पञ्जशीर: पञ्जशीर उपत्यका नियन्त्रणमा लिन तालिबानले शनिबार गरेको हमलाले अफगानिस्तानमा गृहयुद्ध हुनसक्ने अमेरिकाले चेतावनी दिएको छ ।
अमेरिकी सेना प्रमुख मार्क मिल्ल्लीले तालिबान र तालिबान विरोधीहरुबीच चलिरहेको युद्धले अफगानिस्तान गृह युद्धमा होमिने चेतावनी दिएका हुन् ।
अफगानिस्तानको पञ्जशीर उपत्यका आफ्नो नियन्त्रणमा लिनका लागि तालिबान र तालिबान विरोधीहरुबीच लडाइँ भइरहेको छ । दुबै समूहको लडाइँले अफगानिस्तान फेरि गृह युद्धमा होमिने जोखिम उच्च रहेको मार्कले चेतावनी दिएका हुन् ।
‘दुबै पक्षले पञ्जशीर आफ्नो भएको दाबी गरिरहेका छन् । पञ्जशीरको लडाइँले अफगानिस्तानमा ठूलो तनाब उत्पन्न गराउने खतरा उच्च छ’ मार्क मिल्लीले भनेका छन् ।
अफगानिस्तानबाट अमेरिकी सेना फिर्ता भइसकेपछि तालिबानले पञ्जशीरलाई नियन्त्रणमा लिन पटक पटक हमला गरिरहेको छ । तालिबानका प्रवक्ता विलाल करिमीले पञ्जशीरका ७ जिल्लामध्ये खिन्ज र उनाबाह तालिबानको नियन्त्रणमा लिएको र अन्य जिल्ला कब्जा गर्न हजारौँ तालिबान सैनिकहरु अघि बढिरहेको बताएका छन् ।
अफगानिस्तानको नेसनल रेजिस्टेन्स फ्रन्टका प्रवक्ता फाहिम दास्तीले पञ्जशीरमा दुबै पक्षबीच ‘भीषण युद्ध’ चलिरहेको बताएका छन् । अमेरिकी सेना प्रमुखले तालिबान र तालिबान विरोधीबीच जारी भीषण युद्धले अफगानिस्तानमा गृह युद्ध निम्तिने बताउँदै भनेका छन्, ‘तालिबानले पञ्जशीर नियन्त्रणमा लिन र नयाँ सरकार गठन गर्न सक्छ या सक्दैन तर अफगानिस्तानको अहिलेको अवस्थाले उग्र रुप लिएमा गृह युद्ध हुने करिब पक्का छ ।’
प्रतिक्रिया दिनुहोस !
