जनकपुरधाम : धनुषाका स्थानीय तहहरुले राहत सामग्री उपलब्ध गराउने नाममा २२ करोडभन्दा बढी रकम खर्च गरेको पाइएको छ । धनुषामा एक उप–महानगरपालिका, ११ नगरपालिका र ६ गाउँपालिकासहित १८ स्थानीय तहले कोरोनाकालमा राहत उपलब्ध गराउने नाममा २२ करोड ४ लाख ७६ हजार ३ सय ५५ रुपैयाँ खर्च गरेको पाइएको हो ।
कोरोना कालमा सबैभन्दा बढी जनकपुरधाम उप–महानगरपालिकाले ३ करोड ५ लाख ७८ हजार ९ सय ३२ रुपैयाँ खर्च गरेको छ । जनकपुरधाम उपमहानगरले राहत वितरणको नाममा १ करोड ४६ लाख १६ हजार ४ सय ५० रुपैयाँ खर्च गरेको छ भने क्वारेन्टिन/होल्डिङ्ग सेन्टरवापत ६८ लाख ९१ हजार ५ सय ५९ रुपैयाँ खर्च गरेको छ ।
त्यस्तै, गणेशमान चारनाथ नगरपालिकाले २ करोड ३२ लाख ७२ हजार ६ सय ६४ रुपैयाँ कोरोनाको नाममा खर्च गरेको प्रतिवेदनमा उल्लेख गरिएको छ । नगराइन नगरपालिकाले १ करोड ७९ लाख ६७ हजार १ सय ९२, सबैला नगरपालिकाले १ करोड ५७ लाख १५ हजार, मिथिला विहारीले १ करोड ४० लाख २९ हजार १ सय ३६, लक्ष्मिनिया गाउँपालिकाले १ करोड ३९ लाख ९१ हजार २ सय २ रुपैयाँ कोरोना महामारीको नाममा खर्च गरेको छ ।
हंसपुर नगरपालिकाले आव २०७६/७७ मा १ करोड २३ लाख ६९ हजार ५ सय २९ रुपैयाँ खर्च गरेको प्रतिवेदनमा उल्लेख गरिएको हो । हंसपुर नगरपालिकाले १६ लाख भन्दा बढीको मास्क मात्र खरिद गरेको हो ।
नगरपालिकाले वैदेही कन्स्ट्रक्सन एण्ड सप्लायर्ससँग कपडाको मास्क खरिद गर्दा ३ लाख ७२ हजार ९ सय, ऋद्धिसिद्धि ट्रेडर्सबाट कपडाको मास्क खरिद गर्दा ४ लाख ९७ हजार २ सय, कविर जेनरल अर्डर सप्लायर्ससँग ८५ हजार २ सय ५८, आदित्य इन्टरनेशनलसँग के एन ९५ मास्क खरिदवापत १ लाख ५४ हजार ५ सय ६०, वैदेही कन्स्ट्रक्सन एण्ड सप्लायर्ससँग पीपीइ सेट, मास्क सेनिटाइजर खरिद गर्दा ३ लाख ४१ हजार ७ सय २० रुपैयाँ भुक्तानी गरेको प्रतिवेदनमा उल्लेख गरिएको छ ।
कमला नगरपालिकाले आव २०७६/७७ मा १ करोड २३ लाख १५ हजार ७ सय ९५ रुपैयाँ कोरोना महामारीमा खर्च गरेको छ । त्यस्तै क्षिरेश्वरनाथ नगरपालिकाले १ करोड १५ लाख ५ सय ५५, विदेह नगरपालिकाले १ करोड १२ लाख ५२ हजार १३, शहिदनगर नगरपालिकाले १ करोड ३ लाख ७८ हजार २३, जनकनन्दिनी गाउँपालिकाले ९६ लाख ७६ हजार ७ सय ८९, धनुषाधाम नगरपालिकाले ९६ लाख १ हजार ४ सय ६२, मुखियापट्टी मुसहरनियाँ गाउँपालिकाले ९४ लाख १९ हजार ७ सय २, धनौजी गाउँपालिकाले ५६ लाख ५० हजार ६ सय, औरही गाउँपालिकाले ५३ लाख ९५ हजार २ सय ५४, मिथिला नगरपालिकाले ५२ लाख ६७ हजार ११ र वटेश्वर गाउँपालिकाले कोरोना महामारीमा २० लाख ९५ हजार ४ सय ९६ रुपैयाँ खर्च गरेको महालेखापरीक्षकको ५८ औँ प्रतिवेदनमा उल्लेख गरिएको छ । नेपालमा पहिलो पटक कोरोना भाइरसको संक्रमण फैलिएपछि नेपाल सरकारले २०७६ साल चैत ११ देखी देशैभरी निषेधाज्ञा घोषणा गरिएको थियो ।
प्रतिक्रिया दिनुहोस !
