अफगान महिलाले शर्तसहित पढ्न पाउने तालिबानको घोषणा, चिनियाँ र रुसी गुप्तचरबीच गोप्य भेट
महिलाले विश्वविद्यालयमा अध्ययन गर्न पाउनेः तालिवान
काबुल: अफगानिस्तानको तालिबान सरकारले आइतबार महिला शिक्षा सम्बन्धी नयाँ नियम जारी गरेको छ । तालिबान सरकारले विभिन्न शर्त सहित अफगानिस्तानका महिलाले उच्च शिक्षा हासिल गर्न पाउने अनुमती जारी गरेको हो । तालिबानका शिक्षामन्त्री अब्दुल बाकी हक्कानीले महिलाले शर्तसहित उच्च शिक्षासम्मको अध्ययनलाई निरन्तरता दिन पाउने बताएका छन् ।
‘महिला शिक्षाको लागि नयाँ शर्त र नीति जारी गरिएको छ’ आइतबारको प्रेस सम्मेलनमा हक्कानीले भनेका छन्, ‘महिलालाई पनि विश्वविद्यालयसम्मको पढाइ गर्ने अनुमती दिइएको छ । तर महिला र पुरुषले एउटै कक्षाकोठामा भने पढ्न पाउने छैनन् । साथै अध्ययनका लागि आउने महिलाले अनिवार्य रुपमा हिजाव लगाउनु पर्नेछ ।’
विश्वविद्यालयमा अध्ययन हुने पाठ्य सामग्रीको चाँडै समीक्षा गरिने तालिबान सरकारले जनाएको छ । यसअघि तालिबानले कला र संगीत अध्ययनमा प्रतिबन्ध लगाउने बताउँदै आएको थियो ।
०००
पाकिस्तानी गुप्तचर एजेन्सीको आयोजनामा चीन र रुसी गुप्तचरहरुको भेट
इस्लामाबाद: पाकिस्तानी गुप्तचर एजेन्सी आइएसआईको आयोजनामा विभिन्न मुलुकका गुप्तचर प्रमुखबीच भेटवार्ता भएको छ । आइएसआईद्वारा आयोजित उक्त भेट कार्यक्रममा चीन, रुस, इरान र अन्य मध्य एसियाका गुप्तचर प्रमुखबीच भेटवार्ता भएको पाकिस्तानी मिडियाले जनाएका छन् ।
यद्यपि, उनीहरुबबीचको भेटबारे आधिकारिक सूचना जारी नभए पनि अफगानिस्तानको अवस्थाबारे छलफल गरिएको पाकिस्तानी मिडियाले जनाएको छ ।
डन न्युजका अनुसार गुप्तरचर प्रमुखबीच शनिबार राति भेटवार्ता भएको थियो । उक्त भेटमा रुस, चीन, ईरान र अन्य मध्य एसियन मुलुकका गुप्तचर प्रमुखको उपस्थिति रहेको थियो । ‘पाकिस्तानले यस्तोखाले भेट आयोजना गर्नुले अफगानिस्तानमा शान्ति चाहेको भन्ने बुझिन्छ’ उच्चस्तरीय स्रोतले भनेको छ ।
०००
चीनले बनायो देशकै पहिलो रेडियोएक्टिभ फोहोर डिस्पोजल उपकरण
बेइजिङ: चीनले मुलुकको पहिलो पटक फोहोरमैला डिस्पोजल गर्ने उच्चस्तरीय रेडियोएक्टिभ उपकरण निर्माण गरेको छ । चीनले पहिलो पटक आणविक उद्योगबाट निस्कने तरल फोहोरलाई उचित तरिकाले डिस्पोजल गर्ने उपकरण बनाएको हो ।
चीनको सिचुआन प्रान्तस्थित गुनग्याउनमा उक्त उपकरण आइतबार आधिकारिक रुपमा जडान गरिएको छ । यस्ताखाले प्रविधिको विकास र उपयोग गर्ने चीन संसारको एकाध मुलुकमा पर्ने ग्लोबल टाइम्सले जनाएको छ ।
यस प्रविधिले आणविक फोहोरलाई उचित तरिकाले डिस्पोजल गर्ने र भविष्यमा हुने वातावरणीय मानव स्वास्थ्य जोखिमलाई न्यूनिकरण गर्ने विश्वास चिनियाँ विज्ञहरुले गरेका छन् ।
चीनले आणविक उद्योग सञ्चालन गरेपछि आफूले बनाएको सबैभन्दा ठूलो र उत्कृष्ट परियोजनाको रुपमा लिएको छ । यस्तोखाले प्रविधि अमेरिका, फ्रान्स, जर्मनी र अन्य केही मुलुकले मात्र प्रयोगमा ल्याएका छन् ।
सन् २००४ मा चाइना एटोमिक ईनर्जी आयोगले सो परियोजना विकास गर्न स्वीकृती दिएको थियो भने चीन र जर्मनको संयुक्त डिजाइनमा सो परियोजना अघि बढेको थियो ।
०००
परमाणु निगरानी क्यामेरा राख्न ईरानको अनुमती
तेहरानः परमाणु प्रतिष्ठानमा निगरानीको लागि क्यामेरा राख्न ईरानले अनुमती दिएको छ । ईरानले आफ्नो परमाणु प्रतिष्ठानको निगरानीका लागि परमाणु हात हतियारसम्बन्धी संयुक्त राष्ट्रसंघको अन्तर्राष्ट्रिय संवेदनशील निकाय इन्टरनेसनल अटोमिक ईनर्जी एजेन्सी (आइएईए)लाई नयाँ मेमोरी कार्डसहितको क्यामेरा राख्न अनुमती दिएको हो ।
आइएईएका प्रमुख राफेल ग्रोसी र आइएईए ईरानका प्रमुख मोहम्मद इस्लामीबीच आइतबार भेटवार्ता भएको थियो । सो भेटमा सन् २०१५ को परमाणु सम्झौतामा पनि आइएईए ईरानका इस्लामीले आइतबार हस्ताक्षर गरेको अलजजिराले जनाएको छ ।
सो सम्झौतापछि आइएईए प्रमुख ग्रोसीले निरन्तर ईराकको राजधानी तेहरानको भ्रमण गर्न पाउने बताइएको छ । यसअघि ईरानले आफ्नो परमाणु निगरानीमा कुनै पनि निकायलाई अनुमती दिएको थिएन ।
०००
रुसी आक्रमणमा दुई युक्रेनी सैनिकको मारिए
मस्को: युक्रेनको पूर्वी क्षेत्रमा प्रो रसियनले गरेको आक्रमणमा दुई युक्रेनी सैनिक मारिएका छन् भने अन्य १० घाइते भएका छन् । युक्रेनी सैनिक र प्रो रसियन समूहबीच विगत २४ घण्टामा भएको दोहोरो भीडन्तमा परी दुई सैनिक मारिएको र १० घाइते भएको आइतबार युक्रेन सेनाले बताएको छ ।
‘युक्रेनको डोनेस्ट्क क्षेत्रमा विगत २४ घण्टामा प्रो रसियन र विरोधी समूहबीच दोहोरो लडाईँ भएको थियो’ युक्रेन सेनाले आइतबार जारी गरेको विज्ञप्तिमा भनिएको छ ‘दुश्मनहरुले गरेको आक्रमणमा पनि हाम्रा दुई सैनिक मारिएका छन् भने १० सैनिक घाइते भएका छन् । यद्यपि स्थानीयहरुमा भने कुनै असर पुगेको छैन ।’
सन् २०१४ फेब्रुअरीदेखि प्रो रसियन र सरकार विरोधी समूहले युक्रेनको दक्षिणी र पूर्वी क्षेत्र डोनेस्ट्क र लुगान्स्क क्षेत्रमा युक्रेनले आफ्ना सैनिक खटाएको छ । सन् २०१४ मा रुसले क्रिमियन प्रायद्धिप कब्जा गरेपछि सो समूहबीच युद्ध भड्किएको थियो ।
त्यसयता विद्रोही समूहको हमलामा ५२ युक्रेनी सैनिक मारिएको युक्रेनले जनाएको छ । सरकारविरोधी समूहलाई हतियार र सैनिक उपलब्ध गराउनुमा रुस दोषी रहेको आरोप युक्रेन र युक्रेन समर्थकहरुले लगाएका छन् ।
०००
पाकिस्तानमा चट्याङका कारण तीन परिवारका १४ को मृत्यु
पेशावरः पाकिस्तानको पख्तुनख्वा प्रान्तमा अवस्थित एक गाउँमा चट्याङका कारण तीन परिवारका १४ को मृत्यु भएको छ । मेघ गर्जनसहित चट्याङ पर्दा एकै गाउँका तीन घरमा चट्याङ लागेको थियो ।
चट्याङका कारण आइतबार बिहान महिला र बालबालिकासहित तीनै घरका १४ को मृत्यु भएको स्थानीय सञ्चारमाध्यमले जनाएका छन् । चट्याङका कारण माटोबाट बनेका घरहरुमा पूर्ण रुपमा क्षति पुगेको बताइएको छ । पख्तुनख्वा पाकिस्तानको पहाडी क्षेत्र हो । वर्षातको समयमा सो क्षेत्रमा पहिरो, बाढी र चट्याङको चपेटामा पर्ने गर्छ ।
०००
१८ वर्षीया एम्माले जितिन् युएस ओपन टेनिस
लण्डन: बेलायतकी एक किशोरी अमेरिकाको खुला टेनिस प्रतियोगिताो विजेता बनेकी छन् । १८ वर्षीया किशोरी एम्मा राडुकानु अमेरिकामा आयोजित युएस ओपन टेनिस अन्तर्गत ‘ग्रान्ड स्ल्याम’को विजेता बनेकी हुन् ।
४४ वर्ष लामो कीर्तीमानी तोड्दै उनले सो उपाधी हात पारेको अन्तर्राष्ट्रिय सञ्चारमाध्यमले जनाएका छन् । १९ वर्षीया लेला फर्नान्डिजलाई ६–४, ६–३ ले हराउँदै एम्माले सो उपाधी जितेकी हुन् ।
४४ वर्षअघि ब्रिटेनका लागि ग्रान्ड स्ल्यामको उपाधी भर्जिनिया वेडले जितेकी थिइन् । सो उपाधीसँगै राडुकानुले पुरस्कार स्वरुप १८ लाख अमेरिकी डलर पाएकी छन् । साथै उनी टेनिस खेलमा ब्रिटेनको पहिलो वरियतामा परेकी छन् भने विश्वको २३ औं वरियताको सूचीमा पर्न सफल भएकी छन् ।
०००
बंगलादेशमा १८ महिनापछि विद्यालय खुले
ढाकाः कोरोना महामारीका कारण बन्द भएका बंगलादेशका विद्यालय १८ महिनापछि खुलेका छन् । विश्वमा महामारी भित्रिएदेखि बन्द भएका बंगलादेशका विद्यालयहरु आइतबारदेखि भौतिक रुपमा सञ्चालनमा आएका हुन् ।
कोभिडका कारण लामो समयसम्म विद्यालय बन्द हुँदा बंगलादेशसहित दक्षिण एसियाका लाखौँ बालबालिकाको पढाइमा असर पुगेको भन्दै युनिसेफले चेतावनी दिएको थियो । युनिसेफको चेतावनी र विश्व स्वास्थ्य संगठनको स्वास्थ्य मादण्डअनुसार बंगालदेशका विद्यालयहरु पुन: सञ्चालमा ल्याएको बताइएको छ ।
बंगलादेशको राजधानी ढाकामा फूलको गुच्चा र चकलेटले बालबालिकालाई विद्यालयमा स्वागत गरेको बताइएको छ । लामो समयपछि विद्यालय पुगेका बालबालिकाहरुलाई स्वास्थ्य मापदण्ड अपनाउन आग्रह गरिएको छ ।
बंगलादेशको टेलिकम सेवाका अनुसार मुलुकमा केबल ४१ प्रतिशत मानिसहरु मात्र स्मार्ट फोन र इन्टरनेटको पहुँचमा छन् । इन्टरनेटको पहुँच बाहिरका लाखौँ विद्यार्थीहरुको पढाइ १८ महिनादेखि प्रभावित बन्दै आएको थियो ।
०००
दक्षिण चीनमा कोरानाको प्रकोप, यातायात र अन्य सेवा बन्द
बेइजिङः दक्षिण चीनमा कोरोना संक्रमण पुन: फैलिएको छ । कोरोना संक्रमण उच्च रहेको भन्दै पुतियन शहरमा यातायात, सिनेमा हल लगायत विभिन्न सार्बजनिक सेवा बन्द गरिएको छ ।
साङघाईदेखि दक्षिण क्षेत्रमा रहेको पुतियन शहरमा २९ लाख जनसंख्या रहेको छ । उक्त शहरबाट बाहिर जाने यात्रुले कोरोना मापदण्ड अपनाउनु पर्ने गरी निर्देशन जारी गरिएको छ ।
चीनको राष्ट्रिय स्वास्थ्य आयोगका अनुसार पुतियन शहरमा पछिल्लो २४ घण्टामा डेल्टा भेरियन्टका १९ संक्रमित फेला परेका छन् । चीनको स्वास्थ्य आयोगले आइतबार कोरोना नियन्त्रणको लागि विशेषज्ञ टोलीलाई सो क्षेत्रमा खटाएको छ । चीनको वुहानबाट सुरु भएको कोरोना कहर हाल पनि संसारका विभिन्न मुलुकमा विकराल रुप लिइरहेको छ । यद्यपि, चीनले २०२० मै आफूलाई कोरोना भाइरस मुक्त मुलुक घोषणा गरेको थियो । चीनका विभिन्न प्रान्तमा डेल्टा भाइरस देखा परेको थियो ।
संयोजन: अस्मिता खड्का