वासिङटनः अमेरिकी राष्ट्रपति जो बाइडेन र चिनियाँ राष्ट्रपति सी जिङपिङबीच फोनवार्ता भएको छ ।
बाइडेन अमेरिकी राष्ट्रपतिमा पदारोहण गरेको सात महिनापछि उनीहरुबीच बिहीबार पहिलोपटक उच्चस्तरीय फोनवार्ता भएको हो । करिब ९० मिनेट लामो वार्तामा संसारका दुई शक्तिशाली राष्ट्रबीच जारी आर्थिक प्रतिस्पर्धालाई द्धन्द्धको दिशातर्फ मोडिन नहुनेतर्फ उनीहरुको छलफल केन्द्रित थियो ।
‘दुई देशको चासो र मान्यता मिल्ने र नमिल्ने विषयमा बाइडेन र सी जिङपिङबीच विस्तृत र रणनीतिक छलफल भएको छ’ ह्वाइट हाउसस्थित राष्ट्रपति कार्यालयद्वारा जारी विज्ञप्तिमा भनिएको छ ।
शीर्ष नेताहरुको वार्तापछि सकारात्मक सम्बन्ध निर्माण गर्न सके दुई शक्तिशाली राष्ट्रबीच जारी दशकौँ लामो गतिरोध अन्त्य गर्न सकिने अमेरिकी पक्षले जनाएको छ । सो छलफल आर्थिक मुद्दा, जलवायू परिवर्त, कोभिड १९ महामारी नियन्त्रण लगायत विषयमा केन्द्रित रहेको बताइएको छ ।
‘छलफलमा राष्ट्रपति बाइडेनले शान्ति, स्थायित्व र इन्डो प्यासिफिकको समृद्धिमा जोड दिएका थिए । दुई नेताहरुले दुई शक्ति राष्ट्रबीच प्रतिस्पर्धी प्रतिद्धन्द्धको अन्त्य गर्नमा दुबै राष्ट्र जिम्मेवार रहनेबारे छलफल गरेका थिए’ ह्वाइट हाउसद्वारा जारी विज्ञप्तिमा भनिएको छ ।
चिनियाँ सञ्चारमाध्यमले भने छलफलमा अमेरिकी नीतिले चीनमा ‘गम्भीर कठिनाई’ खडा गरेको बताउँदै राष्ट्रपति सी जिङपिङले दुई देश नियमित सम्पर्कमा रहनुपर्नेमा जोड दिएको उल्लेख गरेका छन् । यसअघि गत फेब्रुअरीमा बाइडेन र सी जिङपिङबीच अनौपचारिक फोनवार्ता भएको थियो ।
प्रतिक्रिया दिनुहोस !
