वायु प्रदूषणले भारतीयको आयु घट्यो, नयाँ सरकार घोषणाको तयारीमा तालिबान
तालिबानले तीन दिनभित्र नयाँ सरकार घोषणा गर्ने
काबुल: तालिबानले तीन दिनभित्र आफ्नो नयाँ सरकार बन्ने घोषणा गरेको छ । कतारस्थित अफगान तालिबानको राजनैतिक कार्यायलका उप प्रमुख शेर मोहम्मद अब्बास स्टानिकजइले अफगानिस्तानमा तीन दिनभित्र नयाँ सरकार बन्ने घोषणा गरेका हुन् ।
बुधबार बीबीसीसँग उनले भनेका छन्, ‘अफगानिस्तानलाई सबैतिरबाट समर्थन प्राप्त हुने गरी तालिबानले नयाँ सरकार बनाउँदैछ । तालिबान सरकार अब एक समावेशी सरकार हुनेछ । तर पछिल्लो २० वर्षदेखि सरकारमा भएका मानिसलाई नयाँ सरकारमा सामेल गराइने छैन ।’
अब्बासका अनुसार तालिबानले तीन दिनभित्र बनाउन लागेको नयाँ सरकारमा पवित्र, शिक्षित व्यक्ति र महिलालाई सामेल गराइनेछ । ‘नयाँ सरकारमा महिला सामेल गराइनेमा कुनै शंका छैन तर सरकारको मुख्य पदमा महिलालाई राख्ने या नराख्ने भन्नेबारे भने अहिले टुंगो लागिसकेको छैन’ उनले भनेका छन् ।
०००
हङकङका लोकतान्त्रिक अभियन्ताहरु जेल चलान
हङकङ: हङकङमा सात लोकतान्त्रिक अभियन्ताहरुलाई बुधबार जेल चलान गरिएको छ । सन् २०१९ मा हङकङमा चर्केको सरकार विरोधी आन्दोलनमा गैरजिम्मेवारीपूर्ण भूमिका खेलेको अभियोगमा उनीहरुलाई ११ देखि १६ महिना सम्मको लागि जेल चलान गरिएको हो ।
जसमा मुख्य अभियन्ताहरु फिगो चान, सिभिल ह्युमन राइट्स फ्रन्टका राफेल वोङ र आभेरी एनजी, सोसल डेमोक्रेट्स पोलिटिकल पार्टीका सिद हो, येयुङ सम, अल्वर्ट हो र लियुङ क्वोक हुङ छन् ।
२०१९ अक्टोबर २० को र्यालीमा १० हजारभन्दा बढी नागरिकहरु आन्दोलनमा सहभागी थिए । नागरिकहरुलाई अवैधानिक रुपमा हङकङको राष्ट्रिय सभाविरुद्ध उत्रिन उक्साएको र नागरिकहरुलाई जबर्जस्ती आन्दोलनमा सहभागी गराएको ती अभियन्ताहरुमाथि अभियोग छ।
सोही अभियोगमा बुधबार हङकङको जिल्ला अदालतका न्यायाधीश जज अमान्दा वुडककले सरकार विरोधी आन्दोलनमा लागेका लोकतान्त्रिक अभियन्तालाई जेल सजाय सुनाएकी थिइन् ।
०००
१४ वर्ष लामो नाकाबन्दी हटेपछि निर्माण सामग्री गाजा पुर्याइयो
जेरुसेलम: गत मे महिनामा इजरायली विष्फोटमा परी ध्वस्त बनेको गाजा पुनर्निमाणको लागि निर्माण सामग्री पुर्याइएको छ । दर्जनौँ ट्रकहरुमार्फत गाजा पुनर्निमाणको लागि निर्माण सामग्री बुधबार गाजा पुर्याइएको हो ।
१४ वर्षअघि देखि इजिप्ट र गाजा सिमानामा नाकाबन्दी लागेको थियो । गत मे महिनामा गाजामाथि इजरायलले हमला गरेपछि नाकाबन्दी झनै कडा बनेको थियो । गत हप्ता सयौँ प्यालेस्टेनी नागरिकहरुले गाजाको पुनर्निमाणको लागि निर्माण सामग्रीमा अनुमति दिनुपर्ने भन्दै आन्दोलन गरेका थिए ।
आन्दोलनपछि दोहोरो भीडन्त हुँदा १२ वर्षीय प्यालेस्टेनी बालक र इजरायली सीमा सुरक्षा सैनिकको मृत्यु भएको थियो भने ४१ मानिस घाइते भएका थिए । त्यसपछि इजरायलले सो नाकाबन्दी आंशिक रुपमा खुलेको बताएको थियो । प्यालेस्टेनीहरुले गरेको आन्दोलनपछि आंशिक रुपमा नाकाबन्दी खुलेसँगै निर्माण सामग्री गाजा पुगेको बताइएको छ ।
करम अबु सलेमका निर्देशक बसम गाविनका अनुसार ३० ट्रक सिमेन्ट, १२० ट्रक ग्राभेल र १५ ट्रक स्टिल गाजा आइपुगेको छ । गाजाले निर्माण सामग्री आयातमा गत सोमबारदेखि अनुमती पाएको थियो ।
मे महिनामा इजरायलले गाजामाथि गरेको हमलामा परी ६७ बालबालिका र ३९ महिलासहित २६० प्यालेस्टेनी नागरिकले ज्यान गुमाएका थिए भने थुप्रै घाइते भएका थिए । विष्फोटमा परी हजारौँ भवनहरुमा पूर्ण रुपमा क्षती पुगेको थियो ।
हाल गाजामा २ लाखभन्दा बढी आवासीहरु बस्दैआएका छन् । उनीहरुको लागि खाद्य सामग्री र खाना पकाउने ग्यास र भवन निर्माण सामग्री उपलब्ध गराएको बताइएको छ । केही महिला अघि इजिप्टले गाजाको पुनर्निमाणमा सघाउने घोषणा गरेको थियो ।
०००
तालिबानलाई अलग्याए नराम्रो परिणाम हुने कतारको चेतावनी
दोहाः कतारका विदेशमन्त्री शेख मोहम्मद विन अब्दुल्ल रहमानले तालिबानलाई अलग्याए परिणाम नराम्रो हुने चेतावनी दिएका छन् । शक्ति राष्ट्रहरुले तालिबानको बेवास्ता गर्दै अलग्याउन खोजेमा तालिबानले फेरि अस्थिरता पैदा गर्नसक्ने उनको चेतावनी छ । शक्ति राष्ट्रहरुले तालिबानसँग राम्रो सम्बन्ध कायम राख्न अपिल गर्दै कतारका विदेशमन्त्री रहमानले भनेका छन्, ‘तालिबानसँग शर्त राखेर नभएर राम्रो सम्बन्धमार्फत अघि बढ्नु पर्छ । तालिबानसँगको राम्रो सम्बन्ध सुरक्षाको लागि मात्र नभई सामाजिक र आर्थिक विकासको लागि पनि जरुरी छ । त्यसैले तालिबानलाई अलग्याएर हैन, सम्बन्ध राम्रो बनाएर अघि बढ्नुपर्छ ।’
सन् २०१३ देखि तालिबानले कतारमा आफ्नो शाखा विस्तार गरेको बताइन्छ । कतारबाटै अमेरिकालगायत अन्य मुलुकसँग तालिबानले छलफल गरेको थियो । कतारले तालिबान र अन्य मुलुकबीच मध्यस्तकर्ताको भूमिका निभाउँदैआएको अन्तर्राष्ट्रिय मिडियाले जनाएका छन् ।
०००
वायु प्रदूषणका कारण भारतीय नागरिकको आयु ९ वर्ष कमः अध्ययन
नयाँदिल्ली: वायु प्रदूषणका कारण भारतीय नागरिकको आयु पछिल्लो २० वर्षको अन्तरमा ९ वर्ष कम हुने एक अध्ययनले देखाएको छ । भारतका मुख्य शहरमा हुने वायु प्रदूषणको असर मानवीय स्वास्थ्यमा परेको भन्दै मानिसको उमेर निकै घट्दो दरमा रहेको उक्त रिपोर्टले जनाएको छ ।
दी एनर्जी पोलिसी इन्स्टिच्युट, सिकागो विश्वविद्यालयअन्तर्गत अमेरिकी अन्वेषकहरुको समूहले सार्वजनिक गरेको उक्त अनुसन्धान अनुसार भारतको उत्तरी क्षेत्रका करिब ४ करोड ८० लाख मानिसहरु वर्षेनी चरम वायु प्रदूषणको मारमा पर्ने गरेका छन् ।
यसबाहेक भारतका मुख्य शहरहरुमा उत्पन्न हुने प्रदुषित वायुका कारण वर्षेनी लाखौँ मानिसले ज्यान गुमाउने गरेका छन् । संसारका अन्य क्षेत्रमा बस्ने मानिसको तुलनामा भारतको मुख्य शहरमा बसोबास गर्ने मानिसले १० गुणा खराब स्वास फेर्ने गर्छन् । नयाँदिल्ली, महाराष्ट्र, मध्य प्रदेश आदि वायु प्रदूषणले ग्रसित क्षेत्रमा बस्ने मानिसहरुको औसत आयु सन् २००० को तुलनामा ९ वर्षले कम हुँदै गएको छ । सफा वायु हुने क्षेत्रमा बस्ने मानिसहरुको आयु औसतभन्दा ६ वर्ष बढी हुने समेत उक्त अध्ययनले देखाएको छ ।
०००
आवश्यक परेमा अमेरिकाले अफगानिस्तानमाथि ड्रोन हमला जारी राख्ने
वासिङटनः आवश्यक परेको खण्डमा अमेरिकाले अफगानिस्तानमाथि ड्रोन हमला जारी राख्ने जनाएको छ । मंगलबार अमेरिकी सेना पूर्ण रुपमा फिर्ता गरेको उपलक्ष्यमा अमेरिकाको रक्षा विभागले यस्तो चेतावनी दिएको हो ।
मंगलबार राति अमेरिकी सुरक्षा विभागका सूचना अधिकारी जोन किर्वीले भनेका छन्, ‘अफगानिस्तानमा अब हाम्रा सेनाको उपस्थिति छैन तर अमेरिकाको तर्फबाट हाम्रो रक्षा विभागले आइएसआइएस के र अफगानिस्तानभित्र रहेका अन्य खतरनाक गतिविधिविरुद्ध आवश्यकताअनुरुप ड्रोन हमला भने जारी राख्ने छ ।'
काबुल विमानस्थलबाहिर गत बिहीबार आइएसआइएस के ले गरेको हमलामा परी १३ अमेरिकी सैनिकसहित १७० ले ज्यान गुमाएका थिए । त्यसको जवाफी हमला स्वरुप अमेरिकाले ड्रोम हमला गरेको थियो । जसमा काबुल हमलाका मुख्य योजनाकार मारिएको दाबी अमेरिकाले गरेको थियो । बिहीबार भएको हमलापछि काबुलमा २ सयभन्दा बढीले ज्यान गुमाएका थिए ।
फक्स न्युजका अनुसार यदी भविष्यमा कुनै खतराको अवस्था सिर्जना भएमा पेन्टागोनस्थित अमेरिकी रक्षा विभागले अफगानिस्तानमा ड्रोन हमला जारी राख्ने संकेत किर्वीले दिएका छन् ।
०००
अज्ञात रोगका कारण भारतमा दर्जनौँ बालबालिकाको मृत्यु
नयाँदिल्ली: भारतमा अज्ञात ज्वरोका कारण दर्जनौँ बालबालिकाको मृत्यु भएको छ । भारतको उत्तर प्रदेशका ६ वटा जिल्लाहरुमा गत शातादेखि देखिएको अज्ञात ज्वरोका कारण दर्जनौँ बालबालिकासहित ५० को मृत्यु भएको र सयौँ विरामी अस्पतालमा भर्ना भएको बीबीसीले जनाएको छ ।
उक्त क्षेत्रका बालबालिका र अन्य मानिसहरु उच्च ज्वरो र शरीरमा चिडचिड पसिना आउने समस्याले ग्रसित छन् । तीमध्ये ज्वरोका अधिकांश विरामीमा हाडजोनी दुख्ने, टाउको दुख्ने, शरीरमा पानी कम हुने र रिंगटा लाग्ने समस्या देखिएको छ भने कतिपयमा हात खुट्टामा डावर देखा परेको बताइएको छ ।
चिकित्सकहरुका अनुसार आग्रा, मथुरा, मनीपुर, इथा, कोशगंज, फिरोजबाद लगायत जिल्लाहरुमा डेंगु फैलिएको छ । जसका कारण कैयौँको ज्यान गुमेको छ । तर पछिल्लो समय देखा परेको अज्ञात ज्वरो भने डेंगुभन्दा फरक रहेको चिकित्सकहरुले बताएका छन् । अज्ञात ज्वरोका विरामीको कोरोना परीक्षण गर्दा कोरोनासमेत नदेखिएको चिकित्सकले बताएका छन् ।
‘अज्ञात ज्वरोले थला पर्नेमा सबैभन्दा बढी बालबालिकाहरु छन्’ फिरोजाबादस्थित विरामीको उपचारमा खटिएकी डा. निता कुल श्रेष्ठले भनेकी छन्, ‘विगत एक हप्तामा ३२ बालबालिका र ४० अन्य मानिसको मृत्यु भइसकेको छ । यी विरामीको कोरोना परीक्षण गर्दा कोरोना देखाएको छैन । हामीले यसलाई अज्ञात ज्वरो नै मानेका छौँ ।’
संयोजन: अस्मिता खड्का