अफगानिस्तानमा गृहयुद्ध हुनसक्ने अमेरिकी सेनाको चेतावनी, जापानमा पहिलो महिला प्रधानमन्त्री बन्ने सम्भावना
प्यारा ओलम्पिक्स सम्पन्न
टोक्यो: जापानको राजधानी टोक्योमा अगष्ट २४ देखि आयोजित १६ औं प्याराओलम्पिक्स खेल आइतबार सम्पन्न भएको छ ।
इन्टरनेस्नल प्याराओलम्कि कमिटीले टोक्योमा १३ दिन लामो प्याराओलम्कि खेलको आइतबार साँझ समापन गरेको हो । टोक्यो ओलम्पिक समाप्त भएको करिब २ हप्तापछि प्यारा ओलम्पिक्स खेल सुरु भएको थियो । जापानको आयोजनामा भएको प्यारा ओलम्पिक्समा संसारभरबाट ४ हजार ४ सय खेलाडीले भाग लिएका थिए भने विभिन्न २२ खेलमा प्रतिस्पर्धा भएको थियो ।
000
आईएस हमलामा १३ इराकी प्रहरी मारिए
बग्दादः इस्लामिक स्टेटको आक्रमणबाट आइतबार १३ इराकी प्रहरी मारिएका छन् । इराकको किरकुश सहरस्थित एक चेक प्वाइन्टमा भएको आत्मघाती हमलामा १३ प्रहरी मारिएका छन् भने तीन प्रहरी गम्भीर घाइते भएको एएफपीले जनाएको छ ।
एएफपीका अनुसार उत्तरी इराकमा अवस्थित किरकुक सहरमा आईएसआईएसले प्रहरी चेक प्वाइन्टलाई लक्षित गरी हमला गरेको थियो । सो हमलामा १३ प्रहरी जवानको मृत्यु भएको हो।
इराकको सुरक्षा तथा मेडिकल स्रोतका अनुसार किरकुक सहरदेखि ६५ किलोमिटरको दूरीमा रहेको प्रहरी चेक प्वाइन्टमा आइतबार बिहान हमलाकारी र प्रहरीबीच दुई घण्टासम्म दोहोरो भीडन्त भएको थियो । हमलाकारीले प्रहरी जवान सवार गाडीमा बम हमला गरेका थिए । सो क्षेत्रमा इस्लामिक स्टेट सक्रिय रहे पनि आइएसले सो हमलाको जिम्मा लिएको छैन ।
00
अफगानिस्तानमा फेरि गृहयुद्ध हुनसक्ने अमेरिकी सेनाको चेतावनी
काबुल: अफगानिस्तानको पञ्जशीर उपत्याकालाई नियन्त्रणमा लिन तालिबानले शनिबार गरेको हमलाले अफगानिस्तानमा गृहयुद्ध हुनसक्ने अमेरिकी सेनाले चेतावनी दिएको छ ।
अमेरिकी सेना प्रमुख मार्क मिल्ल्लीले तालिबान र तालिबान विरोधीहरुबीच चलिरहेको युद्धले अफगानिस्तान गृह युद्धमा होमिने चेतावनी दिएका हुन् । अफगानिस्तानको पञ्जशीर उपत्यका आफ्नो नियन्त्रणमा लिनका लागि तालिबान र तालिबान विरोधीहरुबीच लडाइँ भइरहेको छ । दुबै समूहको लडाइँले अफगानिस्तान फेरि गृह युद्धमा होमिने जोखिम उच्च रहेको मार्कले चेतावनी दिएका हुन् ।
‘दुबै पक्षले पञ्जशीर आफ्नो भएको दाबी गरिरहेका छन् । पञ्जशीरको लडाइँले अफगानिस्तानमा ठूलो तनाब उत्पन्न गराउने खतरा उच्च छ’ मार्क मिल्लीले भनेका छन् ।
अफगानिस्तानबाट अमेरिकी सेना फिर्ता भइसकेपछि तालिबानले पञ्जशीरलाई नियन्त्रणमा लिन पटक पटक हमला गरिरहेको छ । तालिबानका प्रवक्ता विलाल करिमीले पञ्जशीरका ७ जिल्लामध्ये खिन्ज र उनाबाह तालिबानको नियन्त्रणमा लिएको र अन्य जिल्ला कब्जा गर्न हजारौँ तालिबान सैनिकहरु अघि बढिरहेको बताएका छन् ।
अफगानिस्तानको नेसनल रेजिस्टेन्स फ्रन्टका प्रवक्ता फाहिम दास्तीले पञ्जशीरमा दुबै पक्षबीच ‘भीषण युद्ध’ चलिरहेको बताएका छन् । अमेरिकी सेना प्रमुखले तालिबान र तालिबान विरोधीबीच जारी भीषण युद्धले अफगानिस्तानमा गृह युद्ध निम्तिने बताउँदै भनेका छन्, ‘तालिबानले पञ्जशीर नियन्त्रणमा लिन र नयाँ सरकार गठन गर्न सक्छ या सक्दैन तर अफगानिस्तानको अहिलेको अवस्थाले उग्र रुप लिएमा गृह युद्ध हुने करिब पक्का छ ।’
०००
जापानमा पहिलो पटक महिला प्रधानमन्त्री बन्ने संकेत
टोक्योः जापानको प्रधानमन्त्री पदमा पहिलो पटक महिलाले नियुक्ति पाउनसक्ने सम्भावना देखिएको अन्तर्राष्ट्रिय मिडियाले जनाएका छन् ।
आगामी प्रधानमन्त्री चुनावको दाबेदार मानिएकी जापानकी पूर्व आन्तरिक मामिलामन्त्री साना ताकाइची जापानको पहिलो महिला प्रधानमन्त्री हुने पक्का रहेको आइतबार जापानी सञ्चारमाध्यमहरुले जनाएका छन् ।
प्रधानमन्त्री योसिहिदे सुगाले शुक्रबार आगामी चुनावमा नउठ्ने घोषणा गरेसँगै ताइकाची जापानको पहिलो महिला प्रधानमन्त्री हुने संकेत देखिएको जापानी मिडियामा खबर छ । उनी सत्ताधारी लिवरल डेमोक्रेटिक पार्टी (एलडिपी)को तर्फबाट प्रधानमन्त्री पदको लागि लड्ने बताइएको छ ।
६० वर्षीय ताइकाची वरिष्ठ नीति निर्मातामध्ये एक हुन् । उनले जापानको पहिलो महिला प्रधानमन्त्री बन्ने उदेश्य राखेको क्योदो न्युजमा खबर छ । ताइकाची पूर्वप्रधानमन्त्री सिन्जो आवे निकट र बेलायतीकी पूर्वप्रधानमन्त्री मार्गरेट थ्याचरको प्रशंसकको रुपमा चिनिन्छिन् । चीन र दक्षिण कोरियाको सन्दर्भमा उनले विगतमा ठूलो आलोचना समेत खेपेकी थिइन् ।
00
९ महिनाका गर्भवती महिला इजरायल जेलबाट छुटे
जेरुसेलम: गर्भवती भएको ९ महिना पुगेका प्यालेस्टेनी महिलाहरु इजरायलको जेलबाट रिहा भएका छन् । जेल परेका गर्भवती महिलाहरुलाई सुत्केरी अवस्थामा पुगेपछि आइतबार नजरबन्दीमा रिहा गरिएको अन्तर्राष्ट्रिय सञ्चार माध्यमले जनाएका छन् ।
गर्भवती महिलालाई जेलबाट छुटाउनु पर्ने माग राख्दै इजरायललाई विभिन्न क्षेत्रबाट दबाब आएको थियो । प्यालेस्टेनीहरु सार्वजनिक अभियान सामाजिक सञ्जालमार्फत भाइरल बनेपछि अन्तर्राष्ट्रिय निकायको ध्यान तानेको थियो ।
अन्तर्राष्ट्रिय निकायले घटनाको निन्दा गर्दै ९ महिना पुगेका गर्भवती महिलालाई जेलबाट छुटाउन आग्रह गरेको थियो । जेलबाट रिहा भएका गर्भवती महिलालाई २४ घण्टा निगरानीमा राखिएको छ । इजरायली सैनिकमार्फत पक्राउ परेका दर्जनौ प्यालेस्टेनी महिलाहरु इजरायलको जेलमा कैद भएको अलजजिराले जनाएको छ ।
000
आईयूसीएनको खतराको सूचीमा संसारकै ठूलो छेपारो
जाकर्ता: इन्टरनेसनल युनियन फर कन्जरभेसन अफ नेचर (आईयूसीएन)ले वन्यजन्तुबारे ताजा जानकारी सार्वजनिक गर्दै ड्रयागन प्रजातिको संसारकै ठूलो जीवित छेपारोलाई रातो सूची (खतरा) मा राखेको छ ।
इन्डोनेसियामा पाइने छेपारो प्रजातिको ‘कोमोदो ड्रयागन’लाई खतराको सूचीमा राखिएको हो । कोमोदो ड्रयागन विश्व सम्पदा सूचीमा सूचीकृत इन्डोनेसियाको कोमोदो राष्ट्रिय निकुन्जमा मात्र पाइन्छ ।
कोमोदो ड्रयागनसँगै सार्क माछा, एटलान्टिक ब्लुफिन टुना, जापानमा पाइने सूसी आदिलाई पनि आइसीयूएनले खतराको सूचीमा राखिएको छ । आगामी ४५ वर्षसम्म विश्वबाट ३० प्रतिशतभन्दा बढी प्रजातिका जीवहरु लोप हुने प्रक्षेपण पनि आइयूसीएनले गरेको छ ।
वन्यजन्तु संरक्षणसम्बन्धी विश्वव्यापी निकायले गरेको मुल्यांकन अनुसार मानवीय गतिविधिका कारण संसारबाट १ लाख ३८ हजारमध्ये २८ प्रतिशत प्रजाति संसारबाट सधैँका लागि लोप हुने अवस्थामा छन् ।
शनिबार एक रिपोर्ट सार्वजनिक गर्दै आइयूसीएनले वन्यजन्तुको वासस्थानमा ह्रास, वन विनास, वन्यजन्तुको अवैध व्यापार र जलवायू परिवर्तनको कारण विभिन्न प्रजातिका वन्यजन्तुहरु जोखिममा छन् । पृथ्वीबाट विभिन्न प्रजातिको लोप र प्रर्यावरणीय चक्रको विनाशले खतराको संकेत दिइरहेको आइसीयुएनले बताएको छ ।
000
जी ७ मुलुकले रुस र चीनसँग छलफल गर्ने
टोक्योः जी ७ मुलुकका विदेशमन्त्रीहरुले आगामी हप्ता अफगानिस्तान मुद्दाबारे चीन र रुससँग छलफल गर्ने भएका छन् । जापानका विदेशमन्त्री तोसिमित्सु मोतेगीले आइतबार जापानी न्युज च्यानल एनएचकेसँग अफगानिस्तानको मुद्दामाथि जी ७ बैठक बोलाइएको बताएका छन् ।
उक्त बैठकमा जी ७ समूहका सदस्य मुलुकहरुले अफगानिस्तान मुद्दाबारे चीन र रुससँग छलफल गर्ने समेत उनले जानकारी दिएका छन् । जी ७ मुलुकका विदेशमन्त्रीहरुको बैठक सेप्टेम्बर ८ मा आयोजना गरिएको छ ।
अमेरिकी विदेशमन्त्री एन्टोनी ब्लिंकेनको अगुवाइमा भर्चुअल माध्यममार्फत सो बैठक आयोजना गरिएको छ । बैठकमा २० भन्दा बढी मुलुकका कुटनीतिज्ञ सहभागी हुने अपेक्षा गरिएको छ । जापानका विदेशमन्त्री मोतेगीले रुस र चीनका प्रतिनिधीहरुलाई सो बैठकमा सहभागी हुन आग्रह गरेका छन् ।
000
नक्कली शरणार्थी बनेर न्यूजिल्याण्ड पुगेका आईएस सदस्यले सिकाए पाठ
वेलिंटन: सिरिया, म्यानमार र अफगानिस्तान लगायत मुलुकबाट आएका शरणार्थीलाई शरण दिएको न्यूजिल्याण्डमा शनिबार बिहान भएको आतंककारी हमलाले झस्काइदिएको बताइएको छ ।
शनिबार भएको आतंकवादी हमलाले आफूहरुलाई ठूलो पाठ सिकाएको न्यूजिल्याण्डकी प्रधानमन्त्री जेसिन्डा आर्डेनले बताएकी छन् । ‘जालझेल गरेर शरणार्थी बनेका ती आतंककारीले हामीलाई नयाँ पाठ सिकाएका छन् । नक्कली शरणार्थी बनेर मुलुक प्रवेश गर्ने त्यस्ता आतंककारी हाम्रो राष्ट्रिय सुरक्षाको लागि खतरा बनेको छ ’ उनले भनेकी छन्, ‘जानाजान न्यूजिल्याण्डमा आतंक फैलाउन गरिएको आईएसको यो कदम सह्य छैन । कानुनको नजरमा कसैलाई छुट छैन ।’
सरकारले शंकास्पद शरणार्थीलाई पहिलेदेखि नै खोजिरहेको र मुलुकबाट हटाउन खोजिएको जानकारी समेत आइतबार प्रधानमन्त्री जेसिन्डाले दिएकी छन् । न्युजिल्याण्ड सरकारले तत्कालै शरणार्थी प्रक्रियाको अन्त्य गर्ने जनाएको छ ।
नक्कली शरणार्थी बनेर १० वर्षअघि न्यूजिल्याण्ड छिरेका एक आईएसका सदस्यले न्यूजिल्याण्डको वेलिङस्टनस्थित शनिबार बिहान अन्धाधुन्ध आक्रमण गरेका थिए । सो आक्रमणमा परी ७ जना गम्भीर घाइते भएका थिए । हमलापछि ३२ वर्षीय अहमद आतिल मुहम्मद समसुद्दीन न्यूजिल्याण्ड प्रहरीको हातबाट मारिएका थिए ।
संयोजन: अस्मिता खड्का