बेनी : म्याग्दीको पोखरेबगर-घार-खिवाङ-शिख-चित्रे सडक आयोजनाको ठेकेदारले अन्नपूर्ण गाउँपालिका–६ दूरबिनडाँडाको पहाडबाट जथाभावी ढुङ्गा र गिट्टी दोहन गरेका छन् ।
वातावरणीय प्रभाव मूल्याङ्कन बिनै स्थानीय तहलाई राजस्व नतिरी एक्साभेटर प्रयोग गरेर मनपरी ढुङ्गा उत्खनन् भएको हो । मोतिदान-जयमाता जेभीले पहाडबाट आफूखुसी मनपरी शैलीमा ढुङ्गा उत्खनन् गरेको स्थानीयबासी सन्तोष बरुवालले बताए ।
‘पहाडमा जथाभावी डोजर चलाएर ढुङ्गा निकाल्दा वातावरणीय असरका साथै स्थानीय तहको आम्दानीमा असर परेको छ,'उनले भने,'सडक निर्माणका लागि ढुङ्गा र गिट्टी निकाल्ने बाहनामा सहमति बिपरित पहाड खनेर रित्तायो ।’
२०७६ भदौमा वडा अध्यक्ष कृष्णप्रसाद बरुवालको अध्यक्षतामा बसेको सरोकारवालाहरुको बैठकले दूरबिनडाँडामा सडकले ओगट्ने ८ मिटर र चार मिटरभित्र बाट ढुङ्गा निकाल्न दिने सहमति भएको थियो। तर, ठेकेदारले सहमति विपरित जंगल मासिने, पहिरो चल्ने गरी धेरै भित्रसम्म गएर पहाडबाट ढुङ्गा निकालेको वडा अध्यक्ष बरुवालले बताए ।
‘उत्खनन् रोक्नका लागि टोल सुधार समितिले वडा र गाउँपालिका कार्यालयमा निवेदन दिएका थिए,' उनले भने, ‘ठेकेदार र स्थानीयबासीसँग थप छलफल गरेर निर्णय नहुँदासम्मका लागि पहाड उत्खनन् गर्न रोक लगाएका छौं।’
ठेकेदार कम्पनीका प्रतिनिधि रामप्रसाद बञ्जाडेले डिजाइन, इस्टिमेट अनुसार स्थानीयसँग सहमति गरेर ढुङ्गा निकालेको बताए् । राष्ट्रिय पुननिर्माण प्राधिकरणले भूकम्प प्रभावितअन्तरगत पोखरेबगरदेखि घार, खिवाङ, शिखहुँदै चित्रे जोड्ने १८.५ किलोमिटर सडक कालोपत्रे गर्न २०७५ मंसिर ९ गते २७ करोड ९१ लाख ३५ हजार २२० रुपैयामा ठेक्का सम्झौता गरेको थियो ।
२०७७ जेठ २२ गते ठेक्का सम्झौताको म्याद सकिएको छ। आयोजनाको हालसम्म ५५ प्रतिशत मात्र भौतिक प्रगति गरेको छ । कोरोनाको जोखिम, लकडाउन र पहिरोको बाहनामा ढिलासुस्ति गरेका ठेकेदारले पर्याप्त मजदुर र उपकरण परिचालन गर्न नसक्दा सडक अलपत्र भएको स्थानीयको भनाइ छ ।
हाल कच्चि, साँघुरो र ग्रेड नमिलेको अवस्थामा रहेको सडकलाई फराकीलो बनाएर ग्राभेल, ढलान, ग्यावियन पर्खाल, मेसीनरी पर्खाल, ह्युम पाइप, कल्भर्ट, सोलीङ र ३.७५ किलोमिटर कालोपत्रे समेत गर्ने उद्देश्यले आयोजना सञ्चालन भएको हो ।
प्रतिक्रिया दिनुहोस !
