पाकिस्तान र तालिबानविरुद्ध भारतमा प्रदर्शन, बाइडेनको लोकप्रियता खस्कँदै
रुसी राष्ट्रपति पुटिन आइसोलेसनमा
मस्कोः रुसका राष्ट्रपति भ्लादमिर पुटिन सिरियाली राष्ट्रपति बसर अल असदसँगको भेटपछि सेल्फ आइसोलसनमा बसेका छन् । आफ्नो पार्टीका कार्यकर्ताहरु समेत कोरोना संक्रमित भएपछि उनी मंगलबारदेखि सेल्फ आइसोलेसनमा बस्ने निर्णय गरेका हुन् । ६८ वर्षीय पुटिन आइसोलेसनमा बसे पनि उनको स्वास्थ्य अवस्था सामान्य रहेको र कोरोना संक्रमण नदेखिएको बताइएको छ ।
आइसोलेसनमा बसेका पुटिनले यसै हप्ताको लागि आयोजना गरिएको ताजकिस्तानको क्षेत्रीय सुरक्षा बैठक स्थगित गरेका छन् । यद्यपि उनी सो बैठकमा भर्चुअल माध्यममार्फत उपस्थित हुने कार्यतालिका थियो ।
सोमबार पुटिन र सिरियाका राष्ट्रपति बसर अल असदसँग भेटवार्ता भएको थियो । साथै सोमबार पुटिनले रसियन प्यारालिम्पियनसँग पनि भेट गरेका थिए भने उनी सैन्य ड्रील्स अवलोकन गर्न बेलारुस पनि पुगेका थिए ।
000
अमेरिकी राष्ट्रपति बाइडेनको लोकप्रियता खस्कँदै
वासिङटनः अफगानिस्तानबाट २० वर्षपछि आफ्ना सेना पूर्ण रुपमा फिर्ता गरेसँगै अमेरिकी राष्ट्रपति जो बाइडेनको लोकप्रियतामा गिरावट आएको विज्ञहरुको भनाइ छ ।
अफगानिस्तानबाट सेना फिर्ता गरेपछि उनको लोकप्रियता ह्वात्तै घटेको विज्ञहरुले बताएका हुन् । राष्ट्रपति बनेपछि पहिलो पटक बाइडेनको लोकप्रियतामा ५० प्रतिशत गिरावट आएको बताइएको छ ।
जसले गर्दा आगामी हुने मध्यवर्ती चुनावमा धक्का पुग्नसक्ने विज्ञहरुको प्रक्षेपण छ । अफगानिस्तानबाट अमेरिकी सैनिक फिर्ता ल्याउने बाइडेन प्रशासनको निर्णयको विरोध रिपब्लिकन पार्टीका नेताले मात्र नभई डेमोक्रेटिक पार्टीका नेताहरुले समेत गरेका थिए ।
अमेरिकी सेना अफगानिस्तानबाट पूर्ण रुपमा फिर्ता भएपछि उनले आफ्नै पार्टीका शीर्ष नेताहरुको पनि विरोध झेल्नु परिरहेको अधिकारीहरुले जनाएका छन् । जसको कारण उनको लोकप्रियताको रेटिङ मंगलबारसम्म ५० प्रतिशतले घटेको बताइएको छ ।
०००
अमेरिका, जापान र दक्षिण कोरियाका परमाणु दूतको भेट
टोक्योः उत्तर कोरियाले सबैभन्दा लामो र अत्याधुनिक क्षेप्यास्त्र परीक्षण गरेको केही दिनमै अमेरिका, जापान र दक्षिण कोरियाका परमाणु दूतबीच संयुक्त भेटवार्ता भएको छ ।
उत्तर कोरियाको क्षेप्यास्त्र र परमाणु कार्यक्रमबारे छलफल गर्न तीनवटै मुलुकका परमाणु दूतबीच मंगलबार जापानको टोक्योमा संयुक्त भेटवार्ता भएको हो । तीन मुलुकका परमाणु दूतबीच भएको भेटवार्तामा उत्तर कोरियाको परमाणु हतियार र शक्तिशाली क्षेप्यास्त्र कार्यक्रममा केन्द्रित रहेको बताइएको छ ।
उक्त भेटमा जापानी दूत ताकेहाइरो फुनाकोशी र दक्षिण कोरियाली दूत नो क्यु डुकले उत्तर कोरियासँगको हतियारसम्बन्धी सम्झौताको मुद्दामा सर्तक रहन र अमेरिकालाई आग्रह गरेका छन् ।
उत्तर कोरियाका स्थानीय मिडियाले गत शनिबार र आइतबार गरेको लामो र अत्याधुनिक छेप्यास्त्र परीक्षणलाई ‘रणनैतिक हतियार’र परमाणु क्षमता विस्तारको रुपमा व्याख्या गरेका छन् । उत्तर कोरियाको सो गतिविधिपछि विभिन्न अन्तर्राष्ट्रिय निकायको ध्यान खिचेको छ ।
०००
सन् २०३० सम्ममा ३० प्रतिशत मिथेन कटौती गरिनेः रिपोर्ट
वासिंटन: पृथ्वी ताताउने मिथेन ग्यास उत्सर्जन कम गर्नमा संयुक्त राज्य अमेरिका र युरोपेली संघ सहमत भएका छन् ।
सन् २०३० सम्ममा ३० प्रतिशत मिथेन ग्यास उत्सर्जन कटौती गर्न ती राष्ट्रहरु सहमत भएका हुन् । मंगलबार रोयटर्समा प्रकाशित ग्लोबल मिथेन प्लिजको प्रतिवेदन अनुसार आगामी नोभेम्बरमा ग्ल्यास्गोमा आयोजित जलवायु परिवर्तनसम्बन्धी सम्मेलनमा पृथ्वीको तापक्रम वृद्धि गराउन जिम्मेवार मानिएको मिथेन ग्यास उत्सर्जन कमी गर्नमा अमेरिकार र युरोपेली संघका सदस्य राष्ट्रहरुले सहमति जनाएका छन् ।
ती मुलुकहरुले सन् २०२० को तुलनामा सन् २०३० सम्ममा मानवीय र पशुपंक्षीबाट उत्पादन हुने मिथेन ग्यास उत्सर्जन ३० प्रतिशतले कम गर्ने लक्ष्य राखेका छन् ।
‘मानवीय कारण उत्पादन हुने मिथेन ग्यासलाई यदी हामीले समयमै उत्सर्जन कम गर्नमा प्रभावकारी कदम चालेमा वैश्विक तापक्रम घटाउन सकिन्छ’ उक्त प्रतिवेदनमा भनिएको छ । अमेरिका र युरोपेली संघको लक्ष्यमा सहभागी हुन सबैभन्दा बढी मिथेन उत्सर्जन गर्ने अन्य दर्जनौँ मुलुकलाई आग्रह गरिएको छ ।
जसमा चीन, रुस, भारत, ब्राजिल, साउदी अरेविया, नर्वे, कतार, ब्रिटेन, न्युजिल्याण्ड र दक्षिण अफ्रिका लगायत मुलुकहरु छन् ।
जलवायु परिवर्तनमा मुख्य भूमिका खेल्ने हरितगृह ग्यास मिथेन कार्बनडाइअक्साइड पछिको दोस्रो ठूलो कारक तत्व हो । कृषि, गोबर, फोहोरमैला र ढलबाट सबैभन्दा बढी मिथेन ग्यास उत्सर्जन हुने गर्छ । सन् २०१५ मा आयोजित पेरिस सम्झौतामा प्रतिनिधि मुलुकहरुले पृथ्वीको तापक्रम १.५ डिग्री सेल्सियस कायम राख्ने प्रतिबद्धता जनाएका थिए ।
०००
गुगललाई दक्षिण कोरियाको १७६ मिलियन डलर जरीवाना
सियोलः दक्षिण कोरियाले आफ्नो कम्पनी सामसुङको दुरुपयोग गरेको भन्दै संसारको सबैभन्दा ठूलो कम्पनी गुगललाई १७६.६४ अमेरिकी डलर (२०७ विलियन कोरियन रकम)जरीवाना लगाएको छ ।
सामसुङ कम्पनीको एन्ड्रोइड अपरेटिङ प्रणाली (ओएस)को कस्टुमाइज भर्सन ब्लक गरेको भन्दै सो रकम बराबरको जरीवाना लगाएको हो ।
कोरियाको निष्पक्ष व्यापार आयोग (केएफटीसी)ले मंगलबार एक विज्ञप्ति जारी गर्दै गुगलले प्रतिस्पर्धी कोरियन टेक कम्पनी सामसुङ मोबाइलको ओएस् प्रणालीमा प्रतिबन्ध लगाएको र दुरुपयोग गरेको बताएको छ । गुगलले सो प्रणालीमा प्रतिबन्ध लगाउँदा एप सञ्चालनमा समस्या भएको केएफटीसीले जनाएको छ ।
सोही अभियोगमा कोरियाले गुगललाई १७६ मिलियन अमेरिकी डलर जरीवाना सुनाएको बताइएको छ । कोरियन कम्पनी सामसुङको ओएस सिस्टममार्फत संसारका ८० प्रतिशतभन्दा बढि स्मार्टफोन सञ्चालन हुने गर्छ ।
०००
उपप्रधानमन्त्री बरादरको मृत्युको खबर झुटोः तालिबान
काबुलः तालिबानले हालै गठित नयाँ सरकारका उपप्रधानमन्त्रीको मृत्युको खबरको खण्डन गरेको छ । विभिन्न अन्तर्राष्ट्रिय सञ्चारमाध्यममा फैलिएको उपप्रधानमन्त्री मुल्लाह अब्दुल घानी बरादरको मृत्युको खबर साँचो नभएको भन्दै तालिबानले समाचारबारे खण्डन गरेको हो ।
पञ्जशीर कब्जाको क्रममा विपक्षीसँगको हमलामा परी मुल्ला अब्दुलको मृत्यु भएको हल्ला फैलिएको थियो । तालिबानका प्रवक्ता शुलेल शाहिनले तालिबानका प्रमुख नेतासमेत रहेका मुल्ला अब्दुल घानी बरादरको मृत्यु भएको तथा घाइते भएको भन्ने प्रश्नको जवाफ अस्वीकार गरेको रोयटर्सले जनाएको छ । ‘मुल्लाहको मृत्युको खबर पूर्ण रुपमा झुटो हो’उनले ट्विटरमार्फत भनेका छन् ।
०००
तालिबान र पाकिस्तानविरुद्ध दिल्लीमा प्रदर्शन
नयाँ दिल्लीः तालिबान र पाकिस्तानविरुद्ध भारतको राजधानी नयाँ दिल्लीमा प्रदर्शन गरिएको छ । अफगानिस्तानका शरणार्थीले तालिबान र पाकिस्तानविरुद्ध मंगलबार दिल्लीमा प्रदर्शन गरेका हुन् ।
भारतीय सञ्चारमाध्यमका अनुसार प्रदर्शनकारीहरुले हातमा पर्चा बोकेका थिए । पर्चामा ‘आतंकवाद र पाकिस्तान एउटै सिक्काका पाटा हुन्’ र ‘आइएसआइ अफगानिस्तान छोड’ जस्ता नारा लेखिएको थियो ।
‘मेरा आफन्तहरु पन्जशीरमा बस्थे । पाकिस्तानी एयरफोर्सले मेरा आफन्तहरु सबैलाई मारिदियो । त्यसैले हामी पाकिस्तानको विरुद्ध प्रदर्शन गरिरहेका छौँ’ एक प्रदर्शनकारीले भारतीय समाचार एजेन्सी एएनआईसँग भनेका छन् ।
यस्तै अर्का प्रदर्शनकारीले मिडियासँग भनेका छन् ‘आइएसआई र तालिबानको साठगाँठ चलिरहेको छ । हामी चाहन्छौँ अफगानिस्तान कसैको कब्जामा नपरोस् । अफगानिस्तान स्वतन्त्र बनोस् ।’ प्रदर्शनकारीहरुले अफगान प्रतिरोध आन्दोलनको समर्थनमा पनि नाराबाजी गरेका थिए ।
०००
सामाजिक मान्यता सहित ‘सभ्य’ इन्टरनेटमा केन्द्रित हुने चीनको लक्ष्य
बेइजिङः चीनले सामाजिक मान्यतासहित ‘सभ्य’ इन्टरनेट सेवामा केन्द्रित रहेको जनाएको छ । चीनले इन्टरनेट र अनलाइन सेवालाई नियमन गर्न सामाजिक मान्यतासहितको सभ्य इन्टरनेट सेवाको प्रवर्द्धनमा जोड दिएको चिनियाँ सञ्चारमाध्यमले जनाएका छन् ।
सत्ताधारी चिनियाँ पार्टी कम्युनिस्ट पार्टीले साइबर सुरक्षालाई ध्यानमा राखी इन्टरनेट सेवालाई सभ्य बनाउने लक्ष्य राखिएको बताइएको छ । सामाजिक मुल्य सहित इन्टरनेट सेवालाई सभ्य बनाउन चीनको राज्य परिषद्ले नयाँ नियम जारी गरेको सिन्ह्वा न्युजले जनाएको छ ।
परिषद्का अनुसार इन्टरनेटमार्फत देशको सुरक्षा, मानिसको व्यवहार आदि जोखिममा हुने भएकोले इन्टरनेट सेवालाई मर्यादित बनाउन र अनुशासनमा राख्न नयाँ नियम जारी गरिएको हो । जसअनुसार चीनको इन्टरनेट सेवा सभ्य र सामाजिक मुल्य मान्यतामा केन्द्रित हुनेछ ।
संयोजन: अस्मिता खड्का