर बढेको भन्दै आगमी सोमबारसम्म कर्फ्यू लगाइएको छ भने चीनी, चामल, प्याज, आलु, दुध पाउडर, खानेतेल, खाना पकाउने ग्यास र अन्य सामग्रीको मृल्य बृद्धि भएको बताइएको छ । साथै श्रीलंकामा २०२० मार्चयता देशको अर्थतन्त्र ३.६ प्रतिशतले घटेको बताइएको छ ।
०००
भारतको इतिहासमा पहिलो पटक सर्वोच्च अदालतमा एकैपटक ९ न्यायाधीशको शपथ
नयाँदिल्ली: भारतको सर्वोच्च अदालतको इतिहासमा पहिलो पटक एकैपटक ९ न्यायाधीशले शपथ ग्रहण गरेका छन् । भारतका प्रधानन्यायाधीश एनवी रमनालद्धारा मंगलबार ९ वटै न्यायाधीशलाई एकैपटक शपथ दिलाइएका हुन् ।
मंगलबार शपथ लिनेमा तीनजना महिला न्यायाधीश पनि सामेल छन् । नयाँ न्यायाधीशको शपथसँगै भारतको सर्वोच्च अदालतमा न्यायाधीशको संख्या ३३ पुगेको छ ।
शपथ लिने न्यायाधीशहरुमा अभय श्रीनिवास ओका, विक्रम नाथ, जितेन्द्र कुमार महेश्वरी, हिमा कोहली, बी.बी नागरत्ना, सीटी रविकुमार, एमएम सुन्दरेश, बेला एम त्रिवेदी र पीएस नरसिम्हा छन् । महिला न्यायाधीश नागरत्ना सन् २०२७ मा भारतको पहिलो महिला प्रमुख न्यायाधीश बन्नसक्ने सम्भावना उच्च रहेको भारतीय सञ्चारमाध्यमले जनाएका छन् ।
शपथ ग्रहण समारोह सर्वोच्च अदालतको भवनको सभाहलमा सम्पन्न भएको थियो । यसअघि भने भारतमा नयाँ न्यायाधीशको पदको शपथ प्रधानन्यायधीशको अदालत कक्षमा दिलाउने गरिन्थ्यो ।
०००
दक्षिण अफ्रिकामा कोरोनाको नयाँ भेरियन्ट भेटियो
जोहानेसवर्गः दक्षिण अफ्रिकाका वैज्ञानिकहरुले दक्षिण अफ्रिकामा कोरोनाको नयाँ भेरियन्ट फेला परेको बताएका छन् ।
कोरोनाको नयाँ भेरियन्ट संक्रमित छ या छैन भन्नेबारे थप अनुसन्धान भइरहेको उनीहरुले बताएका छन् । सि.१.२ नामक उक्त भेरियन्ट पहिलो पटक मे महिनामा पत्ता लागेको थियो ।
हाल उक्त भेरियन्ट दक्षिण अफ्रिकी प्रान्तसहित अफ्रिका, युरोप, एसिया र ओसेनिया क्षेत्रमा फैलिएको वैज्ञानिकहरुले आफ्नो अध्ययन रिपोर्टमार्फत सार्वजनिक गरेका छन् ।
यसअघि विश्व स्वास्थ्य संगठनले दक्षिण अफ्रिकामा बेटा भेरियन्ट फेला परेको जनाएको थियो । दक्षिण वैज्ञानिकहरुले अफ्रिकामा फेला पारेको नयाँ भेरियन्टले विभिन्न रुप लिनसक्ने र चाडै संक्रमण फैलने आशंका गरे पनि नयाँ भेरियन्टबारे थप अध्ययन तथा अनुसन्धान गरिरहेको समाचार रोयटर्समा उल्लेख छ ।
०००
ब्राजिलले निर्यात गर्ने ३० प्रतिशत सुन अवैधः रिपोर्ट
रियो द जेनेरियो: ब्राजिलले निर्यात गर्ने करिब ३० प्रतिशत सुन अवैध रहेको तथ्य पत्ता लागेको छ । फेडरल युनिभर्सिटी अफ मिनास जेरेइसले उक्त तथ्य सार्वजनिक गर्दै ब्राजिलबाट संसारभर निर्यात हुने करिब ३० प्रतिशत सुन अवैध खानीबाट उत्पादन हुने र वितरण हुने गरेको बताएको छ ।
उक्त रिपोर्टअनुसार ब्राजिलले सन् २०१९ र २०२० को अवधिमा अवैध खानीमार्फत ४८. ९ टन सुन निर्यात गरेको थियो । अवैध मानिएको ब्राजिलको वाइल्डक्याट खानी लगायत क्षेत्रबाट ब्राजिलले सुन निर्यात गर्दैआएको समेत उक्त रिपोर्टमा उल्लेख छ ।
सन् २०१९ र २०२० को अवधिमा क्यानडा, स्विजरल्याण्ड र ग्रेट ब्रिटेनले ब्राजिलले निर्यात गरेको करिब ७० प्रतिशत सुन खरिद गरेको उक्त रिपोर्टले जनाएको छ ।
०००
टर्की र युएईका नेताबीच फोनवार्ता, दुई देशको सम्बन्ध सुध्रिने संकेत
टर्की: टर्कीका राष्ट्रपति रिसेप तायिप एर्दोगान र युनाइटेड अरब एमिराट्स (युएई) का शासक आबुधावी क्राउन प्रिन्स मोहम्मद विन जायिद अल नाहयानबीच मंगलबार फोनवार्ता भएको छ ।
दुई पक्षबीच भएको फोनवार्तामा क्षेत्रीय प्रतिद्धन्द्धी बीच सम्बन्ध सुधारबारे छलफल भएको बताइएको छ । टर्कीका राष्ट्रपति एर्दोगानले मंगलबार विज्ञप्ति जारी गर्दै आफूहरुबीच भएको फोनवार्तामा दुई देशबीच र क्षेत्रीय मुद्दाहरुबारे छलफल भएको जानकारी दिएका छन् ।
टर्कीका राष्ट्रपति र युएईका राष्ट्रिय सुरक्षा सल्लाहकार शेइख तनौन विन जायिद अल नाहयानबीच गत शाता भएको दुर्लभ भेटवार्तापछि दुई देशविचको सम्बन्ध सुध्रिन सक्ने संकेत देखा परेको थियो ।
एर्दोगानले एक साताअघिको भेटमा आफू आर्थिक सहकार्यमा केन्द्रित रहेको बताएका छन् । टर्कीसँग भएको भेटले अरबी मुलुकहरुबीच जारी आन्तरिक द्धन्द्धमा सुधार आउनसक्ने अन्तर्राष्ट्रिय सञ्चारमाध्यमहरुले जनाएका छन् ।
०००
अफगानिस्तानबाट सेना फिर्ता गर्नु सुधारको सुरुवात होः चीन
बेइजिङ: चीनले अफगानिस्तानबाट अमेरिकी सेना फिर्ती जिम्मेवारीको अन्त्य नभई सुधारको सुरुवात भएको बताएको छ । अमेरिकाले अफगानिस्तानबाट आफ्ना सैनिक पूर्ण रुपमा फिर्ता गरेको र उद्धार अभियान समाप्त गरेको घोषणापछि चीनले यस्तो प्रतिक्रिया दिएको हो ।
संयुक्त राष्ट्रसंघका लागि चीनका स्थायी सचिव जेन सुआङले सोमबार संयुक्त राष्ट्रसंघीय सुरक्षा परिषदमा प्रतिक्रिया जनाउँदै तालिबानको समर्थन र अफगानिस्तानको समस्या समाधान सम्बन्धी मस्यौदामा भोट गर्न आग्रह गरेका थिए ।
अफगानिस्तानको समस्या समाधान र तालिबानको समर्थनमा १३ भोट खसेको थियो भने चीन र रुस त्यसबाट अलग रहेका थिए । चीन र रुसले अफगानिस्तानको विषयमा तालिबानलाई समर्थन जनाए पनि दुबै मुलुकले पूर्ण समर्थन भने नजनाएको जेनले बताएका छन् ।
‘रुस र चीनले तालिबानको समर्थन जनाए पनि कतिपय मुद्दामा तालिबानमाथि अझै शंका छ’उनले भनेका छन्, ‘संसारका कतिपय मुलुकहरुले अझै पनि विगतबाट सिक्नुपर्छ । अमेरिकाले अहिले अफगानिस्तानबाट सेना फिर्ती गरेर आफनो जिम्मेवारी सकियो भनेर बुझ्नु हुँदैन, सुधारको सुरुवातको रुपमा लिनुपर्छ ।’
०००
तालिबान भन्छ: यो जित हाम्रो हो
काबुल: तालिबानले अफगानिस्तानलाई ‘एक स्वतन्त्र र स्वायत्त मुलुक’ घोषणा गरेको छ । अगष्ट ३१ को अमेरिकी सेना फिर्ती र अफगानिस्तान उद्धार अभियान समाप्तीसँगै मंगलबार तालिबानले यस्तो घोषणा गरेको हो ।
सन् २००१ सेप्टेम्बर ११ को ट्वीन टावर हमलापछि अमेरिकाले तालिबान सत्ता अपदस्थ गर्न आफ्नो सेना अफगानिस्तानमा खटाएको थियो । करिब २० वर्षसम्म अफगानिस्तानमा रहेको अमेरिकी सेना फिर्ती समाप्तीलाई उत्सवको रुपमा मनाउँदै तालिबानले 'ऐतिहासिक क्षण’ र अफगानिस्तान अब ‘स्वतन्त्र र पूर्ण रुपमा स्वायत्त मुलुक’ भएको घोषणा गरेको छ ।
अमेरिकी सैनिकको अन्तिम विमानले मंगलबार काबुल विमानस्थल छोडेपछि तालिबानी विद्रोहीहरुले उत्सव मनाएका थिए । ‘इस्लामिक एमिराट्स अफ अफगानिस्तान अब एक पूर्ण रुपमा स्वतन्त्र र स्वायत्त मुलुक भएकोमा कुनै शंका छैन’ मंगलबार काबुल विमानस्थलमा रिपोर्टरहरुसँग तालिबानका प्रवक्ता जाविहुल्लाह मुजाजिदले भनेका छन्, ‘अमेरिका पराजित भयो र अहिलेको यो जित हाम्रो हो । अफगानिस्तानको तर्फबाट म भन्दैछु, बाँकी विश्वसँग हामी राम्रो सम्बन्ध बनाउन चाहन्छौँ ।अफगानिस्तानको तर्फबाट अब हामीले स्वतन्त्रता, स्वाधिनता र इस्लामिक मुल्यको रक्षा गर्नेछौँ ।’
तालिबानले अफगानिस्तानबाट अमेरिकी सेना फिर्ती माग गरेपछि अमेरिकी राष्ट्रपति जो बाइडेनले सेना फिर्तीको लागि अगष्ट ३१ सम्मको समयावधी ताकेका थिए ।
संयोजन: अस्मिता खड्का