रुस, चीन र पाकिस्तानसँग हातेमालो गर्दै भारतीय सेना, ४ हजार बढी प्यालेस्टेनी इजरायली जेलमा
रुस, चीन र पाकिस्तानी सेनासँग हातेमालो गर्ने तयारीमा भारतीय सेना
नयाँ दिल्लीः सीमामा जारी तनावका बीच भारतीय सेनाले रुस, चीन र पाकिस्तानी सेनासँग हातेमालो गर्ने तयारी थालेको छ । साङघाई सहयोग संगठन शान्ति मिसन अन्तर्गत आयोजित रोधी सैन्य अभ्यासको लागि भारतीय सेनाले रुस, चीन र पाकिस्तानी सेनासँग हातेमालो गर्ने तयारी थालेको भारतीय सञ्चारमाध्यमले जनाएका छन् ।
भारतीय समाचार एजेन्सी एएनआईका अनुसार सो सैन्य अभ्यासको लागि उच्च प्रशिक्षित भारतीय सैन्य बल (सेना र वायु सेना) रुस जानेछ । करिब २ सय भारतीय सैनिकले रुसको ओरेनवर्गमा हुने सैन्य युद्धाभ्यासमा रुस, चीन र पाकिस्तानी सेनासँगै भाग लिनेछन् ।
ओरेनवर्गमा यही हप्तादेखि सुरु हुने सो अन्तर्राष्ट्रिय सैन्य अभ्यास सेप्टेम्बर २६ सम्म चल्नेछ । सो अभ्यासमा तीनवटै मुलुकबाट सहभागी सेनाले सँगै रोधी ड्रिलमा भाग लिनेछन् ।
भारतले गत वर्ष आयोजित सैन्य अभ्यासमा आफ्नो सहभागिता जनाएको थिएन । भारत, चीन र पाकिस्तानका सेना अभ्यासका लागि यतिबेला रुस पुगिसकेको भारतीय सञ्चारमाध्यले जनाएका छन् । अफगानिस्तानमा बनेको नयाँ तालिबान सरकारको चीन र पाकिस्तानले समर्थन जनाएका छन् भने भारतले विरोध जनाइरहेको छ ।
०००
तालिबान सत्तापछि काबुलमा पहिलो पटक पाकिस्तानी विमान अवतरण
काबुलः अफगानिस्तानमा तालिबानले कब्जा जमाएको करिब २८ दिनपछि काबुल अन्तर्राष्ट्रिय विमानस्थलमा सोमबार पहिलो पटक विमान अवतरण भएको छ ।
अगष्ट १५ मा तालिबानले काबुललाई आफ्नो नियन्त्रणमा लिएको थियो । त्यसपछि काबुल विमानस्थलमा अफगान र अन्य विदेशी नागरिक निकासीको लागि मात्र विमान सञ्चालनलाई अनुमति दिइएको थियो ।
२८ दिनपछि पहिलो पटक पाकिस्तान इन्टरनेशनल एयरलाइन्स (पिआईए)को विमान सोमबार हामिद कारजई (काबुल) अन्तर्राष्ट्रिय विमानस्थलमा अवतरण भएको छ । उक्त विमानमा अधिकांश विमान सदस्यसहित केवल १० यात्रु मात्र सवार रहेको बताइएको छ ।
टर्की, कतार र संयुक्त अरब एमिराट्सका प्राविधिक टोलीले विमानस्थल पुन: सञ्चालनमा अफगानिस्तानलाई सहयोग गरेको र सो विमानस्थलमार्फत चाँडै आन्तरिक र अन्तर्राष्ट्रिय सेवा सुचारु गरिने तालिबानका प्रवक्ताले बताएका थिए ।
०००
आङ सान सूकी अदालतमा अनुपस्थित
वर्माः सत्ताबाट हटाइएकी म्यानमारकी नेत्री आङ सान सूकी अदालतमा अनुपस्थित भएकी छन् । स्वास्थ्य खराबीको कारण देखाउँदै उनी अदालतमा उपस्थित हुन नसकेको सूकी निकट स्रोतले जनाएको छ ।
हिरासतमा रहेकी उनलाई सामेबार अदालतमा उपस्थित हुन आदेश दिइएको थियो ।‘उहाँलाई कोभिड भएको छैन तर लामो समयपछि गाडिमा यात्रा गरेकोले उहाँको स्वास्थ्य अवस्था राम्रो छैन । यतिबेला आराम गरिरहनु भएको छ । त्यसैले अदालतमा उपस्थित हुन सक्नुभएन’ उनका वकिल मिन मिन सोईले भनेका छन् ।
म्यानमार सेनाले गत फेब्रुअरी १ मा कू शासन लागु भएपछि सत्ताच्युतमा परेकी ७६ वर्षीया आङ सान सूकीलाई विभिन्न आरोपमा हिरासतमा राखिएको छ । प्रसिद्ध नोवेल शान्ति पुरस्कार विजेता उनले तानाशाही विरुद्ध तीन दशक लामो अहिंसात्मक संघर्ष गरेकी छन् ।
कानूनी सल्लाहकारमार्फत मात्र उनले बाह्य दुनियासँग कुरा गर्न पाउने अनुमति दिइएको छ । उनलाई सैन्य अधिकारीद्वारा कडा निगरानीमा राखिएको बताइन्छ ।
०००
स्पेनमा डढेलोः २ हजारभन्दा बढीले घर छोडे
स्पेनको एन्डालुजिया क्षेत्रमा फैलिएको डढेलोका कारण २ हजारभन्दा बढी स्थानीय वासिन्दाले घर छोडेका छन् । एन्डालुजिया क्षेत्रको इस्टेपोना शहरनजिकैका करिब २ हजार ५ सय मानिसको उद्धार गरिएको दी गार्जियनले जनाएको छ ।
डढेलोबाट निस्केको धुवाँको कारण एक उद्धारकर्मीको निधन भएको छ । गत बुधबारदेखि फैलिएको डढेलो सोमबार बिहानसम्म पनि नियन्त्रणमा आउन नसकेको बताइएको छ ।
डढेलो नियन्त्रकहरुलाई साथ दिन स्पेन सरकारले डढेलो प्रभावित क्षेत्रमा सैनिक युनिट खटाएको छ । सोमबार बिहानसम्म उक्त क्षेत्रस्थित ६ वटा शहरका मानिसको उद्वार गरिएको र डढेलोले ७ हजार ४ सय हेक्टर वनजंगल सखाप पारेको स्थानीय मिडियाले जनाएका छन् । जलवायु परिवर्तनका कारण युरोपको सुख्खा, तातो हावा चल्ने विभिन्न क्षेत्र यस वर्ष डढेलोले बढी प्रभावित भएको बताइएको छ ।
०००
४ हजारभन्दा बढी प्यालेस्टेनी इजरायलको जेलमा
जेरुसेलमः हाल जेरुसेलमको जेलमा ४ हजार भन्दा बढी प्यालेस्टेनी कैदीहरु रहेको अन्तर्राष्ट्रिय मिडियाले जनाएका छन् । विभिन्न अभियोगमा बालबालिकासहित सो संख्यामा प्यालेस्टेनी कैदीहरु इजरायलका विभिन्न जेलमा रहेका हुन् ।
सेप्टेम्बर ६ मा ४ किलोमिटर लामो सुरुङ खनेर प्यालेस्टेनीहरु इजरायलको गिलवोवा जेलबाट भागेपछि इजरायली जेलमा बन्दी बनेका प्यालेस्टेनी कति हुन सक्छन् भन्नेबारे अधिकांशको चासोको विषय बनेको थियो ।
सो तथ्यांकबारे अलजजिराले सोमबार एक तथ्यांक प्रकाशित गरेको छ । कैदीको हकसम्बन्धी समूह अदामिरले अलजजिरालाई उपलब्ध गराएको तथ्यांकअनुसार हाल ४ हजार ६ सय ५० प्यालेस्टेनी कैदीहरु इजरायलका विभिन्न जेलमा राखिएका छन् ।
यद्यपि, सन् २०२१ को सुरुवातीदेखि हालसम्म इजरायली सैन्य बलले महिला र बालबालिकासहित ५ हजार ५ सयभन्दा बढी प्यालेस्टेनी नागरिकहरु इजरायलको जेलमा राखिएको प्यालेस्टेनी गैर सरकारी संस्थाहरुको तथ्यांकमा उल्लेख छ ।
मे महिनामा मात्र इजरायली सेनाले ३ हजार १ सय प्यालेस्टेनी नागरिकलाई पक्राउपछि जेल पठाएको थियो । इजरालयलको अवैध धन्दा र राजनीतिक कैदीको रुपमा इजरायलको जेलमा राखिएको छ ।
सन् २००० यता करिब १२ हजार प्यालेस्टेनी बालबालिका इजरायली आर्मीले कैदी बनाएको अदामिरले जनाएको छ । ढुंगामुढा गरेको अभियोगमा ती बालबालिकालाई २० वर्षको जेल सजाएको सुनाएको समेत अदामिरले जनाएको छ ।
०००
सोमालियाको राष्ट्रपतीय चुनावमा महिलाको उम्मेदवारी
मोगादिसुः सोमालियामा एक महिलाले राष्ट्रपतीय चुनावमा आफ्नो उम्मेदवारी दिएकी छन् । परम्परागत रुढिवादी मान्यतालाई तोड्दै पहिलो विदेशमन्त्री र उपप्रधानमन्त्री बनेकी सोमालियाकी फोजिया युसुफ एच आदम राष्ट्रपतीय चुनावको उम्मेदवारी दिएकी हुन् ।
संसदीय सदस्य समेत रहेकी आदमले लामो समयपछि हुन गइरहेको राष्ट्रपतीय चुनाव जित्नु आफ्नो लागि चुनौतीपूर्ण हुने बताएकी छन् । ‘सोमालियामा महिला अझै पनि पछाडि नै छन् । यसअघिका चुनावमा लड्नु जत्तिको चुनौतिपूर्ण थियो आगामी चुनाव त्यो भन्दा निकै चुनौतीपूर्ण हुनेछ’ एक अन्तर्वार्तामा उनले भनेकी छन्, ‘तर पनि म सोमालियामा जडो काडेर बसेका सबै रुढिवादी परम्पराहरुलाई तोड्न चाहन्छु । ताकी भविष्यमा यहाँका महिलाहरुलाई केही न केही प्रेरणा र उर्जा मिलोस् ।’
गत वर्षदेखि हुन नसकेको सोमालियाको राष्ट्रपतीय चुनाव आगामी अक्टोबरमा हुने तयारी गरिएको छ । यद्यपि कोभिडका कारण आगामी चुनाव प्रभावित हुन सक्ने अनुमान गरिएको छ ।
०००
मलेसियाका नयाँ नेतालाई विपक्षीको समर्थन
क्वालालम्पुरः मलेसियाका नयाँ नेताले विपक्षी दलको समर्थन पाएका छन् । लामो समयपछि संसद पुन रुपमा सुचारु भएसँगै सोमबार उनले विपक्षी दलको समर्थन जितेका हुन् । मलेसियाका नयाँ प्रधानमन्त्री इजमेली साब्री याकुवले मलेसियाका राजा अनवार इब्राहिम अनवरको नेतृत्वमा रहेको मुख्य विपक्षी दलको समर्थन पाएका हुन् ।
आगामी दुई वर्षमा हुने भनिएको चुनावअघि आफ्नो शासन सत्ता कमजोर नपार्ने सम्झौतामा विपक्षी दलले समर्थन जनाएको बताइएको छ । सो सम्झौता पत्रमा प्रधानमन्त्री याकुव र मलेसियाका राजा सुल्तान अब्दुल्लाह सुल्तान अहमद साहले केही दिनमा हस्ताक्षर गर्ने जनाइएको छ । प्रधानमन्त्री याकुबले संसदमा उपस्थित हुँदै मलेसियाका राजा साहसमक्ष सोमबार सो सम्झौता पत्र पेश गरेका थिए ।
०००
डेङ्गुका कारण उत्तर प्रदेशमा दर्जनौँको मृत्यु
उत्तर प्रदेशः भारतको उत्तर प्रदेशमा सेप्टेम्बर महिनाको सुरुवातदेखि फैलिएको डेङ्गुका कारण दर्जनौँको मृत्यु भएको छ । डेङ्गुका कारण उत्तर प्रदेशको फिरोजावाद जिल्लामा १० दिनभित्रमा बालबालिकासहित ५८ को मृत्यु भएको अधिकारीहरुले जनाएका छन् ।
उत्तर प्रदेशको फिरोजावाद जिल्ला सबैभन्दा प्रभावित बनेको फिरोजावादका मेडिकल अधिकृत दिनेश कुमार प्रेमीले बताएका छन् । ‘डेङ्गु फैलिन नदिन फिरोजावादमा मात्र हामीले विभिन्न ९५ वटा जनचेतनामुलक हेल्थ क्याम्प चलाइरहेका छौँ’प्रेमीले भनेका छन्, ‘तैपनि डेङ्गु तिब्र रुपमा फैलिरहेको छ । डेङ्गुकै कारण मृत्यु हुनेको संख्या पनि बढिरहेको छ ।’ उनका अनुसार उत्तर प्रदेशको जनसंख्या करिब २ करोड २२ लाख रहेको छ । डेङ्गुका कारण वर्षेनी ५० को मृत्यु हुने गर्छ ।
संयोजन: अस्मिता खड्का