इमरान खानको शासनकालमा पाकिस्तानको खर्बौँ ऋण बढ्यो, म्यानमारमाथि बेलायतको नयाँ प्रतिबन्ध

इमरान खानको शासनकालमा पाकिस्तानको ऋण २३८ खर्ब पुग्यो

इस्लामाबाद: पाकिस्तानका प्रधानमन्त्री इमरान खानको शासनकालमा पाकिस्तानको आर्थिक ऋण बढेर २३८ खर्ब पुगेको छ । इमरान खानको तीन वर्षे शासनकालमा पाकिस्तानको ऋण बढेर २३८ खर्ब पुगेको शुक्रबार सार्वजनिक एक सरकारी प्रतिवेदनले देखाएको छ ।

सेन्ट्रल बैंक अफ पाकिस्तानद्वारा सार्वजनिक सरकारको वार्षिक प्रतिवेदन अनुसार पाकिस्तानको कुल ऋण ६३८ खर्ब रहेको छ भने इमरान खानको शासन काल अर्थात् तीन वर्षको अन्तरालमा २३८ खर्ब पुगेको छ ।

पाकिस्तानका स्थानीय मिडियाका अनुसार पाकिस्तान पिपुल्स पार्टी र १० वर्षे पाकिस्तान मुस्लिम लिग नवाज सरिफको पालामा पाकिस्तानको ऋण ८० प्रतिशतले बढेको थियो। पाकिस्तानमा सार्वजनिक ऋण पनि ८ प्रतिशतले बढिरहेको स्थानीय सञ्चारमाध्यमहरुले जनाएका छन् । कोभिड महामारीको समयमा पाकिस्तानको ऋण झनै बढेको हुनसक्ने न्युज इन्टरनेसनलले जनाएको छ ।
०००

तालिबानका सहसंस्थापकले नयाँ सरकारको नेतृत्व गर्ने

काबुलः अफगानिस्तानमा तालिबानका सह संस्थापक मुल्लाह अब्दुल घानी बरादरले नयाँ बन्ने सरकारको नेतृत्व गर्ने स्रोतको हवाला दिँदै अन्तर्राष्ट्रिय मिडियाले जनाएका छन् । रिटर्नसका अनुसार तालिबानले सम्भवत शुक्रबार साँझ नयाँ सरकारको घोषणा गर्ने तयारी गरिरहेको छ । नयाँ बन्ने तालिबान सरकारमा प्रधानमन्त्री र राष्ट्रपति पनि सामेल हुनेछन् । २५ मन्त्रालयको मन्त्रिपरिषद बन्ने समेत स्रोतले जनाएको छ ।

वरिष्ठ पदको जिम्मेवारीमा मुल्लाह मोहम्म्द याकुब, तालिबानका सह संस्थापकका छोरा मुल्ला ओमार र शेर मोहम्मद अब्बास स्तानेक्जाइ लगायत हुने बताइएको छ ।

नयाँ बन्ने सरकारले देशको पुर्ननिर्माण, भोकमरी संकट कम गर्न र आर्थिक विकासलाई प्राथमिकतामा दिने बताइएको छ । ‘नयाँ बन्ने सरकारका सबै शीर्ष नेताहरु काबुल आइपुग्नु भएको छ । अब सरकार घोषणा गर्न मात्र बाँकी छ’ तालिबानका एक अधिकारीले रिटनर्ससँग भनेका छन् ।
०००

म्यानमारमाथि बेलायतको नयाँ प्रतिबन्ध घोषणा

लण्डनः बेलायतले म्यानमारमाथि नयाँ प्रतिबन्धको घोषणा गरेको छ । सैन्य सरकारको लागि सैन्य सामग्री र आर्थिक सहयोगमा बेलायतले म्यानमारमाथि नयाँ प्रतिबन्ध घोषणा गरेको हो ।

बेलायतको विदेश मन्त्रालयका अनुसार म्यानमारको एचटु ग्रुप कम्पनी र कम्पनीका संस्थापक ताइ जाले सैन्य सरकारको तर्फबाट सैन्य सामग्री किनबेचमा ठूला व्यापारी संलग्न गराएको बताउँदै सम्पत्ति रोक्का गर्न लगाएको थियो ।

सन् २०१७ मा रोहिङ्ग्या हटाउन एटु ग्रुपले आर्थिक सहयोग गरेको समेत बताइन्छ । सोही कारण देखाउँदै बेलायतले म्यानमानरविरुद्ध नयाँ प्रतिबन्ध लगाएको बताइएको छ । यसअघि बेलायतले फेब्रुअरीको कू पछि म्यानमारका व्यक्ति र संस्थामाथि प्रतिबन्ध लगाएको थियो ।

‘म्यानमारको सैन्य समूहले म्यानमारका जनतासहित हाम्रा साझेदारहरुमाथि क्रूर व्यवहार गरिरहेको छ’ बेलायतको विदेश मन्त्रालयका सचिव डोमिनिक र्‍याबले भनेका छन्, ‘सेनाहरुले बालबालिकासहित निर्दोष जनता मारिरहेका छन् । त्यसको विरुद्ध बेलायतले म्यानमारको सैन्य समूहको लागि आर्थिक सहयोग र  सैन्य सामग्रीमा सहयोगमा प्रतिबन्ध लगाएको छ ।’

नयाँ प्रतिबन्धपछि बेलायतले एचटु ग्रुपको लागि सामग्री र संस्थापक ताइ जा र अन्य धनाढ्यहरुलाई बेलायत प्रवेशमा पनि रोक लगाएको छ । गत फेब्रुअरीमा म्यानमारको सेनाले कू गरेयता सैन्य शासनविरुद्ध आन्दोलित करिब १ हजार ४५ भन्दा बढीले ज्यान गुमाइसकेका छन् ।
०००

जापानका प्रधानमन्त्री सुगा पार्टीको चुनावमा नउठ्ने

टोक्यो: जापानका प्रधानमन्त्री योसीहिदे सुगाले शुक्रबार आफू पार्टीको चुनावमा नउठ्ने घोषणा गरेका छन् । उनले आगामी महिना हुने सत्ताधारी पार्टी लिबरल डेमोक्रेटिक पार्टीको चुनावी मैदानमा नउठ्ने घोषणा गरेका हुन् ।

टोक्योस्थित शुक्रबार पत्रकारहरुसँग उनले भनेका छन्, ‘चुनावी दौडमा उत्रिन र कोरोना भाइरस व्यवस्थापन गर्नको लागि प्रसस्त उर्जा चाहिन्छ । चुनावी दौडभन्दा मैले मेरो उर्जा कोरोना नियन्त्रणमा खर्चिनेछु । त्यसैले म आगामी चुनावमा लड्नेछैन ।’

गत सेप्टेम्बरमा आफ्नो स्वास्थ्य अवस्था खराब भएको कारण देखाउँदै पूर्वप्रधानमन्त्री सिन्जो आवेले राजीनामा दिएपछि ७२ वर्षीय सुगा प्रधानमन्त्रीको पदमा नियुक्त भएका हुन् । 

प्रधानमन्त्रीको सुगाको घोषणापछि उनको पार्टीका शीर्ष नेताले आफूहरु चकित परेको बताएका छन् । ‘कोरोना भाइरसविरुद्ध लड्नमा केन्द्रिन हुने भन्दै प्रधानमन्त्रीले आफ्नो पार्टीको चुनावमा नउठ्ने घोषणा गर्नुभएको छ । उहाँको निर्णयले हामी अचम्मित बनेका छौँ । उहाँले सोचेरै यो निर्णय लिनुभएको हो । उहाँको लागि यो निकै उचित निर्णय हो तर गहिरिएर सोच्ने हो भने यो वास्तवमै खेदजनक छ’ लिबरल डेमोक्रेटिक पार्टीका सचिव तोसिहाइरो निकाईले भनेका छन् ।

प्रधानमन्त्री सुगाले चुनावमा नउठ्ने घोषणा गरेसँगै महामारीसँग जुध्न उनको सरकारसँग निकै कम समय बाँकी रहनेछ । आफ्नो लक्ष्य पूरा नभएमा सुगाले आफ्नो पदबाट राजीनामा दिने घोषणा समेत गरेका छन् ।
०००

जलवायु परिवर्तनमा तत्काल कदम चाल्न उत्तर कोरियाको आह्वान

प्योङयाङ: उत्तर कोरियाका शासक किम जोङ उनले जलवायु परिवर्तनको मुद्दामा तत्काल कदम चाल्न आह्वान गरेका छन् । जलवायु परिवर्तनले निम्त्याएको जलवायु संकटका कारण उत्तर कोरियामा भोकमरी हुनसक्ने भन्दै सो मुद्दामा तत्काल कदम चाल्न उनले आह्वान गरेका हुन् ।

गत वर्ष उत्तर कोरियामा ताइफुनले कृषि र खाद्य बाली उत्पादनमा नराम्रो असर पुर्‍याएको थियो । जलवायु संकटका कारण उत्तर कोरियामा चरम सुख्खा र भारी वर्षा हुन थालेको भन्दै किमले जलवायु परिवर्तन रोक्न तत्काल कदम चाल्न आफ्ना अधिकारीहरुसँग आग्रह गरेका छन् ।

‘हामीले यो असमान्य मौसमको सामाना गर्नुपर्छ’ आफ्ना अधिकारीहरुसँगको बैठकमा उनले भनेका छन्, ‘जलवायु परिवर्तनले खतरा निम्त्याउँदै छ । बाढी र खडेरीजस्ता प्राकृतिक प्रकोपले भोकमरी निम्तिन सक्छ । त्यसविरुद्ध हामीले तत्काल कदम चाल्नुपर्छ ।’

किमले प्राकृतिक विपद्का कारण देशको अर्थतन्त्रमा गिरावट आएको बताउँदै प्राकृतिक विपद् व्यवस्थापन र रोकथामको लागि देशभित्रका पूर्वाधार विकासमा जोड दिन र सुधार गर्न आग्रह गरेका छन् ।
०००

न्युजिल्याण्ड प्रहरीद्वारा अन्धाधुन्ध छुरा चलाउने मारिए

न्युजिल्याण्ड: न्युजिल्याण्डको वेलिङटनस्थित एक सुपरमार्केटमा अन्धाधुन्ध गोली र छुरा चलाउने अभियुक्त न्युजिल्याण्ड प्रहरीको गोली प्रहारबाट मारिएका छन् । श्रीलंकाका नागरिक समेत रहेका ती आक्रमणकारीको अन्धाधुन्ध छुरा प्रहार र गोलीबाट शुक्रबार बिहान ६ जना गम्भीर घाइते बनेका थिए।

अभियुक्त १० वर्षदेखि न्युजिल्याण्डमा बस्दैआएको प्रहरीले जनाएको छ । प्रहरीका अनुसार आक्रमणकारी व्यक्ति इस्लामिक स्टेटको सैन्य समूहबाट प्रेरित थिए । नागरिकको सुरक्षाको निम्ति प्रहरीले आक्रमणकारीमाथि गोली चलाएको प्रतिक्रिया दिएको छ ।

‘एकाबिहानै सुपरमार्केटमा हिंसा मच्चाउने ती व्यक्ति हाम्रो निगरानीमा थिए । उनी आइएसआइएस बिचाधाराबाट प्रभावित थिए । त्यसैले ती व्यक्तिलाई मार्न आदेश दिइएको हो’ न्युजिल्याण्डकी प्रधानमन्त्री जाकिन्दा आर्डेनले भनेकी छन् ।
०००

बालबालिका र किशोर किशोरीलाई भारतीय खोप लगाउन अनुमती

नयाँदिल्ली: कोभिड १९ विरुद्ध भारतले बनाएको बायोलोजिकल ई खोप बालबालिका र किशोरावस्था समूहका मानिसलाई लगाउन अनुमती दिइएको छ । शुक्रबार जारी विज्ञप्ति अनुसार भारतमा बनेको बायोलोजिकल ई खोप बालबालिका र किशोरकिशोरीहरुले लगाउन अनुमती दिइएको हो ।

भारतको हैदराबादस्थित औषधि कम्पनीले बनाएको उक्त खोपलाई औषधि नियन्त्रक कार्यालयले  स्वीकृती दिएसँगै बायोलोजिकल ई खोप बालबालिका र किशोरकिशोरीमाथि परीक्षण थालिएको छ ।

परीक्षणपछि खोप निर्माता कम्पनीले बायोलोजिकल ई खोपको असर र प्रभावकारितामाथि पनि अध्ययन गर्ने जनाएको छ । जोन हप्किन्सको तथ्यांकअनुसार भारतमा कोभिडविरुद्धको विभिन्न ६ वटा खोपले अनुमती पाएका छन् ।
०००

बंगलादेशमा डेंगुका कारण दर्जनौँको मृत्यु

ढाकाः कोभिड १९ को डेल्टा भेरियन्ट झेलिरहेको बंगलादेशको राजधानी ढाकामा डेंगु फैलिएको छ । डेंगुका कारण हालसम्म ३६ मानिसको मृत्यु भएको छ भने पछिल्लो २४ घण्टामा ३३० नयाँ संक्रमित फेला परेका छन् ।

बंगलादेशको स्वास्थ्य सेवा महानिर्देशनालयका अनुसार बिहीबार र शुक्रबार सबैभन्दा बढी डेंगुका बिरामी थपिएका छन् । जुलाइदेखि अगष्ट महिनासम्म ढाकामा मात्र करिब ११ हजारभन्दा बढी डेंगुका बिरामी फेला परेका छन् । पछिल्लो तीन महिनामा डेंगुका कारण ३६ ले ज्यान गुमाइसकेका छन् । सेप्टेम्बर १ देखि डेंगु तिब्र रुपमा देशभर फैलिरहेको छ ।

यो वर्ष बंगलादेशमा पहिलो पटक जुलाईमा डेंगुका बिरामी फेला परेका थिए । सरकारी तथ्यांकअनुसार बंगलादेशका करिब २ करोड मानिस डेंगु संक्रमणको उच्च जोखिममा छन् ।

सन् २०१९ मा बंगलादेशमा डेंगुका कारण ६७ मानिसको मृत्यु भएको थियो भने ८० लाख संक्रमित भएका थिए । बंगलादेशमा कोरोना भाइरसका १ करोड ५ लाख नयाँ संक्रमित छन् भने हालसम्म २६ हजार ३ ६२ ले ज्यान गुमाइसकेका छन् ।

संयोजन: अस्मिता खड्का