भारतमा कोरोना संक्रमण दर उच्च, उत्तर कोरियाले अस्वीकार गर्यो चिनियाँ कोरोना खोप
आईएसविरुद्ध अमेरिकाले तालिबानसँग मिलेर काम गर्नसक्ने
वासिंटन: इस्लामिक स्टेट आईएस के विरुद्ध लड्न अमेरिकाले तालिबानसँग मिलेर काम गर्नसक्ने बताइएको छ । अमेरिकी सेना प्रमुख मार्क मिलेले आईएस के र अन्य विद्रोही समूहविरुद्ध लड्न अमेरिकाले चाँडै तालिबानसँग सहकार्य गर्नसक्ने बताएका छन् ।
‘युद्धमा जुन मिसनको लागि खटिएको हो सोही अनुरुप कदम चाल्नुपर्छ र बल प्रयोग गर्नुपर्छ’उनले भनेका छन्, ‘अफगानिस्तानको अन्तिम मिसन सफल हुनुमा तालिबानको भूमिका छ । हाम्रो मिसन असफल बनाउन अन्तिम पटक आईएस के र अन्य विद्रोही समूहले गरेको हमलाको विरुद्ध तालिबान पनि आक्रोशित छ । त्यसैले विद्रोही समूहसँग लड्न अमेरिकाले तालिबानसँग मिलेर सहकार्य गर्न सम्भव छ ।’
काबुल अन्तर्राष्ट्रिय विमानस्थलमार्फत करिब १ लाख २४ हजार नागरिक उद्धारमा विगत तीन हप्तादेखि तालिबानले अमेरिकी सेनालाई सहयोग गरेको समेत उनले बताएका छन् ।
सन् २००१ सेप्टेम्बर ११ को हमलापछि अमेरिकाले आफ्नो सेना अफगानिस्तानमा खटाएको थियो । करिब २० वर्ष लामो समयसम्म अफगानिस्तानमा खटिएको अमेरिकी सेना अगष्ट ३१ देखि पूर्ण रुपमा स्वदेश फिर्ता भएको छ ।
अमेरिकी राष्ट्रपति जो बाइडेनले काबुल विमानस्थलमा १३ अमेरिकी सेना र २० तालिबान सदस्यसहित १७० को ज्यान जाने गरी आई एस के ले गरेको आत्मघाती हमलाको बदला लिने बताउँदै आएका छन् ।
०००
अमेरिकाको खराब सम्बन्धले जलवायु सहयोग खतरामा पर्ने चीनको चेतावनी
बेइजिङ: अमेरिकाको खराब सम्बन्धले जलवायु सहयोग खतरामा पर्ने चीनले चेतावनी दिएको छ । चिनियाँ विदेशमन्त्री वाङ यीले चीनसँग अमेरिकाको खराब सम्बन्धका कारण विश्वको तापक्रम बृद्धि र जलवायु परिवर्तन सहयोग खतरामा पर्ने चेतावनी दिएका हुन् ।
बुधबार अमेरिकी जलवायु दूत जोन केरीसँगको भेटमा वाङले चीन र अमेरिकाबीच खराब सम्बन्धका कारण अमेरिकाले जलवायु सहयोगलाई वातावरणबाट व्यापक रुपमा अलग गर्न नहुने उल्लेख गर्दै भनेका छन्, ‘अमेरिकाले सम्बन्ध सुधार्न सक्रिय कदम चाल्नु पर्छ । दुई देशीय सम्बन्ध सुधार नभएसम्म जलवायु परिवर्तन सम्बन्धी विश्वव्यापी सहयोग दीगो हुन सक्तैन । त्यसैले अमेरिकाले चीनलाई ‘खतरा’ र ‘प्रतिद्धन्द्धी’को दृष्टिबाट हटाएर संसारको लागि संयुक्त रुपमा जलवायु परिवर्तन संकट कम गर्न सक्रिय कदम चाल्नुपर्छ ।’
जलवायु वार्ताको लागि केरी चीनको तियान्जिन शहरको भ्रमणमा छन् । जलवायु संकट कम गर्न अन्य मुलुकसँग अमेरिका प्रतिबद्ध रहेको र चीनले पनि सक्रिय भूमिका खेल्नुपर्ने केरीले बताएका छन् । उनले विश्वको तापक्रमलाई १.५ डिग्री सेल्सियसमा कायम राख्ने प्रतिबद्धतामा चीनले पनि सहभागिता जनाउनुपर्नेमा जोड दिएका छन् ।
करिब चार वर्षअघि अमेरिकाका पूर्व राष्ट्रपति डोनाल्ड ट्रम्पले विश्व जलवायु कुटनीतिमा बदलाव ल्याएपछि अमेरिकाले जलवायु सहयोगमा हात झिक्ने आशंका गरिएको थियो ।
बढ्दो जलवायु संकट कम गर्न केरी र चिनियाँ विदेशमन्त्री बीच भएको भेटले उल्लेखनीय भूमिका खेल्ने विश्वास जलवायु पर्यवेक्षकहरुले गरेका छन् ।
यदी चीन र अमेरिकाले जलवायु संकट रोक्न तिब्र कदम नचालेमा संसार मरुभुमिमा परिणत हुने चेतावनी वातावरणीय समूह ग्रीनपिसका जलवायु सल्लाहकार ली साउओले दिएका छन् ।
संसारमा हरितगृह ग्यास उत्सर्जन गर्नेमा अमेरिकापछिको दोस्रो ठूलो मुलुक चीन हो । चीनले हाल २० प्रतिशतका दरले कार्बन उत्सर्जन घटाएको बताए पनि सन् २०३० पछि मात्र कार्बन उत्सर्जन घटाउन कदम चाल्ने बताएको थियो । अमेरिकी राष्ट्रपति जो बाइडेनले सन् २०३० सम्ममा अमेरिकाको हतिरगृह ग्यास उत्सर्जन ५२ प्रतिशतले घटाउने लक्ष्य राखेका छन् ।
जुन पूर्व अमेरिकी राष्ट्रपति बाराक ओबामाले सन् २०१५ मा पेरिस सम्मेलनमा राखेको लक्ष्यभन्दा दोब्बर लक्ष्य हो । संयुक्त राष्ट्र संघको जलवायु परिवर्तनसम्बन्धी सम्मेलन अर्थात् कप २६ आगामी नोभेम्बरमा स्कटल्याण्डमा हुँदैछ ।
०००
भारतमा कोरोना संक्रमण दर उच्च
नयाँदिल्ली: भारतमा कोभिड १९ डेल्टा भेरियन्ट संक्रमण दर हालसम्मकै उच्च रहेको बताइएको छ । बिहीबार सार्वजनिक रिपोर्ट अनुसार दुई महिनाको अन्तरालमा भारतमा कोरोना संक्रमित दर उकालो लाग्दै गएको बताइएको छ ।
चाडपर्व र विद्यालयहरु सञ्चालन गरेकोले केरला प्रदेशमा संक्रमण दर तिब्र रुपमा फैलिएको र देशभर संक्रमण फैलन सक्ने चिन्ता भारत सरकारले गरेको छ ।
केरला प्रदेशका स्वास्थ्यमन्त्री मंशुख मन्दभियाका अनुसार केरला प्रदेशमा मात्र पछिल्लो हप्ता मात्र ७० प्रतिशत नयाँ संक्रमित थपिएको र बिहीबार नयाँ संक्रमितको संख्या ४७ हजारभन्दा बढी पुगेका छन् ।
यो संख्या पछिल्लो दुई महिनायताकै उच्च रहेको बताउँदै उनले भारत सरकारलाई कोरोना प्रभावित क्षेत्रमा चाँडो कोभिड विरुद्धको खोप उपलब्ध गराउन माग गरेका छन् ।
‘भारत सरकारले केरलाका अति प्रभावित जिल्लाहरुमा चाँडोभन्दा चाँडो खोप उपलब्ध गराउनु पर्छ । हैन भने संक्रमण देशभर तिब्र रुपमा फैलिने सम्भावना उच्च छ’ स्वास्थ्यमन्त्री मंशुख मन्दभियाले भने ।
भारतमा हाल ३ करोड २९ लाख संक्रमित रहेको बताइएको छ । अमेरिकापछि संसारमा सबैभन्दा बढी कोरोना संक्रमित भारतमा रहेको बताइएको छ । भारतमा डेल्टा भेरियन्टबाट बिहीबार ५०९ को मृत्यु भएको बताइएको छ ।
०००
उत्तर कोरियाद्वारा ३० लाख चिनियाँ कोभिड खोप अस्वीकार
प्योङयाङ: उत्तर कोरियाले ३० लाखभन्दा बढी चिनियाँ खोप लिन अस्वीकार गरेको छ । युनिसेफकाअनुसार उत्तर कोरियाले उक्त खोप अन्यत्र प्रदान गर्न भन्दै खोप लिन अस्वीकार गरेको हो ।
‘कोभिड १९ अन्तर्राष्ट्रिय खोप वितरण कार्यक्रम कोभ्याक्समार्फत चीनमा बनेको करिब ३० लाख डोज सिनोभ्याक उत्तर कोरियालाई उपलब्ध गराउन खोजिएको थियो । तर उत्तर कोरियाले आफूलाई नभई गरिब मुलुक र अति प्रभावित क्षेत्रमा वितरण गर्न भन्दै सो खोप अस्वीकार गरेको छ’ युनिसेफका एक प्रवक्ताले इमेलमार्फत भनेका छन् ।
यसअघि कोभ्यास कार्यक्रमअन्तर्गत उत्तर कोरियामा चिनियाँ खोप पठाउन सकिने बताइएको थियो । करिब १ महिनापछि जवाफ फर्काउँदै उत्तर कोरियाले आफूले कोभिड खोप नलिने बताएको छ ।
यसअघि जुलाइमा कोभिड १९ विरुद्धको रुसले उपलब्ध गराएको खोप र एस्ट्राजेनिका खोप पनि उत्तर कोरियाले अस्वीकार गरेको थियो । त्यसबेला रुसले उपलब्ध गराएको खोपमा असर देखिएको भन्दै उत्तर कोरियाले उक्त खोप अस्वीकार गरेको थियो ।
दक्षिण अफ्रिकी थिंक ट्यांक इन्स्टिच्युट फर नेसनल सेक्युरिटी स्ट्राटेजी–आइएनएसएस) को एक रिपोर्टअनुसार चिनियाँ खोपको प्रभावकारीतामाथि उत्तर कोरियाले शंका गरे पनि रुसले बनाएको खोप प्रयोग गर्न भने इच्छुक थियो ।
अगष्ट १९ सम्ममा उत्तर कोरियामा कोभिड संक्रमण नभेटिएको विश्व स्वास्थ्य संगठनले जनाएको छ । उत्तर कोरियाले कोभिड नियन्त्रणलाई ध्यानमा राख्दै गत जनवरीदेखि अन्तर्राष्ट्रिय सीमा बन्द गराएको छ ।
०००
आइभोरी कोस्टका टिभी प्रस्तोतालाई जेल सजाय
आइभोरी कोस्ट: पश्चिम अफ्रिकी मुलुक आइभोरी कोस्टका एक टेलिभिजन प्रस्तोता (होस्ट)लाई १२ महिनाको लागि जेल सजाय सुनाइएको छ । बलात्कारका आरोपीलाई टिभीको मुख्य शोमा बोलाएको र उनलाई शोमार्फत माफी गर्न लगाएको भन्दै टिभी प्रस्तोता एविज दे एमबेल्लालाई जेल सजाय सुनाइएको हो ।
टिभी प्रस्तोता एमबेल्लालाई आइभोरी कोस्टको श्रव्यदृश्य प्रशासनले १२ महिनाको जेल सजायसँगै ३ हजार ६ सय अमेरिकी डलरको जरिवाना समेत सुनाएको छ ।
टिभी प्रस्तोता एमबेल्लाले निजी क्षेत्रबाट सञ्चालित एनसिआई टिभी च्यानलमार्फत बलात्कारको आरोप लागेका व्यक्तिको अन्तर्वार्ता प्रसारण गरेका थिए । उक्त च्यानलमार्फत प्रशारित प्राइम शोमा बलात्कार आरोपीले आफूले पीडितमाथि बलात्कार गरेको घटनाक्रमहरु हाँस्दै बताएका थिए ।
उक्त कार्यक्रम हेरेपछि भड्किएका ५० हजारभन्दा बढी दर्शक एवम् श्रोताहरुले टिभी प्रस्तोतालाई कारवाहीको माग गर्दै टिभी च्यानल र च्यानलमार्फत प्रशारित कार्यक्रम बन्द गर्न माग गरेका थिए ।
०००
नाइजेरियाका ७० विद्यार्थी बन्दुकधारीको कब्जामा
नाइजर: उत्तर पश्चिम नाइजेरियाको उच्च माध्यामिक विद्यालयका करिब ७० भन्दा बढी विद्यार्थी बन्दुकधारीको कब्जा (अपहरण)मा रहेको नाइजेरियन प्रहरीले जनाएको छ ।
पछिल्लो समय विभिन्न विद्यालयमा गरेको आक्रमणपछि बन्दुकधारीले विद्यालयका बालबालिकालाई लक्षित बनाएको प्रहरीले जनाएको छ ।
नाइजेरियाको जामफारा स्टेट प्रहरी प्रवक्ता मोहम्मद शेहुका अनुसार बन्दुकधारीको ठूलो समूहले विद्यालयका बालबालिकालाई लक्षित गरेका छन् । बन्दुकधारीले बुधबार मात्र ७३ विद्यार्थीलाई आफ्नो कब्जामा लिएका छन् ।
प्रहरीको समूहले ती विद्यार्थीहरुको उद्धार कार्य अघि बढाएको र उद्धारपछि सेनाले विद्यार्थीलाई सेनाले सार्वजनिक गर्ने तयारी गरिरहेको प्रवक्ता शेहुले बताएका छन् । डिसेम्बरयता नाइजेरियामा १ हजारभन्दा बढी विद्यार्थीहरु अपहरणमा परेको बताइएको छ ।
०००
अमेरिकी सर्वोच्च अदालतद्धारा टेक्सासको गर्भपतन प्रतिबन्ध रोक्न अस्वीकार
वासिंटन: संयुक्त राज्य अमेरिकाको सर्वोच्च अदालतले टेक्सास राज्यले पारित गरेको गर्भपतन सम्बन्धी प्रतिबन्ध रोक्न अस्वीकार गरेको छ । सर्वोच्च अदालतका न्यायाधीशहरुले बिहीबार बिहान गर्भपतन सेवा प्रदायक निकायहरुले उपलब्ध गराउँदैआएको सेवा कार्यान्यवन रोक्न टेक्सासले पारित गरेको प्रतिबन्ध अस्वीकार गरेका हुन् ।
राज्य टेक्सासले ६ हप्तामाथिको गर्भपतनमा रोक लगाउन बुधबार नयाँ कानून पारित गरेको थियो । टेक्सास राज्यले ‘हर्टविट ऐन’ नामक ऐनमार्फत बुधबार ६ हप्तामाथिको गर्भपतनमा रोक लगाउन आदेश दिएको थियो । सो कानून कार्यान्वयनमा नआउँदै सर्वोच्च अदालतले अस्वीकार गरेको छ ।
टेक्सासको कानूनले अमेरिकी संधिधानको मर्मविपरीत विना निचोड गर्भपतनमा प्रतिबन्ध लगाउन खोजेकोले सर्वोच्च अदालतले गर्भपतन प्रतिबन्ध रोक्न अस्वीकार गरेको न्यायाधीशहरुले बताएका छन् ।
सर्वोच्च अदालतले गरेको निर्णयको स्वागत गर्दै अमेरिकी राष्ट्रपति जो बाइडेनले महिलाको संवैधानिक हकको कदर गर्नुपर्ने बताएका छन् । अमेरिकामा सन् १९७३ देखि गर्भपतनले मान्यता पाउँदै आएको छ ।
गर्भपतनका समर्थकहरुले टेक्सासले नाटकीय रुपमा गर्भपतनमाथि प्रतिबन्ध लगाएको भन्दै बुधबार चर्को आलोचना गरेका थिए । गर्भपतनसम्बन्धी नयाँ कानून लागु भएपछि राज्यमा हुने ८५ प्रतिशत गर्भपतन निषेध हुने र गर्भपतनको मुद्दामा कडा नियम लागु गर्ने टेक्सास अमेरिकाकै पहिलो राज्य हुने अधिकारीहरुले बताएका छन्।
०००
आँधीका कारण न्युयोर्कमा संकटकाल घोषणा
वासिंटन: उत्तरपूर्वी अमेरिकाको न्युयोर्क राज्यमा समुद्री तुफानका कारण शहरमा बाढी पस्दा संकटकाल घोषणा गरिएको छ । हुरिकेन इदाको कारण न्युयोर्क शहरमा भीषण बाढी आउँदा बिहीबार आपतकालीन संकटकालको घोषणा गरिएको हो । भीषण बाढीका कारण न्युयोर्क शहरमा हालसम्म ९ मानिसको मृत्यु भएको रिटनर्सले जनाएको छ ।
न्युयोर्क राज्यका गर्भनर केथी होचुलले बिहीबार बिहान ट्विटमार्फत ऐतिहासिक मौसमी घटना बताउँदै संकटकालको घोषणा गरेका छन् । उनले भनेका छन्, ‘यो एक ऐतिहासिक मौसमी घटना हो । हुरिकेन इदाले न्युयोर्कवासीहरु निकै प्रभावित बनेकोले मैले बिहीबार बिहानदेखि आगामी तीन दिनसम्मका लागि संकटकालको घोषणा गरेको छु ।’
न्युयोर्कको चर्चित सेन्ट्रल पार्कमा एक घण्टाभित्र करिब ८ सेन्टिमिटर पानी परेको छ भने शहरभित्रको भूमिगत रेल सेवा र हवाई सेवा बन्द गरिएको छ । गत आइतबारदेखि अमेरिका प्रवेश गरेको हुरिकेन इदाले पहिलो चरणमा लुइजिनिया, न्यु जर्सी राज्यमा वितन्डा मच्चाएको थियो ।
शक्तिशाली हुरिकेन इदाको कारण उत्तर पूर्वी अमेरिकाका विभिन्न राज्यहरुमा भारी वर्षा र भीषण बाढी गएको समाचार छ । न्युयोर्कसँगै न्यु जर्सीमा पनि आगामी तीन दिनको लागि संकटकाल घोषणा गरिएको छ ।
संयोजन: अस्मिता खड्का