तालिबान सरकारलाई चीन र जापानको स्वागत, कोरोना संक्रमितको संख्या २२ करोड १८ लाख नाघ्यो
अमेरिकी नेतृत्वको तालिबान सहकार्य र सहयोगबारे बैठक सम्पन्न
दोहाः अफगानिस्तानमा तालिबान नेतृत्वको सरकारसँग सहकार्यको ढाँचा र अफगानिस्तान सहयोगसम्बन्धी अमेरिकी नेतृत्वमा भएको पश्चिमेली यूनियनको बैठक सम्पन्न भएको छ ।
अमेरिकी राज्य सचिवालयका एन्टोनी ब्लिङ्केनको अध्यक्षतामा बुधबार भर्चुअल माध्यमबाट बैठक बसेको थियो । उक्त बैठकमा २० भन्दा बढी मुलुकका प्रतिनिधिहरु सहभागी थिए । बैठकमा तालिबानको नयाँ सरकारसँगको सहकार्य र सहयोगको ढाँचाबारे छलफल गरिएको थियो ।
तालिबानसँगको सहयकार्य र सहयोग अफगान नागरिकको स्वतन्त्रता, अफगानिस्तान छोड्न चाहने विदेशी नागरिहरुको लागि अनुमति, महिला अधिकारको रक्षा गर्नेलगायत जारी शर्तहरुमा आधारित हुने अधिकांश मुलुकका प्रतिनिधिहरुले सहमती जनाएका छन् ।
उक्त बैठकमा मानवीय र आर्थिक सहयोग उपलब्ध गराउने या नगराउने भन्नेबारेसमेत छलफल भएको थियो । उक्त बैठकले तत्कालीन सहयकार्यको लागि चाँडै नै संयुक्त राष्ट्रसंघीय र युरोपेली संघसहित कुटनीतिक बैठक बसाल्ने जनाएको छ ।
०००
तालिबानको नयाँ सरकारलाई चीन र जापानको स्वागत
वासिङ्टनः अफगानिस्तानमा तालिबानको नयाँ सरकार बनेपछि विभिन्न मुलुकले प्रतिक्रिया दिन थालेका छन् । अमेरिका, चीन, जापान, टर्की, कतार, युरोपेली संघ, संयुक्त राष्ट्रसंघ आदिले नयाँ सरकार गठनबारे आफ्नो प्रतिक्रिया जनाएका हुन् । तालिबानको नयाँ सरकार गठनको लागि चीन र जापानले स्वागत गरेका छन् ।
चीनले अफगानिस्तानको नयाँ सरकार स्थापनाबारे बुधबार प्रतिक्रया जनाउँदै भनेको छ, ‘तीन हप्ते अराजकतापछि काबुलस्थित बनेको तालिबानको नयाँ सरकारलाई स्वागत छ । तालिबानको नयाँ सरकारले अब अफगानिस्तानमा स्थायित्व कायम गर्नेछ ।’
जापानले तालिबानको मौन समर्थन जनाउँदै अमेरिकी साथ र सहयोगमा तालिबानको नयाँ सरकारले गर्ने कार्यको मुल्यांकन गर्ने बताएको छ ‘जापानले तालिबानको गतिविधिलाई मुल्यांकन गरिरहेको छ भने अमेरिका र अन्य मुलुकसँगको साथमा सहकार्य गर्नेछ । अफगानिस्तान नागरिकहरुको सुरक्षाको लागि जापानले साथ दिनेछ ।’
अमेरिकाले भने नयाँ सरकार गठनबारे चिन्ता व्यक्त गरेको बताइएको छ । अमेरिकी विदेश मन्त्रालयले प्रतिक्रिया जनाउँदै भनेको छ, ‘तालिबानको नयाँ सरकारमा सामेल केही व्यक्तिको पछिल्लो रेकर्डले हामी चिन्तित छौँ । हामी तालिबानको शब्द हैन उसको कामको मुल्यांकन गर्नेछौँ । अफगान नागरिक एक समावेशी सरकार चाहन्छ भन्नेमा हामी स्पष्ट छौँ ।’ तालिबानले मंगलबार नयाँ सरकार गठनको घोषणा गरेको थियो ।
०००
रुसका आपतकालीन मन्त्रीको प्रशिक्षणको क्रममा मृत्यु
मस्को: रुसका आपत्कालीन मन्त्री येभगेनी जिनिचेभको मृत्यु भएको छ । प्रशिक्षण अभ्यासका लागि आर्कटिक क्षेत्र पुगेका उनको बुधबार मृत्यु भएको हो । ‘ड्युटीमा खटिएका जिनिभिचको दुखद मृत्युले सबैलाई स्तब्ध बनाएको छ । उद्धार कार्यको लागि जारी प्रशिक्षण अभ्यासको क्रममा आर्कटिक क्षेत्रमा खटिएका उनी स्वयंको मृत्यु भएको छ’ आपतकालीन मन्त्रालयद्वारा बुधबार जारी विज्ञप्तिमा भनिएको छ ।
५५ वर्षीय मन्त्री जिनिचेभ सन् २०१८ देखि आपत्कालीन मन्त्रालयमा कार्यरत थिए । उनी रुसी सैन्य अधिकारी र राजनीतिज्ञसमेत हुन् ।
०००
संसारभर कोरोना संक्रमित २२ करोड १८ लाख नाघे
वासिङटनः संसारमा कोरोना महामारी फैलिएको दुई वर्ष हुँदैछ । कैयौँ मुलुकमा कोरोना कहर अझै पनि जारी छ । जोन्स हप्किन्स युनिभर्सिटीद्वारा हालै सार्वजनिक एक रिपोर्ट अनुसार संसारभर कोरोना संक्रमितको संख्या २२ करोड १८ लाखभन्दा बढी पुगिसकेको छ भने कोरोनाबाट मृत्यु हुनेहरुको संख्या ४ करोड ५८ लाख भन्दा बढी पुगेको छ ।
हालसम्म संसारभर ५ खर्ब ५२ करोडभन्दा बढी मानिसले कोरोनाविरुद्धको खोप लगाइसकेको रिपोर्टमा उल्लेख छ । जोन्स हप्किन्स युनिभर्सिटीको सेन्टर फर सिस्टम साइन्स एण्ड इन्जिनियरिङले बुधबार बिहान सार्वजनिक गरेको नयाँ अपडेटअनुसार अमेरिकामा हालसम्मकै सबैभन्दा बढी प्रभावित बनेको छ ।
अमेरिकामा ४ करोड २ लाख ७९ हजार ५६७ कोरोना संक्रमित रहेका छन् भने मृत्यु हुनेको संख्या ६ लाख ५० हजार ५११ रहेको छ । कोरोना संक्रमणबाट संसारकै दोस्रो प्रभावित मुलुक भारत रहेको उक्त रिपोर्टले जनाएको छ । भारतमा ३ करोड ३० लाख ५८ हजार कोरोना संक्रमित रहेका छन् । उक्त रिपोर्टअनुसार अति प्रभावित मुलुकहरुमा ब्राजिल, बेलायत, रुस, फ्रान्स, टर्की, अर्जेन्टिना, ईरान, कोलम्बिया, स्पेन, इटली, इन्डोनेसिया, जर्मनी र मेक्सिको रहेका छन् ।
०००
चीनमा अनलाईन ट्युसन कक्षामा रोक
सांघाईः चीनले बुधबारदेखि अनलाईनमार्फत चल्ने ट्युटोरियल (सिकाइ ) मा रोक लगाएको छ । विभिन्न विषयमाथि अनलाईनमार्फत प्रशारण हुने निजी क्षेत्रका ट्युसनमा रोक लगाएको हो ।
चीन सरकारले अनलाईनमार्फत सिकाइने विभिन्न ट्युसन कक्षामा रोक लगाएको हो । गैरकानुनी रुपमा विभिन्न आवासीय भवन निर्माण, होटेल र अन्य पसलमार्फत अनलाईन सिकाइ सञ्चालन गरेका निजी ट्युसन कक्षामाथि चीनले रोक लगाएको हो ।
कोभिड १९ महामारीपछि संसारभर शिक्षण र अन्य अनलाईन सिकाइ लोकप्रिय बनेको छ । चीनले पनि आफ्ना विभिन्न शैक्षिक कार्यक्रमहरु अनलाइनमार्फत सञ्चालन गरेको छ । निजी क्षेत्रले पनि विभिन्न क्षेत्रका सिकाइ कार्यक्रम अनलाईनमार्फत सञ्चालन गरेको भन्दै चीन सरकारले रोक लगाइएको अधिकारीहरुले बताएका छन् ।
चीनले अनलाईन सिकाइलाई नियमन गर्न यस्तो रोक लगाएको बताएको छ ।
०००
हङकङको तियानामेन र्यालीका अगुवा पक्राउ
हङकङः हङकङको चर्चित तियानामेन र्यालीका अगुवा पक्राउ परेका छन् । हङकङ प्रहरीले बुधबार उक्त र्यालीका थप चार अगुवालाई पक्राउ गरेको हो ।
पक्राउ पर्नेमा ३६ वर्षदेखि ५७ वर्ष उमेर समूहका तीन पुरुष र एक महिला रहेका छन् । उनीहरुको नाम भने खुलाइएको छैन । पक्राउ परेकाहरुलाई ६ महिनाको जेल सजाय सुनाइएको छ । उक्त र्यालीका अन्य केही अगुवाहरु ग्वानेथ हो, अल्वर्ट हो र ली चेयुक पहिलेदेखि जेलमा रहेको बताइएको छ ।
उक्त र्यालीमा सहभागी अन्य अगुवाहरु उपस्थित हुन नसकेको खण्डमा ६ महिना जेल र १ लाख हङकङ मुद्रा जरिवाना तिनुपर्ने प्रहरीले जनाएको छ ।
‘जुन फोर्थ इन्सिडेन्ट’ले चिनिने सन् १९८९ जुलाई ४ को ‘तियानानमेन स्क्वायर क्र्याकडाउन’मा मारिएकाहरुको सम्झनामा लोकतान्त्रिक समूहको तर्फबाट सो अगुवाहरुले जुलाई ४ मा र्याली गरेका थिए । उक्त र्यालीमा चीनको सहयोगमा गरेको भन्दै हङकङ प्रहरीले उनीहरुलाई पक्राउ गरेको अन्तर्राष्ट्रिय सञ्चारमाध्यमहरुले जनाएका छन् ।
सन् १९८९ अप्रिल १५ देखि जुन ४ सम्म सञ्चालित जुन फोर्थ ईन्सिडेन्टमा हजारौँ नागरिक र सैनिकले ज्यान गुमाएका थिए भने हजारौँ घाइते भएका थिए । कम्युनिष्टभित्र रहेको भ्रष्टाचारविरुद्ध जारी उक्त आन्दोलन हङकङको तियानानमेन स्क्वायरमा भएको थियो । जहाँ बेइजिङ, चीन लगायत देशभरका विभिन्न ४ सय शहरका मानिसहरु सहभागी थिए ।
०००
फ्रान्समा १ करोड युरोको गहना चोरी
पेरिसः फ्रान्सको राजधानी पेरिसस्थित बुल्गेरी स्टोरबाट चोरको एक समूहले १ करोड युरोको गहना चोरी गरेका छन् । तीनजना चोरको समूहले मंगलबार दिउँसो (स्थानिय समयअनुसार) सो रकम बराबरको गहना चोरी गरेको एएफपीले जनाएको छ ।
उक्त समूहले फिल्मी शैलीमा गहना चोरेको र प्रहरीले हालसम्म पक्रिन नसकेको बताइएको छ । पेरिस प्रहरीका अनुसार तीन व्यक्तिले अनुहार छोपिने गरी नचिनिने लुगा लगाएका थिए भने शरीरभर बन्दुक भिरेका थिए । चोरहरुले व्यस्त शहरको केन्द्रमा रहेको उक्त गहना पसलबाटमध्ये दिउँसो करिब १ करोड युरोको गहना चोरेर भागेका थिए । प्रहरीले दुई शंकास्पद व्यक्तिलाई हिरासतमा राखेको छ भने अन्यको खोजी तिब्र पारेको छ ।
यसअघि जुलाई २७ मा २ लाख युरोको गहना पेरिसस्थित चौमेट बुटिकबाट चोरी भएको थियो । हातहतियारसहित पेरिसमा बढेको चोरी तथा लुटपाटले सन् २०२२ मा हुने भनिएको राष्ट्रपतिय चुनावलाई असर गर्ने आशंका गरिएको छ ।
०००
मेक्सिकोमा ७.० म्याग्निच्युडको भूकम्प
गुयर्रोः दक्षिण पश्चिम मेक्सिकोमा बुधबार बिहानै ७.० म्याग्निच्युडको भूकम्प गएको छ । भूकम्पका कारण समुद्रनजिकैको एकापुल्को शहरमा एक रिसोर्टमा भत्किँदा एकको मृत्यु भएको जनाइएको छ ।
अमेरिकी भूवैज्ञानिक सर्भे (यूएसजिएस) का अनुसार दक्षिण पूर्वदेखि १८ किलोमिटर दूरीमा रहेको गुयर्रोलाई केन्द्रविन्दु बनाएर बुधबार बिहान ७.० म्याग्निच्युडको भूकम्प गएको थियो । भूकम्पको धक्का मेक्सिकोको विभिन्न स्थानमा महशुस गरिएको थियो । करिब १२.५ किलोमिटर वरिपरीको क्षेत्रमा उक्त भूकम्पको ठूलो धक्का महशुस गरिएको थियो ।
भूकम्पपछि सुनामीको खतारा रहेको भन्दै यूएसजीएसले सबैलाई सतर्क रहन आग्रह गरेको छ । भूकम्पका कारण ठूलो मानवीय क्षति नभए पनि पहाडबाट विशाल ढुंगा र रुखहरु ढलेको र सडकमा चिरा परेको बताइएको छ । मेक्सिकोको विभिन्न १० शहरहरुमा भौतिक क्षति पुगेको बताइएको छ । मेक्सिकोमा बुधबार बिहान गएको भूकम्प ७० वर्षपछिकै ठूलो भूकम्प रहेको बताइएको छ ।
०००
मेक्सिकोको अस्पतालमा बाढी पस्दा १७ विरामीको मृत्यु
हिडाल्गोः भारी वर्षापछि आएको बाढीका कारण मेक्सिकोको हिडाल्गो राज्यमा अवस्थित अस्पतालमा उपचाररत १७ विरामीको मृत्यु भएको छ । मंगलबार राति आएको बाढी अस्पतालमा पस्दा उपचाररत १७ विरामीको मृत्यु भएको अधिकारीहरुले जनाएका छन् ।
स्थानीय मिडियाका अनुसार राज्यको टुला शहरमा अवस्थित उक्त अस्पतालमा कोभिड १९ लगायत विरामीको उपचार भइरहेको थियो । नदी किनारमा रहेको उक्त अस्पतालभित्र एक्कासी बाढी पस्दा सो दुर्घटना भएको हो । उद्धारकर्मीको टोलीले स्ट्रेचर र डुङ्गामार्फत ४० विरामीको उद्धार गरेको बताइएको छ । बाढीका कारण उक्त शहरका ३० हजारभन्दा बढी मानिसहरु प्रभावित भएको मेक्सिकोका राष्ट्रपति एन्ड्रेस लोपेज ओब्राडोरले बताएका छन् ।
संयोजन: अस्मिता खड्का