जी २० का नेताहरु अफगानिस्तानमा आतंकवादविरोधी मुद्धामा केन्द्रित
वासिङटन : बलियो अर्थतन्त्र भएका राष्ट्रहरुको समूह जी २० का सदस्यहरु अफगानिस्तानको आतंकवादविरोधी मुद्दामा केन्द्रित भएका छन् । मंगलबार राति बसेको भर्चुअल बैठकमा जी २० सदस्य राष्ट्रका शीर्ष नेताहरुले आतंकवादविरोधी मुद्धामा केन्द्रित हुने जनाएका हुन् ।
अफगानिस्तानमा मानवीय सहायता उपलब्ध गराउनेबारे बसेको सो बैठकमा शीर्ष नेताहरुले अफगानिस्तानमा रहेका आतंकवादविरुद्ध केन्द्रित हुने जनाएको विभिन्न अन्तर्राष्ट्रि सञ्चारमाध्यममा खबर छ ।
‘बैठकमा हामीले अफगानिस्तानमा भएको आइएसआइएस केको खतरासहित देशभित्रको आतंकवादविरोधी गतिविधि रोक्न गम्भीर हुनेबारे छलफल गर्यौ । तालिवानविरोधी आतंकवादी समूहको गतिविधि रोक्नेबारे पनि छलफल गरेका छौं,' अमेरिकी राष्ट्रपतिको कार्यालय ह्वाइट हाउसद्धारा जारी विज्ञप्तिमा भनिएको छ ।
अफगान सहायताबारे संयुक्त राष्ट्रसंघका महासचिव एन्टेरियो गुटेरेसले गरेको आग्रहपछि इटालीको आयोजनामा जी २० को बैठक बसेको थियो । सो बैठकमा अमेरिका, कतार, संयुक्त राष्ट्र संघ, जर्मन, इटाली लगायत मुलुकहरु उपस्थित थिए । रुस र चीनले भने सो बैठकमा सहभागीता जनाएका थिएनन् ।
अफगान सहायता उपलब्ध गराउनेबारे समेत जी २० का नेताहरु सहमत भएका छन् । उनीहरुले अफगानिस्तानको सत्ता कब्जामा लिएको तालिवान समूहलाई अन्तर्राष्ट्रिय मान्यता नदिएपनि अफगान सहायता वितरणमा संलग्न गराउनेमा नेताहरु सहमत भएको दी गार्जियनमा उल्लेख छ ।
‘अफगानिस्तानमा मानविय सहायता पठाउन र वितरण गर्नमा तालिवानलाई संलग्न गराउनेबाहेक अन्य विकल्प छैन । अफगान सहायतामा संलग्न गराएपनि तालिवानलाई अन्तराष्ट्रिय मान्यता भने दिइने छैन’ जी २० का नेताहरुले भनेका छन् ।
तर अमेरिकी राष्ट्रपति जो बाइडेनले भने अफगान सहायता सत्तारुढ तालिवानमार्फत नभई अन्य अन्तर्राष्ट्रिय संस्थामार्फत उपलब्ध गराउन जोड दिएका छन् । सो बैठकपछि युरोपेली संघ (ईयु)ले तत्काल १ विलियन युरो अफगान सहायता दिने निर्णय गरेको छ । जर्मनले तत्काल ६० करोड युरो उपलब्ध गराउने घोषणालाई पुन सुनिश्चित गरेको छ ।